រាជធានីភ្នំពេញ ៖ ការពង្រឹងធនធានមនុស្ស និងភាពម្ចាស់ការក្នុងការងារអភិវឌ្ឍសង្គម-សេដ្ឋកិច្ចរបស់ខ្លួន គឺជាការចូលរួមចំណែកជំរុញកិច្ចខិតខំប្រឹងប្រែងរបស់កម្ពុជា ក្នុងការប្រែក្លាយខ្លួន ទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ។ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក…
រាជធានីភ្នំពេញ ៖ ការពង្រឹងធនធានមនុស្ស និងភាពម្ចាស់ការក្នុងការងារអភិវឌ្ឍសង្គម-សេដ្ឋកិច្ចរបស់ខ្លួន គឺជាការចូលរួមចំណែកជំរុញកិច្ចខិតខំប្រឹងប្រែងរបស់កម្ពុជា ក្នុងការប្រែក្លាយខ្លួន ទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក ហ៊ាន សាហ៊ីប បានលើកឡើងនៅក្នុងវគ្គបណ្តុះបណ្តាល ស្តីពីភាពជាដៃគូរវាងរដ្ឋ និងវិស័យឯកជន កាលពីថ្ងៃទី២៧ វិច្ឆិកា ថា កម្ពុជាបានឆ្លងផុតពីប្រទេសក្រីក្រ មកជាប្រទេសមានប្រាក់ចំណូលមធ្យមកម្រិតទាប ក្នុងនោះកម្ពុជាកំពុងបន្តកិច្ចខិតខំប្រឹងប្រែងប្រែក្លាយខ្លួន ទៅជាប្រទេសមានប្រាក់ចំណូលមធ្យមកម្រិតខ្ពស់។ នេះជារបត់ថ្មីមួយទៀត ដែលកម្ពុជាត្រូវពង្រឹងកិច្ចម្ចាស់ការក្នុងការងារអភិវឌ្ឍសង្គម-សេដ្ឋកិច្ច ជាពិសេស ការពង្រីកផ្នែកចំណេះដឹងឲ្យច្រើនសម្បូរបែប ។
លោកបន្តថា ៖« ក្នុងស្មារតីនេះ កម្ពុជាបានរៀបចំឯកសារគោលនយោបាយ ស្តីពីការអភិវឌ្ឍយន្តការភាពជាដៃគូរវាងរដ្ឋ និងវិស័យឯកជន សម្រាប់គ្រប់គ្រងគម្រោងវិនិយោគសាធារណៈ ២០១៦-២០២០ ។ វាឆ្លុះបញ្ចាំងឱ្យឃើញពីការប្តេជ្ញាចិត្ត និងការយកចិត្តទុកដាក់ខ្ពស់ ក្នុងការបន្តអភិវឌ្ឍន៍វិស័យហេដ្ឋារចនាសម្ព័ន្ធសាធារណៈ សំដៅរួមចំណែកទ្រទ្រង់ចីរភាពនៃកំណើនសេដ្ឋកិច្ចរយៈពេលវែង និងបង្កើនសមត្ថភាពប្រកួតប្រជែងរបស់កម្ពុជា ទាំងក្នុងតំបន់ និងសកលលោក » ។
លោក ហ៊ាន សាហ៊ីប បន្ថែមថា ៖« ការពង្រីកចំណេះដឹងនេះដែរ កម្ពុជាកំពុងមានសេចក្តីត្រូវការឈ្វេងយល់បន្ថែមនូវឧត្តមនុវត្តន៍ និងការផ្លាស់ប្តូរបទពិសោធន៍ជាអន្តរជាតិ ក្នុងការអនុវត្តលើភាពជាដៃគូរវាងរដ្ឋ និងវិស័យឯកជន ជាពិសេស ក្នុងវិស័យហេដ្ឋារចនាសម្ព័ន្ធផ្លូវ ស្ពាន និងថាមពលជាដើម សម្រាប់ចូលរួមចំណែកជួយជំរុញដល់ការអភិវឌ្ឍសង្គម-សេដ្ឋកិច្ចកម្ពុជា » ។
ប្រទេសមានប្រាក់ចំណូលមធ្យមកម្រិតខ្ពស់ សំដៅដល់ប្រទេសដែលប្រជាពលរដ្ឋម្នាក់ៗមានប្រាក់ចំណូលចាប់ពីជាង៤.៨០០ដុល្លារ ដល់១ម៉ឺន២ពាន់ដុល្លារអាមេរិកក្នុង១ឆ្នាំ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ផ្អែកតាមសូចនាករសេដ្ឋកិច្ចកម្ពុជា អាចឲ្យយើងព្យាករថា រាជរដ្ឋាភិបាលកម្ពុជានឹងសម្រេចបានក្នុងការនាំកម្ពុជា ទៅកាន់ប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ។ លោកបន្តថា ការព្យាករនេះ ផ្អែកលើមូលដ្ឋានវិទ្យាសាស្ត្រច្បាស់លាស់ មិនមែនចេះតែលើកឡើងទេ ហើយលោកជឿជាក់លើសមត្ថភាពធនធានមនុស្សរបស់កម្ពុជា ដែលបាននិងកំពុងធ្វើការងារនេះ ។
លោកបន្តថា ៖« ផ្អែកលើមូលដ្ឋាននៃសេដ្ឋកិច្ច និងកំណើនសេដ្ឋកិច្ចដែលកម្ពុជាសម្រេចបាន កម្ពុជាពិតណាស់នឹងសម្រេចបាននូវគោលដៅរបស់ខ្លួននៅឆ្នាំ២០៣០ ក្នុងនាមជាប្រទេសមានប្រាក់ចំណូលមធ្យមកម្រិតខ្ពស់ » ៕
ចែករំលែកព័តមាននេះ