រាជធានីភ្នំពេញ ៖ មានហេតុការភ្ញាក់ផ្អើលមួយបានកើតឡើងរហូតមានការចេញអន្តរាគមន៏ពីសំណាក់កម្លាំងនគរបាលប៉ុស្តិ៍ចោមចៅ១ ខណៈដែលបុរសម្នាក់បានបិទទ្វារវាយប្រពន្ធ ព្រោះតែរឿងទំនាស់កើតចេញពីស្ត្រីជាប្រពន្ធប្រច័ណ្ឌប្ដី នៅពេលដែលទូរស័ព្ទរបស់បុរសជាប្ដីខាងលើរោទិ៍ម្ដងៗ មានតែស្រីស្នេហ៍ខលចូលរហូតម្យ៉ាងទៀតស្រីម្នាក់នោះធ្លាប់បានជេររូបនាងតាមទូរស័ព្ទរួចម្តងមកហើយ ។ ហេតុការណ៍នេះបានកើតឡើង កាលពីវេលាម៉ោង១រសៀល ថ្ងៃទី២៩ ខែវិច្ឆិកា ឆ្នាំ២០១៧ នៅចំណុចបន្ទប់ផ្ទះជួល មួយកន្លែងស្ថិត នៅក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
ប្ដីប្រពន្ធទាំងពីរនាក់នោះមិនបានប្រាប់ឈ្មោះរបស់ខ្លួនឲ្យដឹងនោះទេពួកគាត់បានលាក់អត្តសញ្ញាណរបស់ខ្លួន ចំណែកនគរបាលក៏មិនបានធ្វើកំណត់ហេតុ និងរបាយការណ៏ ឬធ្វើកិច្ចសន្យាផ្សេងៗ ព្រមទាំងសួរនាំពី ឈ្មោះអ្នកទាំងពីរនោះដែរគឺគ្រាន់តែនិយាយណែនាំ និងអប់រំរួច និងសម្របសម្រួលរយៈពេលប្រហែល១៥នាទីក៏បានឲ្យពួកគេនាំគ្នាវិលត្រឡប់ទៅផ្ទះវិញ ។ ស្ត្រីជាប្រពន្ធបានប្រាប់នគរបាលថា កន្លងមកមានស្រីម្នាក់បានខលរកប្ដីរបស់នាងរហូតហើយក៏ធ្លាប់មានទំនាស់ជេរគ្នាជាមួយនាងតាមទូរស័ព្ទដែរ ព្រោះតែស្ត្រីនោះគឺជាស្រីស្នេហ៏របស់ប្ដីនាង ដោយឡែកនៅមុនពេលកើតហេតុប្ដីនាងមិនបានកាន់ទូរស័ព្ទជាប់នឹងដៃទេ គាត់បានទុកទូរស័ព្ទចោល ស្រាប់តែស្រីស្នេហ៏ដដែលបានខលរកគាត់ម្ដងហើយម្ដងទៀត ខណៈនោះនាងបាននៅជិតប្ដី ហើយលោកប្ដីមិនហ៊ានលើកនោះឡើយ ។
ពេលនោះនាងក៏បាននិយាយទៅកាន់លោកប្ដីថា «បើបងមិនលើកទូរស័ព្ទទេ ទុកឲ្យអូនជាអ្នកលើកក៏បានដែរ ព្រោះម្នាក់ហ្នឹងធ្លាប់ជេរអូនម្តងរួមមកហើយ» ចំណែកលោកប្ដីបានឆ្លើយតបវិញថា «មិនលើកទេមេមួយហ្នឹងសាំណាស់» ដែលបាននិយាយសម្ដៅថា មេរបស់គាត់នៅកន្លែងធ្វើការខលមក ប៉ុន្តែនាងបានដឹងរួចទៅហើយថា លេខនោះគឺជាលេខស្រីស្នេហ៏របស់ប្ដី និងធ្លាប់ខលជេរនាងទៀតផង ។
លោកប្ដីពូកែរកនឹកដោះសារខ្លាំងណាស់ ប៉ុន្តែនាងមិនអាចនៅស្ងៀមបានទេ ក្រោយពេលឃើញស្រី ខលរកប្ដីមិនឈប់បែបនេះ ដែលបានធ្វើឲ្យភ្នំភ្លើងផ្ទុះឡើងភ្លាមមួយរំពេច ហើយនាងបានលើកទូរស័ព្ទជំនួសប្ដីទាំងប្ដីមិនបានអនុញ្ញាតឡើយ ហើយគ្រាន់តែនាងកាន់ទូរស័ព្ទមិនទាន់បាននិយាយផង ស្រាប់តែលោកប្ដីដណ្ដើមយកទៅវិញយ៉ាងទាន់ហន់ ។ មិនតែប៉ុណ្ណោះបានស្រែកសំឡុត ព្រមទាំងវាយរូបនាងទាំងកំរោល និងបានបិទទ្វារបន្ទប់វាយនាងទៀត ទើបបង្កឲ្យមានការភ្ញាក់ផ្អើលដល់អ្នកជិតខាងទាំងថ្ងៃ និងរាយការណ៏ជូននគរបាលចុះទៅអន្តរាគមន៏បែបនេះតែម្ដង ។
នគរបាលបានឲ្យដឹងថា ក្រោយពេលនាំទៅដល់ប៉ុស្តិ៍កម្លាំងមិនបានធ្វើកំណត់ហេតុ ឬរបាយការណ៏ និងកិច្ចសន្យានោះទេ ដោយសារតែប្រពន្ធមិនបានប្ដឹងផ្ដល់ ហើយគ្មានរបួសស្នាមធំដុំ ទើបកម្លាំងគ្រាន់តែត្រឹមអប់រំណែនាំ និងសម្របសម្រួលឲ្យត្រូវគ្នា វិញតែប៉ុណ្ណោះ មិនបានសាកសួរឈ្មោះពួកគាត់ឡើយបន្ទាប់មកក៏បានឲ្យវិលត្រឡប់ទៅផ្ទះវិញ ៕
ចែករំលែកព័តមាននេះ