រាជធានីភ្នំពេញ៖ បើតាមមន្ត្រីរបស់អតីតគណបក្សសង្គ្រោះជាតិម្នាក់បានឲ្យដឹងថាគណបក្សភ្លើងទៀន នឹងមិនចូលរួមប្រកួតប្រជែងក្នុងការបោះឆ្នោតជ្រើសរើសសមាជិកព្រឹទ្ធសភានៅពេលខាងមុននោះទេ។
មន្ត្រីដែលស្និតនឹងថ្នាក់ដឹកនាំគណបក្សភ្លើងទៀន (អតីតគណបក្ស សម រង្ស៊ី) សុំមិនបញ្ចេញឈ្មោះបានឲ្យដឹងថា កន្លងមក គណបក្សភ្លើងទៀន មានសមាជិកព្រឹទ្ធសភា១១នាក់ ប៉ុន្តែនាឆ្នាំ២០១៨ខាងមុខ បក្សនេះមិនចូលរួមឈរឈ្មោះបោះឆ្នោតជ្រើសតាំងសមាជិកព្រឹទ្ធសភាឡើយ ដោយសារតែគ្មានសង្ឃឹមនឹងទទួលជ័យជម្នះ ក្រោយពីគណបក្សសង្គ្រោះជាតិ ត្រូវបានតុលាការកំពូលរំលាយកាលពីថ្ងៃទី១៦ វិច្ឆិកា ២០១៧ កន្លងមក។ ទាក់ទិននឹងការលើកឡើងរបស់មន្ត្រីខាងនេះ កោះសន្តិភាពមិនអាចទាក់ទងលោក ទាវ វណ្ណុល ប្រធានគណបក្សភ្លើងទៀន ដើម្បីធ្វើអត្ថាធិប្បាយបានទេ ដោយទូរស័ព្ទរបស់លោកតេចូលគ្មានអ្នកទទួល។
លោក ទាវ វណ្ណុល ប្រធានគណបក្សភ្លើងទៀន នឹងមិនចូលរួមឈរឈ្មោះបោះឆ្នោតនេះឡើយ ដោយសារតែ «គ្មានសង្ឃឹមទទួលជ័យជម្នះ» ក្រោយពីគណបក្សសង្គ្រោះជាតិត្រូវបានតុលាការរំលាយ ។ លោកបានពន្យល់ថា បើអង្គបោះឆ្នោតក្រុមប្រឹក្សារាជធានី/ខេត្ត ក្រុង ស្រុក/ខណ្ឌ ឃុំ/សង្កាត់ ទាំង៥០០៧នាក់ របស់គណបក្សសង្គ្រោះជាតិត្រូវបានរំលាយហើយ គឺក៏គ្មានសង្ឃឹមទទួលបានជ័យជម្នះដែរ។
ទាក់ទិននឹងការបោះឆ្នោតព្រឹទ្ធសភានេះដែរ លោក សោម សូររីដា អគ្គលេខាធិការរង គ.ជ.ប បានឲ្យដឹងថា រហូតមកដល់ថ្ងែទី២៨ វិច្ឆិកា ឆ្នាំ២០១៧នេះ គ.ជ.ប បានទទួលពីគណបក្ស គឺគណបក្សប្រជាជនកម្ពុជា និងគណបក្សយុវជនកម្ពុជា ៕
ចែករំលែកព័តមាននេះ