រាជធានីភ្នំពេញ ៖ គណៈបញ្ជាការឯកភាពខណ្ឌសែនសុខ បានដាក់គោលដៅឆែកឆេរត្រួតពិនិត្យអាវុធជាតិផ្ទុះដើម្បីទប់ស្កាត់បទល្មើសក្នុងមូលដ្ឋាន ហើយបានធ្វើការឃាត់ខ្លួនជនសង្ស័យម្នាក់ដកហូតឧបករណ៍សម្រាប់កាច់សោកម៉ូតូ និងថ្នាំញៀនមួយកញ្ចប់តូច។ ហេតុការណ៍នេះប្រព្រឹត្តឡើងកាលពីវេលាម៉ោង៧ និង៣០នាទីយប់ ថ្ងៃទី២៨ ខែវិច្ឆិកា…
រាជធានីភ្នំពេញ ៖ គណៈបញ្ជាការឯកភាពខណ្ឌសែនសុខ បានដាក់គោលដៅឆែកឆេរត្រួតពិនិត្យអាវុធជាតិផ្ទុះដើម្បីទប់ស្កាត់បទល្មើសក្នុងមូលដ្ឋាន ហើយបានធ្វើការឃាត់ខ្លួនជនសង្ស័យម្នាក់ដកហូតឧបករណ៍សម្រាប់កាច់សោកម៉ូតូ និងថ្នាំញៀនមួយកញ្ចប់តូច។ ហេតុការណ៍នេះប្រព្រឹត្តឡើងកាលពីវេលាម៉ោង៧ និង៣០នាទីយប់ ថ្ងៃទី២៨ ខែវិច្ឆិកា ឆ្នាំ២០១៧ នៅត្រង់ចំណុចខាងមុខប៉ុស្តិ៍នគរបាលរដ្ឋបាលទឹកថ្លា តាមបណ្តោយផ្លូវហាណូយ ស្ថិតក្នុងសង្កាត់ទឹកថ្លា ខណ្ឌសែនសុខ។ សមត្ថកិច្ចបានឲ្យដឹងថា ជនសង្ស័យឈ្មោះ គង់ សាវី ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅភូមិអណ្តូង សង្កាត់គោករកា ខណ្ឌព្រែកព្នៅ មានស្រុកកំណើតនៅឃុំពុតសរ ស្រុកទន្លេបាទី ខេត្តតាកែវ។
ប្រតិបត្តិការនេះដឹកនាំដោយលោក ហោ វាសនា អភិបាលរងខណ្ឌសែនសុខ តំណាងឲ្យលោក ម៉ូវ ម៉ានិត អភិបាលខណ្ឌ និងកម្លាំងកងរាជអាវុហត្ថ ព្រមទាំងសមត្ថកិច្ចពាក់ព័ន្ធជាច្រើននាក់ទៀត។ លោក ហៅ វាសនា អភិបាលរងខណ្ឌសែនសុខ បានមានប្រសាន៍ថា ការដាក់គោលដៅត្រួតពិនិត្យអាវុធជាតិផ្ទុះនេះគឺគណៈបញ្ជាការឯកភាពខណ្ឌ ដែលដឹកនាំដោយលោក ម៉ូវ ម៉ានិត ជាប្រធានបានដាក់បទបញ្ជាអោយដាក់គោលដៅត្រួតពិនិត្យជាប្រចាំដើម្បីទប់ស្កាត់បទល្មើសដែលអាចកើតមានឡើងក្នុងមូលដ្ឋាន។ ក្នុងការដាក់គោលដៅឆែកឆេរត្រួតពិនិត្យអាវុធជាតិផ្ទុះខាងលើកម្លាំងគណៈបញ្ជាការឯកភាពខណ្ឌបានធ្វើការឃាត់ខ្លួនជនសង្ស័យ បន្ទាប់ពីធ្វើការឆែកឆេររកឃើញមានលាក់ទុកថ្នាំញឿនប្រភេទក្រាមសថ្លាចំនួនមួយកញ្ចប់តូចនៅលើខ្លួន។
ហើយខណៈនោះក៏ប្រទះឃើញជនសង្ស័យខាងជិះម៉ូតូឌុបមួយគ្រឿងម៉ាក ហុងដាឌ្រីម ស៊េរីឆ្នាំ២០១១ ពណ៌ខ្មៅ ពាក់ស្លាកលេខ ស្វាយរៀង 1A-7066 ដែលបើកបរដោយបុរសវ័យប្រហែល៤០ឆ្នាំម្នាក់ជាអ្នករត់ម៉ូតូឌុប បានជិះចូលមកក្នុងគោលដៅត្រួតពិនិត្យអាវុធជាតិផ្ទះដោយក្នុងលក្ខណៈសង្ស័យ កម្លាំងគណៈបញ្ជាការឯកភាពខណ្ឌបានកាត់ត្រួតពិនិត្យឆែកឆេរក៏រកឃើញ សោសម្រាប់កាច់កម៉ូតូមួយឈុត និងថ្នាំញៀនមួយកញ្ចប់តូចនៅលើខ្លួនជនសង្ស័យខាងលើ រួចក៏ធ្វើការឃាត់ខ្លួនភ្លាមៗតែម្តង។
បច្ចុប្បន្នជនសង្ស័យខាងលើរួម និងវត្ថុតាងត្រូវបានកម្លាំងសមត្ថកិច្ចប៉ុស្តិ៍នគរបាលរដ្ឋបាលទឹកថ្លាកសាងសំណុំរឿងបញ្ជូនទៅអធិការដ្ឋាននគរបាលខណ្ឌសែនសុខ ដើម្បីបញ្ជូនបន្តទៅតុលាការរង់ចាំធ្វើការចាត់ការទៅតាមនីតិវិធី៕
ចែករំលែកព័តមាននេះ