ខេត្តកណ្ដាល ៖ សហព័ន្ធកីឡាប្រដាល់សាកលកម្ពុជា សហការជាមួយក្រសួងអប់រំយុវជន និងកីឡា កាលពីថ្ងៃទី២៧ វិច្ឆិកា បានរៀបចំការប្រកួតជ្រើសរើសជើងឯកថ្នាក់ជាតិជាលើកដំបូង រយៈពេល៤ថ្ងៃនៅឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ដោយមានអ្នកទស្សនាយ៉ាងច្រើនកុះករ ។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សាកលកម្ពុជា បានឱ្យដឹងថា សម្រាប់ការប្រកួតលើកនេះមានកីឡាករចូលរួមចំនួន៥៨នាក់មកពី៩រាជធានី-ខេត្ត និងក្រសួងចំនួន២គឺក្រសួងការពារជាតិ និងក្រសួងមហាផ្ទៃ។
សម្រាប់វិញ្ញាសាដែលត្រូវដាក់ឱ្យប្រកួតមាន៩ប្រភេទទម្ងន់គឺទម្ងន់៤៩គីឡូក្រាម ៥២គីឡូក្រាម ៥៧គីឡូក្រាម ៦០គីឡូក្រាម ៦៤គីឡូក្រាម ៦៩គីឡូក្រាម ៧១គីឡូក្រាម ៧៥គីឡូក្រាម និង៨១គីឡូក្រាម ។ លោកថា នេះគឺជាការប្រកួតមួយដែលសហព័ន្ធត្រូវការជាចាំបាច់ក្នុងការស្វែងរកអត្តពលិកឆ្នើមៗសម្រាប់យកទៅបណ្ដុះបណ្ដាលបន្ថែម ដើម្បីត្រៀមប្រកួតអន្តរជាតិនានា ជាពិសេសត្រៀមប្រកួតកីឡាស៊ីហ្គេមលើកទី៣២ដែលកម្ពុជាទទួលធ្វើជាម្ចាស់ផ្ទះនៅឆ្នាំ២០២៣ខាងមុខ ។ លោកបញ្ជាក់ថា សម្រាប់ការផ្លាស់ប្ដូរទីតាំងប្រកួតដែលកន្លងមកធ្លាប់តែធ្វើនៅភ្នំពេញហើយពេលនេះលើកមកធ្វើនៅក្នុងតំបន់អភិវឌ្ឍន៍ 7NG ស្ថិតនៅឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ក៏ព្រោះតែសហព័ន្ធមានបំណងចង់បំផុសដល់យុវជនឱ្យចូលរួមលេងកីឡាឱ្យបានច្រើន និងផ្ដល់ឱកាសឱ្យប្រជាពលរដ្ឋចូលរួមអភិវឌ្ឍន៍វិស័យកីឡាជាតិ ។
ជាងនេះបានចូលរួមចំណែកធ្វើឱ្យប្រជាពលរដ្ឋរកបានចំណូលបន្ថែមតាមរយៈការរៀបចំព្រឹត្តិការណ៍ផ្សេងៗតាមមូលដ្ឋានផ្ទាល់ទៀតផង ។
លោកឧកញ៉ាស្រី ចាន់ថន ប្រធានក្រុមហ៊ុន7NG ដែលជាអ្នកឧបត្ថម្ភកម្មវិធីប្រកួតប្រដាល់ជ្រើសរើសជើងឯកឆ្នាំនេះបានលើកឡើងថា ដោយសារតែការស្រឡាញ់ចូលចិត្តវិស័យកីឡាប្រដាល់ លោករីករាយក្នុងការចូលរួមគាំទ្រ ដើម្បីជំរុញឱ្យវិស័យកីឡាមួយនេះកាន់តែរីកចម្រើនថែមទៀត ។
លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា បានថ្លែងនូវការកោតសរសើរចំពោះការខិតខំប្រឹងប្រែងរបស់សហព័ន្ធកីឡាប្រដាល់សាកល ក៏ដូចជាសហព័ន្ធកីឡាប្រដាល់គុនខ្មែរ ដែលកំពុងតែបោះជំហានទៅមុខ ។ លោកសង្ឃឹមថា នៅឆ្នាំបន្តបន្ទាប់ សហព័ន្ធកីឡាប្រដាល់នឹងរៀបចំការប្រកួតជ្រើសរើសជើងឯកនៅតាមបណ្ដាខេត្តនានា ព្រមទាំងធ្វើការបំផុសឱ្យមានការចូលរួមគាំទ្រកាន់តែច្រើន ៕
ចែករំលែកព័តមាននេះ