ខេត្តបាត់ដំបង ៖ កិច្ចប្រជុំបូកសរុបការងារធានាប្រគល់ត្រីសាច់ និងគ្រឿងទេសគ្រប់ប្រភេទដល់កងកម្លាំងកងទ័ព១៨អង្គភាពចំណុះយោធភូមិភាគទី៥ នៅក្នុងការិយាល័យទី៤ យោធភូមិភាគ ដោយមានការចូលរួមពីលោកឧត្តមសេនីយ៍ទោ អ៊ុង សុវណ្ណ នាយករង នាយកដ្ឋានផ្គត់ផ្គង់ស្បៀងក្រសួងការពារជាតិទទួលទិសបន្ទាយមានជ័យ លោកឧត្តមសេនីយ៍ទោ ជុំ សុឃឿន នាយករង នាយកដ្ឋានផ្គត់ផ្គង់ក្រសួងការពារជាតិ ប្រចាំបាត់ដំបង ពោធិសាត់ និងប៉ៃលិន លោកឧត្តមសេនីយ៍ទោ ខាត់ ជន់ មេបញ្ជាការរងយោធភូមិភាគទី៥ លោកឧត្តមសេនីយ៍ត្រី ដួង សុខសារិន នាយការិយាល័យទី៤ យោធភូមិភាគទី៥ ដោយមានការចូលរួមពីនាយទាហានទទួលបន្ទុកស្បៀងគ្រប់កងឯកភាពចំណុះចំនួន៤០នាក់បានមកចូលរួម។
បន្ទាប់ពីបានរាយការណ៍ពីគ្រប់តាមបណ្តាកងឯកភាពចំណុះយោធភូមិភាគទី៥រួចមក លោកឧត្តមសេនីយត្រី ដួង សុខសារិន បានប្រកាសបន្ថែមនូវការពង្រឹងធានាបន្ថែមទៀតមិនឲ្យមានការខ្វះខាតដល់កងកម្លាំងដែលកំពុងឈរជើងគ្រប់កងឯកភាពជួបការខ្វះខាតផ្នែកជីវភាពឡើយ។ សំខាន់កងទ័ពនៅជួរមុខតាមបណ្ដោយខ្សែបន្ទាត់នៃព្រំដែន។ បន្ទាប់មកលោកឧត្តមសេនីយទោ ជុំ សុឃឿន និងលោកឧត្តមសេនីយ៍ទោ អ៊ុង សុវណ្ណ អគ្គនាយករង នាយកដ្ឋានផ្គត់ផ្គង់ក្រសួងការពារជាតិ បានផ្តាំផ្ញើថា ឆ្នាំនេះជាឆ្នាំទី៦ ឈានចូលឆ្នាំទី៧ ដែលថវិការបស់សម្តេចតេជោ ហ៊ុន សែន ជានាយករដ្ឋមន្ត្រី បានជួយគ្រប់កងកម្លាំងទាំងមូលក្នុងម្នាក់៤២០០ក្នុង១ថ្ងៃបន្ថែមពីលើថវិកាយោធភូមិភាគទី៥ចំនួន៣០០០រៀល សរុបរួមក្នុងម្នាក់ទទួលបាន៧២០០រៀល ដល់កងទ័ពទាំងអស់អាចទទួលបានដោយគ្មានការខ្វះខាតអ្វីឡើយផ្នែកជីវភាពប្រចាំថ្ងៃ ហើយសូមគ្រប់កងឯកភាពទាំងអស់ជួយពិនិត្យបន្ថែមទៀតក្នុងឆ្នាំទី៧(២០១៨)ខាងមុខនេះកុំឲ្យបងប្អូនកងទ័ពយើងមានការជួបខ្វះខាតអ្វីទៀតឡើយ។
លោកឧត្តមសេនីយ៍ទោ ខាត់ ជន់ មេបញ្ជាការរងយោធភូមិភាគទី៥បានថ្លែងថា យើងមិនត្រឹមតែធានាផ្គត់ផ្គង់ផ្នែកជីវភាពប៉ុណ្ណោះទេ គឺបានកសាងជំរុំជម្រក ផ្ទះបាយបានចំនួន៣៥៤ខ្នងក្នុងយោធភូមិភាគ និងពង្រឹងបន្ថែមធានាការប្រកបមុខរបរដាំដុះវិស័យកសិកម្ម ចិញ្ចឹមសត្វក្នុងអង្គភាពបន្ថែមទៀតដែលអង្គភាពខ្លះអាចសល់លក់បាននៅតាមទីផ្សារបន្ថែមទៀតផង។ លោកបានបន្តទៀតថា យោធភូមិភាគទី៥កំពុងរៀបចំបន្ថែមហ្វឹកហ្វឺនទ័ពថ្មីចំនួន១២៨នាក់ ដោយបានផ្តល់សម្លៀកបំពាក់ និងគ្រឿងបរិក្ខាកងទ័ពចូលក្នុងសាលាពលទាហាននៅថ្ងៃទី១ ខែធ្នូ ឆ្នាំ២០១៧ខាងមុខនេះតទៅ ដោយហ្វឹកហាត់រយពេល៤ខែទើបត្រូវបញ្ចប់ ហើយបែងចែកការងារតាមបណ្តាអង្គភាពដែលត្រូវការ៕
ចែករំលែកព័តមាននេះ