រាជធានីភ្នំពេញ ៖ ក្រុមការងារវិស័យឯកជន ដែលជាប្រតិបត្តិករទេសចរណ៍បានលើកឡើងស្រដៀងគ្នាថា ភាពតានតឹងនៃនយោបាយនៅក្នុងប្រទេសនាពេលបច្ចុប្បន្ននេះ កំពុងតែប៉ះពាល់ដល់លំហូរភ្ញៀវទេសចរអន្តរជាតិមកទស្សនាកម្ពុជា ។ ប្រធានសហព័ន្ធទេសចរណ៍កម្ពុជា លោក ធួន…
រាជធានីភ្នំពេញ ៖ ក្រុមការងារវិស័យឯកជន ដែលជាប្រតិបត្តិករទេសចរណ៍បានលើកឡើងស្រដៀងគ្នាថា ភាពតានតឹងនៃនយោបាយនៅក្នុងប្រទេសនាពេលបច្ចុប្បន្ននេះ កំពុងតែប៉ះពាល់ដល់លំហូរភ្ញៀវទេសចរអន្តរជាតិមកទស្សនាកម្ពុជា ។
ប្រធានសហព័ន្ធទេសចរណ៍កម្ពុជា លោក ធួន ស៊ីណាន បានថ្លែងនាព្រឹកថ្ងៃទី២៧ វិច្ឆិកាថា ភាពតានតឹងនៃនយោបាយនាពេលថ្មីៗនេះ បាននិងកំពុងរងផលប៉ះពាល់ដល់លំហូរភ្ញៀវ ទេសចរអន្តរជាតិមកទស្សនាកម្ពុជា ពិសេសភ្ញៀវមកពីសហគមន៍អឺរ៉ុប និងសហរដ្ឋអាមេរិក ដែលពួកគេបានលុបកញ្ចប់ទស្សនកិច្ចមកកម្ពុជា សម្រាប់ឆ្នាំ២០១៨ខាងមុខយ៉ាងច្រើន ។
លោកបន្តថា ប៉ុន្តែបើគិតពីដើមឆ្នាំ រហូតមកដល់ដំណាច់ត្រីមាសទី៣ឆ្នាំនេះ ចំនួនភ្ញៀវទេសចរកើនឡើងជាធម្មតា ប៉ុន្តែមួយរយៈចុងក្រោយនេះ លំហូរទេសចរកំពុងរងផលប៉ះពាល់ ។
លោកបន្តថា ៖« និយាយដោយស្មោះត្រង់ គឺជាការពិត ដែលកញ្ចប់ទស្សនកិច្ចជាច្រើនបានលុបចោល ដោយសារភាពតានតឹងនយោបាយ ហើយបើនិយាយថា មិនប៉ះពាល់ វាដូចជាការកុហកខ្លួនឯងអីចឹង » ។
យោងតាមទិន្នន័យពីក្រសួងទេសចរណ៍បានឲ្យដឹងថា គិតត្រឹមដំណាច់ត្រីមាសទី៣ឆ្នាំនេះ លំហូរភ្ញៀវទេសចរមកទស្សនាកម្ពុជា មានចំនួនជិត៤លាននាក់ កើនឡើង១១,៥% ធៀបនឹងរយៈពេលដូចគ្នាកាលពីឆ្នាំមុន ។
ទោះជាយ៉ាងណា អ្នកក្នុងវិស័យឯកជននានាបានចំអកឲ្យតួលេខនេះថា ជាតួលេខជប់ មិនមែនជាតួលេខពិតប្រាកដឡើយ ។
អតីតប្រធានសមាគមទីភ្នាក់ងារទេសចរណ៍កម្ពុជាមួយរូប ដែលបានបដិសេធមិនបញ្ចេញឈ្មោះថ្លែងថា លំហូរភ្ញៀវទេសចរកំពុងរងផលប៉ះពាល់ពិតប្រាកដ ដោយសារមានការលុបកញ្ចប់ទស្សនកិច្ចជាច្រើនពីប្រទេសជប៉ុន សហគមន៍អឺរ៉ុប និងភ្ញៀវទេសចរមកពីអាមេរិក ។
លោកបន្តថា ប្រទេសជិតខាងមួយចំនួនមិនដែលល្អជាមួយយើងទេ ពួកគេតែងតែយករូបភាពមិនល្អពីកម្ពុជា ដើម្បីទៅផ្សព្វផ្សាយបង្កាច់បង្ខូចកេរ្តិ៍ឈ្មោះកម្ពុជា ធ្វើឲ្យភ្ញៀវទេសចរអន្តរជាតិភ័យខ្លាចក្នុងការមកទស្សនាកម្សាន្ដ ។
កាលពីឆ្នាំមុន ប្រទេសវៀតណាមទទួលបានភ្ញៀវទេសចរអន្តរជាតិជាង៧លាននាក់ និងប្រទេសថៃទទួលភ្ញៀវអន្តរជាតិជាង៣២លាននាក់ ខណៈកម្ពុជាទទួលបានទេសចរអន្តរជាតិជាង៥លាននាក់ ក្នុងកំណើន៥% ក្នុងនោះទេសចរចិនមានចំនួនជាង៨៣ម៉ឺននាក់។
លោក ឡៅ ហេង អគ្គនាយកសណ្ឋាគារអូឈើទាល ខេត្តព្រះសីហនុ និងជាប្រតិបត្តិករទេសចរណ៍ បានថ្លែងថា លំហូរភ្ញៀវទេសចរមកពីប្រទេសចិន និងនៅតាមបណ្តាប្រទេសក្នុងតំបន់អាស៊ី ជាភ្ញៀវមិនចាយប្រាក់ច្រើនទេ ហើយភ្ញៀវទេសចរមកពីប្រទេសទាំងនោះនៅរក្សាបានកំណើន ប៉ុន្តែភ្ញៀវមកពីអឺរ៉ុប និងអាមេរិក ដែលជាភ្ញៀវចំណាយប្រាក់ច្រើន បានកាត់បន្ថយការធ្វើដំណើរមកទស្សនាកម្ពុជា ដោយមិនដឹងមូលហេតុអ្វីទេ ប៉ុន្តែលោកបង្ហើបថា ភាពតានតឹងនៃនយោបាយនាពេលថ្មីៗ ពិតជាផ្នែកមួយនៃបញ្ហានេះហើយ ៕
ចែករំលែកព័តមាននេះ