រាជធានីភ្នំពេញ ៖ នេះលើកទីមួយហើយដែលអគ្គនាយកដ្ឋានពន្ធដារបានរៀបចំសិក្ខាសាលាស្ដីពី វិធាននិងនីតិវិធីនៃការដោះស្រាយបណ្ដឹងតវ៉ាពន្ធដារ ក្នុងគោលបំណងផ្សព្វផ្សាយឲ្យកាន់តែទូលំទូលាយអំពីសិទ្ធិនិងកាតព្វកិច្ចរបស់អ្នកជាប់ពន្ធ ពិសេសពាក់ព័ន្ធនឹងការដោះស្រាយបណ្តឹងតវ៉ាពន្ធដារ ដែលកន្លងទៅនេះ ក្រសួងសេដ្ឋកិច្ច និងហិរញ្ញវត្ថុ បានចេញនូវប្រកាសលេខ១៤៧០ សហវ.ប្រក ចុះថ្ងៃទី៦ ខែវិច្ឆិកា ឆ្នាំ២០១៥ ស្តីពី វិធាន និងនីតិវិធីនៃការដោះស្រាយបណ្តឹងតវ៉ាពន្ធដារ ។
ជាមួយគ្នានេះ អគ្គនាយកដ្ឋានពន្ធដារ ក៏បានចេញនូវសេចក្តីណែនាំលេខ៧៣៧៤ អពដ ចុះថ្ងៃទី៤ ខែឧសភា ឆ្នាំ២០១៧ ស្តីពី សិទ្ធិនិងកាតព្វកិច្ចរបស់អ្នកជាប់ពន្ធ ឬភ្នាក់ងារកាត់ទុក នៅក្នុងការដោះស្រាយពាក្យបណ្តឹងតវ៉ាពន្ធដារ នៅអគ្គនាយកដ្ឋានពន្ធដារផងដែរ ។
មានប្រសាសន៍ក្នុងសិក្ខាសាលានេះដែលធ្វើឡើងនៅសណ្ឋាគារសូហ្វីតែលភ្នំពេញ ភូគីត្រា កាលពីព្រឹកថ្ងៃទី២៨ ខែវិច្ឆិកា ម្សិលមិញ លោកបណ្ឌិត កែន សម្បត្តិ អគ្គនាយករងនៃអគ្គនាយកដ្ឋានពន្ធដារ បានថ្លែងថា ទន្ទឹមនឹងការលុបចោលនូវរបបម៉ៅការ អ្នកជាប់ពន្ធតាមរបបស្វ័យប្រកាសទាំងអស់ ត្រូវគោរពឲ្យបានខ្ជាប់ខ្ជួននូវបទប្បញ្ញត្តិស្តីពីពន្ធដារ។ ស្របតាមកម្មវិធីកំណែទម្រង់របស់រាជរដ្ឋាភិបាល ក្រសួងសេដ្ឋកិច្ច និងហិរញ្ញវត្ថុ ក៏ដូចជាអគ្គនាយកដ្ឋានពន្ធដារ បានខិតខំធ្វើការផ្សព្វផ្សាយអំពីសិទ្ធិ និងកាតព្វកិច្ចរបស់អ្នកជាប់ពន្ធក្នុងរបបស្វ័យប្រកាសឲ្យបានទូលំទូលាយដល់អ្នកជាប់ពន្ធគ្រប់រូប ដើម្បីជ្រួតជ្រាបអំពីបញ្ហាពន្ធដារ ។
លោកបណ្ឌិតបន្ដថា ៖« ការរឹតបន្តឹងនេះ ក្នុងគោលបំណងរក្សាឲ្យបាននូវតម្លាភាព និងសុក្រឹត្យភាពនៃការប្រមូលចំណូលពន្ធ ក៏ដូចជាបានផ្សព្វផ្សាយឲ្យទូលំទូលាយដូចគ្នានូវសិទ្ធិ និងកាតព្វកិច្ចរបស់អ្នកជាប់ពន្ធក្នុងបណ្តឹងតវ៉ា នៅអគ្គនាយកដ្ឋានពន្ធដារ ពាក់ព័ន្ធនឹងសេចក្តីសម្រេចនានារបស់អគ្គនាយកដ្ឋានពន្ធដារ និងអង្គភាពក្រោមឱវាទ » ។
ក្នុងឱកាសនោះដែរ លោក ហេង សុខណាង អគ្គនាយករងនៃអគ្គនាយកដ្ឋានពន្ធដារ បានមានប្រសាសន៍អំពីការយកចិត្តដាក់របស់អគ្គនាយកដ្ឋានពន្ធដារក្នុងការបង្កើននូវប្រសិទ្ធភាពបង្ខិតសេវាឲ្យគៀកអ្នកជាប់ពន្ធ ដែលជាកត្តាយ៉ាងសំខាន់ក្នុងការលើកកម្ពស់ការយល់ដឹងអំពីវិស័យពន្ធដារ ក៏ដូចជាកាតព្វកិច្ចដើម្បីជំរុញអនុលោមភាពសារពើពន្ធ និងការប្រមូលចំណូលពន្ធ ។
លោកមានក្តីសង្ឃឹម និងភាពជឿជាក់យ៉ាងមុតមាំថា ៖« អ្នកជាប់ពន្ធគ្រប់រូប នឹងបានយល់ដឹងបន្ថែមអំពីសិទ្ធិ និងកាតព្វកិច្ចរបស់ខ្លួនក្នុងដំណើរតវ៉ានៅអគ្គនាយកដ្ឋានពន្ធដារ » ៕
ចែករំលែកព័តមាននេះ