រាជធានីភ្នំពេញ ៖ យោងតាមមន្ត្រីជាន់ខ្ពស់នៃក្រសួងរ៉ែ និងថាមពលថា បច្ចុប្បន្ន កម្ពុជាមានសមត្ថភាពកាន់តែខ្លាំងឡើងក្នុងការផលិត និងផ្គត់ផ្គង់ថាមពលអគ្គិសនីដល់បណ្ដាសហគ្រាស និងប្រជាពលរដ្ឋទូទាំងប្រទេស ។ ថ្លែងនៅក្នុងសន្និសីទមួយជាមួយបណ្ដាប្រទេស…
រាជធានីភ្នំពេញ ៖ យោងតាមមន្ត្រីជាន់ខ្ពស់នៃក្រសួងរ៉ែ និងថាមពលថា បច្ចុប្បន្ន កម្ពុជាមានសមត្ថភាពកាន់តែខ្លាំងឡើងក្នុងការផលិត និងផ្គត់ផ្គង់ថាមពលអគ្គិសនីដល់បណ្ដាសហគ្រាស និងប្រជាពលរដ្ឋទូទាំងប្រទេស ។
ថ្លែងនៅក្នុងសន្និសីទមួយជាមួយបណ្ដាប្រទេស CLMV នៅសណ្ឋាគារកាំបូឌីយ៉ាណា កាលពីថ្ងៃទី២៨ វិច្ឆិកា លោក អុិត ប្រាំង រដ្ឋលេខាធិការក្រសួងរ៉ែ និងថាមពល បានលើកឡើងថា ពាក់ព័ន្ធនឹងការធ្វើពាណិជ្ជកម្មក្នុងវិស័យអគ្គិសនី មិនអាចកាត់ផ្ដាច់ពីគ្នាបានទេ ទោះបីជាកម្ពុជាផលិតបានថាមពលអគ្គិសនីគ្រប់គ្រាន់ក៏ដោយ គឺនៅតែមានទំនាក់ទំនងនាំចូល និងនាំចេញវិញ ។
លោកថា ៖« បើសិនជាយើងគ្រប់គ្រាន់សម្រាប់ការផ្គត់ផ្គង់ក្នុងប្រទេស យើងនឹងនាំចេញវិញនៅរដូវណាដែលសល់ភ្លើង ។ ជាក់ស្ដែង នៅរដូវវស្សា កម្ពុជាមានភ្លើងពេញបន្ទុក ដូចនេះកម្ពុជាអាចនាំចេញទៅប្រទេសជិតខាងបាន បើសិនជាប្រទេសទាំងនោះត្រូវការ ហើយនៅពេលយើងខ្វះ យើងនាំពីគេមកវិញដែរ តែសម្រាប់បច្ចុប្បន្ននេះ ដោយសារតែអគ្គិសនីមានតម្លៃខ្ពស់ជាងប្រទេសជិតខាង យើងមិនទាន់មានការនាំចេញទៅក្រៅនៅឡើយទេ » ។
លោកបន្តថា អ្វីដែលពិបាកសម្រាប់កម្ពុជានាំចេញអគ្គិសនីទៅប្រទេសជិតខាងនោះ គឺនៅពេលដែលកម្ពុជាសម្បូរថាមពល ប្រទេសជិតខាងក៏សម្បូរដែរ ព្រោះប្រភពថាមពលរវាងប្រទេសក្នុងតំបន់ CLMV ភាគច្រើនបានមកពីវារីអគ្គិសនី ហើយរដូវវស្សារវាងប្រទេសទាំងនោះ នៅក្នុងអំឡុងពេលតែមួយដូចគ្នាទៀត ។
លោកថ្លែងថា ៖« កាលពីមុន យើងនាំចូលភ្លើងពីប្រទេសជិតខាងច្រើន តែបន្ទាប់ពីយើងអាចផលិតបានខ្លួនឯង និងបន្ទាប់ពីវារីអគ្គិសនីមួយចំនួនត្រូវបានដាក់ដំណើរការ យើងបានកាត់បន្ថយបន្តិចម្ដងៗ ។ សព្វថ្ងៃនេះ យើងបាននាំចូលពីប្រទេសវៀតណាមប្រមាណ១៥%, ថៃប្រមាណ៤,៥ទៅ៥% និងឡាវប្រមាណ០,៥%នៃតម្រូវការ ក៏ប៉ុន្តែការនាំចូលនេះ គឺនៅពេលដែលយើងខ្វះខាតប៉ុណ្ណោះ ពោលគឺនៅអំឡុងរដូវប្រាំង តែបើនៅរដូវវស្សាវិញ យើងមានភ្លើងគ្រប់គ្រាន់សម្រាប់ផ្គត់ផ្គង់ » ។
លោកបន្ថែមថា ដើម្បីសម្រេចឲ្យបានទៅតាមយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការតបណ្ដាញជាតិឲ្យបានគ្រប់ភូមិក្នុងឆ្នាំ២០២០ និងយ៉ាងហោចណាស់ ៧០%នៃផ្ទះប្រជាពលរដ្ឋទូទាំងប្រទេសទទួលបានសេវាអគ្គិសនីប្រើប្រាស់ បច្ចុប្បន្ន ភូមិទូទាំងប្រទេសប្រមាណ៨០%បានភ្ជាប់ពីបណ្ដាញអគ្គិសនីរួចហើយ ហើយនៅក្នុងភូមិដែលភ្ជាប់ទាំងអស់មាន៨០%គឺភ្ជាប់ពីបណ្ដាញជាតិ ដែលមានគុណភាព និងតម្លៃប្រហាក់ប្រហែលនឹងតម្លៃអគ្គិសនីនៅរាជធានីភ្នំពេញដែរ ។
លោកបញ្ជាក់ថា កម្ពុជាបច្ចុប្បន្ននេះ នៅមានសក្ដានុពលខ្ពស់លើការវិនិយោគវិស័យអគ្គិសនី ទាំងវារីអគ្គិសនីថាមពលកកើតឡើងវិញ ថាមពលសូឡា និងថាមពលដើរដោយកម្លាំងខ្យល់ ។ សព្វថ្ងៃនេះ ក៏មានក្រុមហ៊ុនវិនិយោគជាច្រើនបាននិងកំពុងសិក្សានៅតំបន់នានាដែលជាប្រភពថាមពលអគ្គិសនី ដើម្បីបង្កើតរោងចក្រថាមពលអគ្គិសនីសម្រាប់ផ្គត់ផ្គង់បន្ថែមផងដែរ។ លោកថា ៖« នៅឆ្នាំនេះ យើងប្រើប្រាស់ថាមពលអគ្គិសនីអស់ប្រមាណជិត២.០០០មេហ្គាវ៉ាត់ ហើយថាមពលទាំងអស់នេះបានមកពីប្រភពវារីអគ្គិសនីក្នុងស្រុក រោងចក្រធ្យូងថ្ម និងនាំចូលពីប្រទេសជិតខាងខ្លះៗ » ។
លោក កៅ គឹមហួន ប្រតិភូអមនាយករដ្ឋមន្ត្រី ក៏បានលើកឡើងកន្លងមកថា វិស័យថាមពលអគ្គិសនី គឺមានអាទិភាពសំខាន់មួយ សម្រាប់វិនិយោគិនវិនិយោគនៅក្នុងប្រទេសកម្ពុជា ហើយកម្ពុជាក៏បានលើកទឹកចិត្តដល់ការវិនិយោគនានានៅក្នុងប្រទេស ដើម្បីទទួលបានថាមពលអគ្គិសនីសម្រាប់ផ្គត់ផ្គង់បន្ថែម ។
លោក ពៅ សុធារក្ស នាយកប្រតិបត្តិនៃវិទ្យាស្ថានកម្ពុជា សម្រាប់សហប្រតិបត្តិការ និងសន្តិភាព បានឲ្យដឹងថា នៅក្នុងបណ្តាប្រទេស CLMV យើងបានឃើញពីតម្រូវការកើនឡើងគួរឱ្យកត់សម្គាល់សម្រាប់ថាមពលអគ្គិសនី ដែលតម្រូវឱ្យមានការកសាងបន្ថែមទៀតនៅមុនឆ្នាំ ២០៣០ ។ ឧទាហរណ៍ ប្រទេសវៀតណាម នឹងបង្កើនការសាងសង់ទ្វេដងដើម្បីផ្គត់ផ្គង់, កម្ពុជា និងមីយ៉ាន់ម៉ា មានតម្រូវការប្រចាំឆ្នាំទ្វេដងសម្រាប់ផ្គត់ផ្គង់ក្នុងស្រុក ។ ចំណែកឡាវរំពឹងបន្ថែមលើការសាងសង់ ដោយផ្គត់ផ្គង់ក្នុងស្រុកផង និងនាំចេញទៅប្រទេសជិតខាងផង ។ ទាំងនេះ គឺត្រូវឲ្យមានការសាងសង់បន្ថែមទៀតនូវវារីអគ្គិសនី ហើយទន្លេមេគង្គ គឺជាប្រភពវារីអគ្គិសនីសំខាន់មួយ ដែលប្រទេសទាំងនោះកំពុងសម្លឹងឃើញ ។
នៅថ្ងៃទី២៨ វិច្ឆិកា ម្សិលមិញ ក៏មានកិច្ចពិភាក្សារវាង អាជ្ញាធរអគ្គិសនីកម្ពុជា និងភាគីធនាគារពិភពលោកផងដែរ ។
នៅក្នុងជំនួបនោះ លោកទី នរិន្ទ ប្រធានអាជ្ញាធរអគ្គិសនីកម្ពុជា និងលោកស្រីJulia M. Fraser នាយកទទួលបន្ទុកផ្នែកថាមពលប្រចាំតំបន់អាស៊ី និងប៉ាស៊ីហ្វិករបស់ធនាគារពិភពលោក បានផ្លាស់ប្តូរយោបល់លើលទ្ធផលនៃការសិក្សារបស់ធនាគារពិភពលោកអំពីការអភិវឌ្ឍវិស័យអគ្គិសនីនៅកម្ពុជា ។
ធនាគារពិភពលោកបានមើលឃើញថា ការអភិវឌ្ឍអគ្គិសនីភាវូបនីយកម្មនៅកម្ពុជា មានការរីកចម្រើនយ៉ាងលឿន ចេញពី១៤%នៃលំនៅឋានទទួលការផ្គត់ផ្គង់នៅ១០ឆ្នាំមុន មក៧០%នៅពេលបច្ចុប្បន្ន ។
ធនាគារពិភពលោកក៏បានលើកឡើងនូវការប្រឈមខ្លះៗដែលក្រុមសិក្សាបានពិនិត្យឃើញ ដូចជា បញ្ហាស្ថិរភាព និងគុណភាពនៃការផ្គត់ផ្គងដែលធ្លាក់ចុះនៅតំបន់ខ្លះនៃការផ្គត់ផ្គង់ ដែលកម្ពុជាត្រូវបន្តការអភិវឌ្ឍជាបន្តទៀត ។
ភាគីធនាគារពិភពលោកបានជម្រាប់ជូនប្រធានអាជ្ញាធរអគ្គិសនីកម្ពុជាថា ៖« ប្រសិនបើមានការស្នើសុំពីភាគីកម្ពុជា ធនាគារពិភពលោកសប្បាយរីករាយនឹងបន្តចូលរួមជួយធ្វើការសិក្សាបន្ថែមទៀតនូវអ្វីដែលចាំបាច់ដែលវិស័យអគ្គិសនីកម្ពុជាត្រូវធ្វើដើម្បីឈានទៅរកគោលដៅវិស័យអគ្គិសនីឆ្នាំ២០២០របស់រាជរដ្ឋាភិបាល » ៕
ចែករំលែកព័តមាននេះ