ខេត្តកណ្ដាល ៖ យុវជនម្នាក់បានកាប់បង្ករបួសស្នាមទៅលើយុវជនម្នាក់ទៀត ដែលជាអ្នករស់នៅក្នុងភូមិជាមួយគ្នាកាលពី៥ឆ្នាំមុន បន្ទាប់មកបានរត់គេចខ្លួនបាត់ ។ ទើបតែពេលនេះត្រលប់ចូលស្រុកវិញបានរយៈពេល១ខែប៉ុណ្ណោះ ក៏ត្រូវបាននគរបាលព្រហ្មទណ្ឌស្រុកអង្គស្នួល និងកម្លាំងប៉ុស្តិ៍នគរបាលរដ្ឋបាលទួលព្រេជ ចាប់ខ្លួនតាមដីកាតែម្ដង ។
នគរបាលព្រហ្មទណ្ឌស្រុកអង្គស្នួលបានឲ្យដឹងថា ជនសង្ស័យខាងលើនោះឈ្មោះ រឿន រិន អាយុ២០ឆ្នាំ ជនជាតិខ្មែរ មុខរបរកម្មករសំណង់ មានទីលំនៅក្នុងភូមិរំលិច ឃុំទួលព្រេច ស្រុកអង្គស្នួល ខេត្តកណ្ដាល ។ ត្រូវបានកម្លាំងចាប់ខ្លួនបានកាលពីវេលាម៉ោង០១និង២០នាទីយប់រំលងអធ្រាត្រ ឈានចូលថ្ងៃទី២៨ ខែវិច្ឆិកា ឆ្នាំ២០១៧ នៅក្នុងភូមិខាងលើ ។
ប្រភពដដែលបានបន្តទៀតថា ជននេះត្រូវចាប់ខ្លួនតាមដីកាលេខ៦០២ ដ.ក.ច.ខ ចុះថ្ងៃទី២៦ ខែឆ្នូ ឆ្នាំ២០១៦ របស់លោក ផូង វណ្ណ ចៅក្រមជំនុំជម្រះ នៃសាលាដំបូងខេត្តកណ្តាល ។ ដែលបានចោទប្រកាន់ពីបទ « ហិង្សាដោយចេតនាមានស្ថានទម្ងន់ទោស » ដែលប្រព្រឹត្តនៅក្នុងភូមិរំលិច ឃុំទួលព្រេច ស្រុកអង្គស្នួល ខេត្តកណ្ដាល កាលពីថ្ងៃទី១៥ ខែមេសា ឆ្នាំ២០១២ ។
ប្រភពខាងលើបានបន្តទៀតថា ជនរងគ្រោះមិនត្រូវបានគរបាលចាំឈ្មោះនោះទេ គ្រាន់តែដឹងថាជាអ្នករស់នៅក្នុងភូមិជាមួយជនសង្ស័យខាងលើនោះដែរ ។ ហើយការកាប់បង្ករបួសស្នាមនោះ ផ្ដើមចេញពីទំនាស់នៅកន្លែងរាំវង់ពេលបុណ្យចូលឆ្នាំថ្មីប្រពៃណីជាតិ ។ បន្ទាប់ពីកាប់ទៅលើជនរងគ្រោះបណ្ដាលឲ្យរងរបួសធ្ងន់ហើយ ជននេះបានរត់គេចខ្លួនចោលស្រុកបាត់រហូតរយៈពេល៥ឆ្នាំមកហើយ ។ ទើបតែពេលនេះចូលស្រុកវិញ ហើយបាន១ខែប៉ុណ្ណោះ ក៏ត្រូវបានកម្លាំងនគរបាលខាងលើចុះទៅធ្វើការចាប់ខ្លួនបញ្ជូនទៅសាលាដំបូងខេត្តកណ្ដាល ដើម្បីចាត់ការតាមច្បាប់ ៕
ចែករំលែកព័តមាននេះ