រាជធានីភ្នំពេញ ៖ ចាប់តាំងពីកាន់កាប់ការងារជាអ្នករៀបចំកម្មវិធីប្រដាល់ប្រចាំនៅទូរទស្សន៍អាស៊ីអាគ្នេយ៍ គ្មានអ្នកណាមិនស្គាល់លោក ញាណ សុធី នោះទេ ដោយសារតែលោកទទួលជោគជ័យក្នុងការរៀបចំកម្មវិធីប្រដាល់ឱ្យមានកេរ្តិ៍ឈ្មោះយ៉ាងខ្លាំង ថ្វីដ្បិតទូរទស្សន៍អាស៊ីអាគ្នេយ៍បើកកម្មវិធីនេះក្រោយគេក្ដី ។…
រាជធានីភ្នំពេញ ៖ ចាប់តាំងពីកាន់កាប់ការងារជាអ្នករៀបចំកម្មវិធីប្រដាល់ប្រចាំនៅទូរទស្សន៍អាស៊ីអាគ្នេយ៍ គ្មានអ្នកណាមិនស្គាល់លោក ញាណ សុធី នោះទេ ដោយសារតែលោកទទួលជោគជ័យក្នុងការរៀបចំកម្មវិធីប្រដាល់ឱ្យមានកេរ្តិ៍ឈ្មោះយ៉ាងខ្លាំង ថ្វីដ្បិតទូរទស្សន៍អាស៊ីអាគ្នេយ៍បើកកម្មវិធីនេះក្រោយគេក្ដី ។ ធៀបនឹងសង្វៀនប្រដាល់ដែលបានបើកមុនទូរទស្សន៍អាស៊ីអាគ្នេយ៍ គេមើលឃើញសន្ទុះនៃការរៀបចំរបស់លោកមានការឈានឡើងជាងប៉ុស្ដិ៍ផ្សេងៗដាច់ឆ្ងាយ ទើបមានការភ្ញាក់ផ្អើលនៅពេលមានការទម្លាយច្រើនឡើង អមដោយការទទួលស្គាល់របស់សាមីខ្លួនផងថា មានស្ថាប័នជាច្រើនបានជះលុយកាក់សុំឱ្យលោកដើរចេញពីទូរទស្សន៍អាស៊ីអាគ្នេយ៍ ។
លោក ញាណ សុធី បានអះអាងថា ចាប់តាំងពីលោកបោះជំហានមកកាន់ការងារជាអ្នករៀបចំកម្មវិធីប្រដាល់ប្រចាំសង្វៀនទូរទស្សន៍អាស៊ីអាគ្នេយ៍លោកបានបង្កើនការប្រដាល់រហូតដល់៦សង្វៀនក្នុងមួយសប្ដាហ៍ក្នុងពេលដែលការប្រកួតនីមួយៗក៏សុទ្ធតែជាការប្រដាល់អន្តរជាតិដែលមានកីឡាករយ៉ាងតិច២រូបប្រកួតជាមួយកីឡាករបរទេស
ដែលភាគច្រើនជាកីឡាករថៃ ។ លោកថា ការប្រកួតអន្តរជាតិ គឺមិនគ្រាន់តែប្រកួតជាលក្ខណៈមិត្តភាពប៉ុណ្ណោះទេ ថែមទាំងមានការប្រកួតជាលក្ខណៈដណ្ដើមជើងឯកអន្តរជាតិផងដែរ ដោយតាំងពីលោកបង្កើតឡើងគឺមានការដណ្ដើមជើងឯករវាងកីឡាករកម្ពុជា និងបរទេសប្រមាណជា៤រដូវកាលមកហើយ ។ ទោះបីយ៉ាងណាលោកសារភាពថា ការរៀបចំបែបនេះតាមភាពជាក់ស្ដែងគឺមានការលំបាកខ្លាំងណាស់ ជាពិសេសនៅពេលមានការដោះដូរកីឡាករកម្ពុជា ឬថៃម្ដងៗ ដោយសារតែកីឡាករទាំងពីរភាគីបានជួបនូវបញ្ហាសុខភាពជាយថាហេតុ និងជួនកាលកីឡាករទាំងនោះបែរជាត្រូវថ្នាក់លើមិនអនុញ្ញាតឱ្យចេញប្រកួតព្រោះតែត្រូវថែបំប៉នសមត្ថភាពតបតាមការចាត់តាំងរបស់សហព័ន្ធជាដើម ។ លោកថា ការរៀបចំការប្រដាល់ត្រឹមតែជាលក្ខណៈក្នុងស្រុកគឺមានបញ្ហាស្មុគស្មាញណាស់ទៅហើយ ចុះទម្រាំតែរៀបចំការប្រដាល់ជាលក្ខណៈអន្តរជាតិ ហើយច្រើនសង្វៀនទៀតគឺច្បាស់ណាស់ថារឹតតែពិបាកក្នុងនាមជាអ្នកចាត់ការម្នាក់ ។ ជាពិសេសក្នុងពេលកីឡាករថៃ ឬកីឡាករកម្ពុជាស្ថិតក្នុងភាពចម្រូងចម្រាសក្នុងការកាត់ក្ដី គឺរឹតតែជាបញ្ហាដែលត្រូវដោះស្រាយ ។
លោកថា កីឡាករខ្លះប្រកួតមិនអស់ដៃទេដោយបានលក់ដូរលទ្ធផល ហើយនៅពេលលោក និងគណៈកម្មការសម្រេចឱ្យចាញ់ ឬឱ្យឈ្នះឱ្យផ្ទុយនឹងការសង្ស័យថាគេធ្វើចាញ់ ឬធ្វើឈ្នះ គឺបែរជាមានការតវ៉ា ។ លោកថា ក្នុងនាមជាអ្នករៀបចំមិនគ្រាន់តែត្រូវសម្រិតសម្រាំងកីឡាករឱ្យសមនឹងព្រឹត្តិការណ៍នោះទេ គឺត្រូវស្វែងយល់បញ្ហាជុំវិញខ្លួនដូចជាករណីអ្នកផ្ដល់ពិន្ទុណាមួយមានភាពលម្អៀងព្រោះតែកូនសិស្សខ្លួន និងករណីមានអ្នកទិញកីឡាករឱ្យធ្វើជាចាញ់ដើម្បីបានលុយនៅក្រៅការប្រកួតនោះផង អ៊ីចឹងហើយទើបលោកត្រូវតែស្វែងយល់ឱ្យគ្រប់ជ្រុងជ្រោយលើករណីនេះ ដោយនឹងកំណត់ឱ្យកីឡាករនោះឈ្នះវិញ បើរកឃើញថាគេចង់ធ្វើចាញ់ ឬមិនប្រកាសលទ្ធផលតែម្ដង ប្រសិនបើរកឃើញថាមានបញ្ហាដូច្នោះបានកើតឡើងមែន ។ លោកថា បើបណ្ដោយឱ្យកីឡាករម្នាក់ស៊ីឡាកបានសម្រេច ឬលក់ដូរលទ្ធផលបានសម្រេចតែម្ដងពីរដង គឺច្បាស់ណាស់ថា ការគាំទ្រដែលបានកើតឡើងនៅក្នុងសង្វៀនទូរទស្សន៍អាស៊ីអាគ្នេយ៍នឹងត្រូវធ្លាក់ចុះ ហើយបើធ្លាក់ចុះមែនគឺប្រាកដជាគ្មានការគាំទ្របន្តិចម្ដងៗ ។ លោកថា អ្នកមិនដឹងពីការរៀបចំពិតជាមានការរិះគន់ថា ហេតុអ្វីកីឡាករនេះទើបតែឃើញប្រកួតថ្ងៃមុនស្រាប់តែត្រូវដាក់ទៀត និងខ្លះថាហេតុអ្វីបានដាក់កីឡាករនេះឱ្យចូលប្រកួតដណ្ដើមខ្សែក្រវាត់បានមួយពីរប្រកួតហើយបែរជាត្រូវដូរចេញ ។
អ្នកមិនដឹងបានចោទលោកថា ជារឿងបក្សពួកនិយម និងថា ហេតុផលដែលនាំឱ្យមានការផ្លាស់ប្ដូរ ឬដាក់កីឡាករដដែលៗឱ្យបានប្រកួតញឹកទាំងនោះគឺដោយសារតែបញ្ហាមានខ្នងបង្អែកជាដើម។ លោកអះអាងថា បញ្ហានៅពីក្រោយការរៀបចំគឺមនុស្សតិចណាស់បានដឹង បានឮ ប៉ុន្តែសម្រាប់លោកគឺប្រឹងធ្វើអ្វីដើម្បីឱ្យមានការគាំទ្រខ្លាំងក្លាសម្រាប់ការប្រដាល់នៅលើសង្វៀនទូរទស្សន៍អាស៊ីអាគ្នេយ៍ប៉ុណ្ណោះ ។ លោកថា កីឡាករខ្លះត្រូវបានផ្គូផ្គងឱ្យជួបគ្នាហើយ ប៉ុន្តែនៅពេលជិតដល់ថ្ងៃប្រកួតបែរជាមិនថែទាំសុខភាព ហើយអ្នកខ្លះបណ្ដោយឱ្យឡើងគីឡូមិនអាចឱ្យប្រកួតទើបនាំឱ្យមានការដោះដូរ ។ ដោយឡែកសម្រាប់កីឡាករខ្លះដែលមានឈ្មោះឡើងប្រកួតនៅក្នុងព្រឹត្តិការណ៍សន្សំពិន្ទុដណ្ដើមពានហើយតែបែរជាត្រូវដូរចោលនោះ គឺដោយសារតែកីឡាករទាំងនោះត្រូវបានរកឃើញថាមានការស្និទ្ធស្នាលជាមួយកីឡាករជាគូប្រកួត ហើយមិនអាចដាក់ឱ្យប្រកួតគ្នាបាន ។ លោកបានលើកឧទាហរណ៍ថា លោកថៃ អ៊ូ ក្រៅពីបានដឹកនាំកីឡាករឱ្យឡើងមកប្រកួតនៅក្នុងប្រទេសកម្ពុជាគឺលោកក៏មានក្លិបប្រដាល់ជារបស់ខ្លួនផងដែរ
អ៊ីចឹងហើយទើបក្នុងពេលដែលលោកស៊ើបដឹងថា កីឡាករជាកូនសិស្សរបស់លោកគ្រូខ្លះ គឺដ្បិតថាមានឈ្មោះហ្វឹកហាត់នៅក្នុងក្លិបផ្សេងគ្នាក៏ពិតមែន ប៉ុន្តែការពិតគេហាត់ក្នុងក្លិបតែមួយទីកន្លែងតែមួយ និងគ្រូបង្វឹកតែមួយ ដែលត្រូវតែឱ្យលោកដូរចោល បើស៊ើបដឹងថាកីឡាករជាគូប្រកួតគឺមានទំនាក់ទំនងគ្នាស្អិតរមួត ដោយមិនទុកឱ្យកីឡាករដែលមានទំនាក់ទំនងនៅខាងក្រៅធ្វើការប្រកួតគ្នាបានទេ។
លោកនិយាយថា៖«ក្នុងពេលរៀបចំគឺគ្រូបង្វឹកភាគច្រើនសុទ្ធតែបានយកកីឡាករនេះមកដាក់ កីឡាករនោះមកដាក់ ហើយអត់ប្រាប់យើងថាអ្នកណាហាត់ជាមួយគ្រូតែមួយខ្លះទេ តែដល់វ៉ៃគ្នាយើងឃើញសកម្មភាពគាត់អត់កើតគឺយើងអត់ទុកទេគឺត្រូវតែដូរចោល!»។ លោកថាក្នុងនាមជាអ្នករៀបចំគឺត្រូវស្វែងយល់គ្រប់ជ្រុង ហើយបើសិនជាខ្វះសមត្ថភាព និងបទពិសោធន៍ គឺពិតជាត្រូវគេបោកវិលក្បុង ។ លោកថា លោកចេះភាសាថៃស្ទាត់ហើយមានទំនាក់ទំនងផ្ទាល់ជាមួយកីឡាករថៃ និងសហព័ន្ធប្រដាល់ថៃ ទើបក្នុងពេលប្រកួតម្ដងៗលោករកបានកីឡាករថៃល្អៗ ហើយការដាក់កីឡាករកម្ពុជាឱ្យត្រូវគ្នាកុំឱ្យខុសគ្នាក៏ជារឿងសំខាន់មិនអាចខ្វះបាន ។ អ៊ីចឹងហើយទើបការប្រកួតគ្រប់សង្វៀនដែលបានធ្វើឡើងទទួលបានជោគជ័យចាប់តាំងពីលោកមកកាន់ការងារជាអ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍ ។ សរុបមកដល់ពេលនេះ លោកមានបទពិសោធន៍រៀបចំការប្រដាល់ប្រមាណជា២០ឆ្នាំហើយ ដោយនៅប៉ុស្ដិ៍លេខ៥ដ្បិតថាមិនមានតំណែងជាអ្នករៀបចំ តែលោកជាអ្នកទទួលខុសត្រូវម្នាក់ជាមួយមេចាស់គឺលោក សេង កដិកា ជាយូរមកហើយ ទើបបានមកកាន់តំណែងនេះនៅទូរទស្សន៍អាស៊ីអាគ្នេយ៍ ។
ពាក់ព័ន្ធនឹងព័ត៌មានការប្រទាញប្រទង់យកលោកឱ្យដើរចេញពីទូរទស្សន៍អាស៊ីអាគ្នេយ៍ លោកអះអាងថា គឺមានយូរហើយ ដោយគ្រាន់តែស្ថានភាពទាក់ទាញមានខ្លាំងជាងមុននាពេលចុងក្រោយ ។ លោកបាននិយាយដោយត្រង់ទៅកាន់ស្ថានីយទូរទស្សន៍ប៉ុស្ដិ៍លេខ៥ថាហ៊ានឱ្យប្រាក់ខែលោកដល់ទៅជិត២០០០ដុល្លារឯណោះ ដើម្បីឱ្យលោកចាកចេញពីទូរទស្សន៍នេះ ហើយទៅរៀបចំការប្រដាល់នៅប៉ុស្ដិ៍លេខ៥វិញ ដោយសារតែពេលកន្លងមកលោកក៏ជាអ្នកជួយចាត់ចែងដ៏សំខាន់ម្នាក់នៅប៉ុស្ដិ៍លេខ៥មុនពេលមកធ្វើការនៅទូរទស្សន៍អាស៊ីអាគ្នេយ៍ ។
លោកថា មេជាជនជាតិថៃបានទាក់ទងមកលោកច្រើនលើកមកហើយ ដោយប្រាក់ខែដែលប៉ុស្ដិ៍លេខ៥ប្រកាសផ្ដល់ឱ្យខ្ពស់ជាងប៉ុស្ដិ៍អាស៊ីអាគ្នេយ៍ដាច់ឆ្ងាយដូចនោះផង ។ អ្វីដែលលោកប្រកាសថា ប៉ុស្ដិ៍លេខ៥ហ៊ានឱ្យលោកខ្ពស់ដែលក្នុងពេលម្ដងៗគឺលោកចង់ទទួលយកនោះ គឺឱ្យប្រាក់ខែលោកដល់ជិត២០០០ដុល្លារហើយ ថែមទាំងឱ្យលោកកាន់កាប់ការងារផលិតកម្មវិធីប្រដាល់តែមួយសប្ដាហ៍មួយលើក ដែលធ្វើឱ្យលោកកាន់តែស្រួលនោះទៅទៀត ។ ទោះបីយ៉ាងណាលោកថាមិនទាន់ដាច់ចិត្តចាកចេញពីអាស៊ីអាគ្នេយ៍ទេ បើទោះជាស្ថាប័ននេះតម្រូវឱ្យលោករៀបចំការប្រដាល់ដល់ទៅ៥សង្វៀនក្នុងមួយសប្ដាហ៍ ហើយប្រាក់ខែដែលទទួលបានគឺតិចជាងប៉ុស្ដិ៍លេខ៥ដែលហ៊ានឱ្យខ្ពស់ជាង ហើយឱ្យលោករៀបចំតែមួយសង្វៀនក្នុងមួយសប្ដាហ៍ ។
លោកថា មិនដាច់ចិត្តដើរចេញពីប៉ុស្ដិ៍អាស៊ីអាគ្នេយ៍ទេ ដោយសារតែថ្នាក់ដឹកនាំរបស់ប៉ុស្ដិ៍នេះគឺជាមនុស្សល្អចំពោះលោក និងម្យ៉ាងមិនចង់ឱ្យអ្នករៀបចំការប្រដាល់ជាមួយលោកទាំង៥សង្វៀនក្លាយទៅជាតែលតោល បើលោកចាកចេញហើយបែរជាធ្វើឱ្យការប្រដាល់ដែលលោកប្រឹងប្រែងរៀបចំទៅជាបាត់បង់ការគាំទ្រហើយឈានទៅបិទចោលម្ដងមួយៗ។ លោកថា ការទទួលការងារនៅប៉ុស្ដិ៍លេខ៥ក៏ធ្វើឱ្យលោកពិបាកធ្វើចំពោះមេចាស់ គឺលោក សេង កដិកា ដែលជាអ្នករៀបចំការប្រដាល់ប្រចាំនៅប៉ុស្ដិ៍លេខ៥នាពេលនោះផងដែរ ដោយសារតែលោកបញ្ជាក់ថា ប៉ុស្ដិ៍លេខ៥នឹងដំឡើងលោកសេង កដិកា ឱ្យផុតតំណែងនៅក្នុងវិស័យកីឡានោះ ហើយឱ្យលោកទៅជំនួសដែលលោកបញ្ជាក់ថា គឺមិនអាចធ្វើដាក់លោក សេង កដិកាដែលជាអតីតមេចាស់របស់ខ្លួនបែបហ្នឹងបានទេ ៕
ចែករំលែកព័តមាននេះ