សម្តេចតេជោនាយករដ្ឋមន្ត្រី ហ៊ុន សែន នៅព្រឹកថ្ងៃទី២៧ ខែវិច្ឆិកា បានបញ្ជាក់ថា សមត្ថកិច្ចកម្ពុជា កំពុងតាមស្រាវជ្រាវរកជនទុច្ចរិត ដែលបានចូលវាយប្រហារ(Hack) ទំព័រ…
សម្តេចតេជោនាយករដ្ឋមន្ត្រី ហ៊ុន សែន នៅព្រឹកថ្ងៃទី២៧ ខែវិច្ឆិកា បានបញ្ជាក់ថា សមត្ថកិច្ចកម្ពុជា កំពុងតាមស្រាវជ្រាវរកជនទុច្ចរិត ដែលបានចូលវាយប្រហារ(Hack) ទំព័រ Facebook របស់បណ្តាញសារព័ត៌មាន Fresh News ហើយបង្ហោះព័ត៌មានមិនពិត ប្រឌិតមានបំណងអាក្រក់បង្កចលាចលដល់សង្គមកម្ពុជា ។
សម្តេចតេជោបានបញ្ជាក់បែបនេះ នៅលើបណ្តាញសង្គម Facebook ផ្ទាល់របស់សម្តេចថា៖ «កាលពីព្រឹកមិញនេះ គឺមានព័ត៌មានបង្ហោះនៅលើសារព័ត៌មាន ហ្វេសប៊ុក Fresh News ថា មានការធ្វើឃាតរូបខ្ញុំ ដែលព័ត៌មាននេះគឺជាព័ត៌មានមិនពិត ប្រឌិតមានបំណងអាក្រក់បង្កចលាចលដោយជនទុច្ចរិត និងជនខិលខូចមួយចំនួនដែលបានលួចចូល(Hack) ហ្វេសប៊ុករបស់ក្រុមការងារ Fresh News ។ ប៉ុន្តែពេលនេះសមត្ថកិច្ចកំពុងស្រាវជ្រាវហើយ» ។
សម្តេចបានបន្តថា «ខ្ញុំសូមបញ្ជាក់ថា មិនមានអ្វីកើតឡើងចំពោះរូបខ្ញុំទេ ។ សូមអរគុណជនរួមជាតិចំពោះការគាំទ្រ និងគោរពស្រឡាញ់ចំពោះរូបខ្ញុំ» ។
សូមបញ្ជាក់ថា នៅព្រឹកព្រលឹមថ្ងៃទី២៧ ខែវិច្ឆិកា ឆ្នាំ២០១៧ មានជនទុច្ចរិតបានចូលវាយប្រហារ(Hack)លើទំព័រ Facebook របស់បណ្តាញព័ត៌មាន Fresh News ហើយបង្ហោះសារប្រមាថថា មានការធ្វើឃាតសម្តេចតេជោ ហ៊ុន សែន ក្នុងគោលដៅធ្វើឱ្យមានចលាចលនៅក្នុងប្រទេសកម្ពុជា ។
ចែករំលែកព័តមាននេះ