រាជធានីភ្នំពេញ ៖ ជំនួបប៉ះគ្នាជាថ្មីម្ដង ទៀត ក្រោយការផ្អាកជួបគ្នាអស់រយៈពេលយ៉ាងយូរ កីឡាករជើងខ្លាំងកម្ពុជាដែលត្រូវគេស្គាល់ថា ជាជើងឯករបស់ប៉ុស្ដិ៍លេខ៥កាលពីឆ្នាំ២០១៣ ធ្វើបានល្អយ៉ាងខ្លាំងកាលពីថ្ងៃទី២៦ វិច្ឆិកា នៅលើសង្វៀនទូរទស្សន៍អាស៊ីអាគ្នេយ៍…
រាជធានីភ្នំពេញ ៖ ជំនួបប៉ះគ្នាជាថ្មីម្ដង ទៀត ក្រោយការផ្អាកជួបគ្នាអស់រយៈពេលយ៉ាងយូរ កីឡាករជើងខ្លាំងកម្ពុជាដែលត្រូវគេស្គាល់ថា ជាជើងឯករបស់ប៉ុស្ដិ៍លេខ៥កាលពីឆ្នាំ២០១៣ ធ្វើបានល្អយ៉ាងខ្លាំងកាលពីថ្ងៃទី២៦ វិច្ឆិកា នៅលើសង្វៀនទូរទស្សន៍អាស៊ីអាគ្នេយ៍ ក្នុងពេលដែលគេត្រូវគណៈកម្មការរៀបចំការប្រកួតតម្រូវឱ្យប៉ះប្រកួតជាមួយកីឡាករជើងខ្លាំង រិន សារ័ត្ន ជំនួសឱ្យការប្រកួតអន្តរជាតិដែលបានធ្វើឡើងនៅលើសង្វៀនទូរទស្សន៍អាស៊ីអាគ្នេយ៍ ។ កីឡាករ គង់ សំបូរ ត្រូវគេកត់សម្គាល់ថាធ្វើបានល្អខ្លាំង ដោយសារតែលោកប្រើពេលត្រឹមតែ៤ទឹកប៉ុណ្ណោះ ក៏ផ្ដួលគូប្រកួតបានសម្រេច បើទោះជាជ័យជម្នះនោះត្រូវគេមើលឃើញថាទទួលបានដោយសំណាងច្រើនជាងបច្ចេកទេស ដោយសារតែរិន សារ័ត្ន ភ្លាត់ស្នៀតច្រើនជាងបរាជ័យដោយបច្ចេកទេសក្ដី ។ នេះជាជំនួបដ៏ក្ដៅគគុកមួយដែលធ្វើឱ្យមានការចាប់អារម្មណ៍យ៉ាងខ្លាំង ដោយសារតែ រិន សារ័ត្ន គឺជាជើងខ្លាំងប្រចាំសង្វៀន ហើយប៊ិះនឹងផ្ដួលកីឡាករគង់ សំបូរ ដែលជាម្ចាស់ជើងឯកឱ្យដួលបះជើង ទៀតផង ។
យោងតាមការបញ្ជាក់របស់កីឡាករ គង់ សំបូរ ថា ការជួបប្រកួតជាមួយកីឡាករ រិន
សារ័ត្ន គឺជាលើកដំបូងប៉ុណ្ណោះបើមិនគិតដល់ការប៉ះគ្នាយូរឆ្នាំមកហើយកាលពីពេលលោកនៅប្រកួតទម្ងន់ស្រាល ។ លោកថា កីឡាកររិន សារ័ត្ន បានបោះជំហានក្លាយជាជើងខ្លាំងល្បីឈ្មោះជាងលោកដោយសារតែរិនសារ័ត្ន គឺជាសមាសភាពកីឡាករដែលមានឱកាសបានបញ្ចេញសមត្ថភាពនៅលើសង្វៀនទូរទស្សន៍អាស៊ីបានច្រើនជាមួយកីឡាករថៃ និងកីឡាករបរទេស ទើបធ្វើឱ្យលោកប្រែក្លាយខ្លួនជាកីឡាករជំនាន់ក្រោយដាច់ឆ្ងាយបើធៀបនឹងពេលដែលរិន សារ័ត្ន មានឈ្មោះបោះសំឡេងឡើងវ៉ាដាច់នៅលើសង្វៀន ។ លោកថា ការប្រកួតជាថ្មីរបស់លោកជាមួយនឹងកីឡាករជើងខ្លាំង រិន សារ័ត្ន លោកខ្លួនឯងក៏មិនសូវមានទំនុកចិត្តសម្រាប់ជ័យជម្នះនោះដែរ ដោយសារតែលោកប្រើបច្ចេកទេសវាយណាស់ដែរ ប៉ុន្តែនៅតែធ្វើអីមិនបែកជាមួយនឹងកណ្ដាប់ដៃរបស់កីឡាករជាគូប្រកួតហើយធ្វើឱ្យលោកពិបាកទ្រាំ ។
នៅវិនាទីប៉ះគ្នាដំបូងភ្លាមៗកាលពីថ្ងៃទី២៦ វិច្ឆិកានោះ លោកបញ្ជាក់ដោយខ្វះជំនឿចិត្តថា ក្នុងពេលគណៈគ្រប់គ្រងរបស់ទូរទស្សន៍អាស៊ីអាគ្នេយ៍សម្រេចឱ្យលោកប៉ះគ្នាជាមួយកីឡាករ រិន សារ័ត្ន លោកមិនសូវរំពឹងច្រើនថានឹងមានលទ្ធផលល្អដូចអ្វីដែលបានកើតឡើងនោះទេ ទើបលោកសប្បាយចិត្តយ៉ាងខ្លាំង នៅពេលការប្រកួតទទួលបានផ្លែផ្កាតាមការប្រឹងប្រែង ។
គ្រាន់តែបើកឆាកឡើងរេញភ្លាម គេឃើញ កីឡាករ រិន សារ័ត្ន បើកការវាយប្រយុទ្ធយ៉ាងចាស់ដៃតែម្ដង ដោយអ្នកណាៗក៏មើលឃើញថាសមត្ថភាពរបស់កីឡាករជាគូប្រកួតមានកម្រិតល្អជាង ជាពិសេសក្នុងការវាយម៉ាត់ និងទាត់ឆ្វេងស្ដាំ ។ ការប្រកួតរបស់អ្នកទាំងពីរទទួលបានការចាប់អារម្មណ៍យ៉ាងខ្លាំងហើយក៏មានអ្នកគាំទ្រទស្សន៍ទាយថានឹងចេញលទ្ធផលបែបនេះបែបនោះតាមការយល់ឃើញផងដែរ ។
យ៉ាងណាមិញ សម្រាប់ការប្រកួតត្រូវគេកត់សម្គាល់ថាលេចចេញលទ្ធផលតែមួយប៉ប្រិចភ្នែកប៉ុណ្ណោះ បន្ទាប់ពី គង់ សំបូរ សម្រេចចិត្តប្រកួតប្ដូរ ហើយមានឱកាសវាយត្រូវចំណុចសំខាន់គូប្រកួតបណ្ដាលឱ្យគូប្រកួតដួលសន្លប់បាត់មាត់ឈឹងនៅលើរេញក្នុងទឹកទី៤ ដោយសូម្បីតែអ្នកគាំទ្រគ្រប់រូបក៏ស្រឡាំងកាំងនោះដែរក្រោយពីកីឡាករជើងខ្លាំង រិន សារ័ត្ន ត្រូវរាប់ដល់១០លើរេញហើយប្រកាសសុំចាញ់ ។ កីឡាករ រិន សារ័ត្ន គឺជាជើងខ្លាំងម្នាក់ដែលមានសមត្ថភាពមិនធម្មតានៅក្នុងពិភពប្រដាល់ ដោយលោកឡើងមកប្រកួតនៅលើសង្វៀនម្ដងៗក៏មិនសូវបរាជ័យ ឬមានកីឡាករក្រៅស្រុក និងក្នុងស្រុកណាម្នាក់អាចដណ្ដើមបានជ័យជម្នះនោះដែរ ជាពិសេសក្នុងពេលដែលគេប៉ះគ្នានៅលើសង្វៀនទូរទស្សន៍អាស៊ីអាគ្នេយ៍ ។
ការបរាជ័យរបស់កីឡាករ រិន សារ័ត្ន បានធ្វើឱ្យម្នាក់ៗភ្ញាក់ផ្អើល ហើយក៏មានការសរសើរចំពោះកីឡាករគង់ សំបូរ ច្រើនដែរ ដែលអាចទទួលបានជោគជ័យដល់ម្ល៉ឹងលើសពីការគ្រោងទុក ។ នេះក៏ជាលទ្ធផលដែលធ្វើឱ្យការបរាជ័យដែលគង់ សំបូរធ្លាប់ទទួលបានមុនៗ លែងមានគេរិះគន់ ក្នុងពេលដែលលោកធ្លាប់ធ្វើឱ្យម្នាក់ៗខកចិត្តច្រើនលើករួចមកហើយ ជាពិសេសក្នុងជំនួបកីឡាករបរទេសថ្មីៗ ស្រាប់តែមកមានសំណាងបានឈ្នះកីឡាករជើងខ្លាំងមួយនេះវិញយ៉ាងឡូយនៅលើសង្វៀនទូរទស្សន៍អាស៊ីអាគ្នេយ៍ ។ កីឡាករ គង់ សំបូរ ញញឹមបិទមាត់មិនជិតនោះទេ ក្រោយពីត្រូវបានប្រកាសថាបានឈ្នះកីឡាករជើងខ្លាំងនៅលើសង្វៀន រិន សារ័ត្ន ដែលការឡើងរេញលើកចុងក្រោយរបស់គេជាមួយកីឡាករក្នុងស្រុក និងក្រៅស្រុក គឺសុទ្ធតែបានទទួលជោគជ័យ ។
យ៉ាងណាមិញ គង់ សំបូរ មិនទទួលបានទឹកប្រាក់លើកទឹកចិត្ត១លានរៀលពីកម្មវិធីនោះទេ ដោយសារតែគេដ្បិតថាមានឱកាសវាយផ្ដួលកីឡាករជាគូប្រកួតឱ្យសន្លប់ក្នុងទឹកទី៤ក៏ពិតមែន ប៉ុន្តែលក្ខខណ្ឌនៃកម្មវិធីគឺផ្ដល់ឱ្យ១លានរៀលសម្រាប់តែកីឡាករកម្ពុជាវាយផ្ដួលកីឡាករថៃប៉ុណ្ណោះ ហើយសម្រាប់តែការឈ្នះមុនទឹកទី៣ប៉ុណ្ណោះ ។
គួរបញ្ជាក់ថា កីឡាករ គង់ សំបូរ គឺជាជើងខ្លាំងវ័យក្មេងម្នាក់នៅលើសង្វៀន ចាប់តាំងពីបានក្លាយជាម្ចាស់ជើងឯកក្នុងប្រភេទទម្ងន់៦៣,៥គីឡូក្រាម កាលពីឆ្នាំ២០១៣ នៅប៉ុស្ដិ៍លេខ៥ ដោយលោកត្រូវបានគណៈកម្មការរៀបចំដាក់ប្រកួតនៅលើសង្វៀនអន្តរជាតិស្ទើរតែគ្មានលស់ពេល ។ យ៉ាងណាមិញ ក្រេឌីតរបស់កីឡាកររូបនេះត្រូវបានគេកត់សម្គាល់ថាមានការប្រែប្រួល ដោយសារតែគេឡើងប៉ះជាមួយកីឡាករថៃម្ដងៗច្រើនតែមានការបរាជ័យ ឬឈ្នះទាំងត្រដាបត្រដួស ។ អ៊ីចឹងហើយទើបធ្លាក់មកប្រកួតជាមួយកីឡាករក្នុងស្រុកច្រើនជាងបើធៀបនឹងរយៈពេលមុន ។ ប៉ុន្តែជ័យជម្នះដែលបានធ្វើឡើងជាមួយកីឡាករ រិន សារ័ត្ន គឺជាមុខមាត់ថ្មីដែលជួយឱ្យគេទទួលបានការចាប់អារម្មណ៍ ទើបម្នាក់ៗរំពឹងថាមិនយូរនោះទេ គង់ សំបូរ នឹងក្លាយជាកីឡាករវ័យក្មេងដែលមានការឈានឡើងនៅគ្រប់សង្វៀនអន្តរជាតិដូចមុន ស្របពេលដែលលោកក៏ទទួលបានបទពិសោធន៍ក្នុងការប្រកួតច្រើនផង នាពេលចុងក្រោយ ។
លោក ញាណ សុធី ដែលជាអ្នករៀបចំការប្រដាល់ប្រចាំនៅទូរទស្សន៍អាស៊ីអាគ្នេយ៍ បានអះអាងថា កីឡាករ គង់ សំបូរ លោកត្រូវឱ្យឡើងប្រកួតជាមួយកីឡាករថៃច្រើនណាស់ ប៉ុន្តែមកពីកម្លាំងដៃគេនៅមិនទាន់រឹងមាំ ហើយក្នុងពេលខ្លះគេប្រកួតមិនសូវបានល្អជាមួយកីឡាករបរទេស ទើបលោកផ្សាំៗឱ្យប្រកួតជាមួយកីឡាករល្អក្នុងស្រុកឱ្យបានច្រើនសិន ។ លោកថា ការប្រកួតជាមួយកីឡាករ រិន សារ័ត្ន ហើយឈ្នះរិន សារ័ត្ន គឺជាមុខមាត់មួយ ប៉ុន្តែលោកមិនទាន់ចាត់ទុកថាខ្លាំងគួរឱ្យសរសើរនៅឡើយទេ ក្នុងពេលដែលលទ្ធផលនោះ ក៏ស្ថិតក្នុងភាពហេងស៊យច្រើនជាង បើលោកសម្លឹងមើលឱ្យគ្រប់ជ្រុងជ្រោយពីការប្រើប្រាស់បច្ចេកទេស ។
លោកថា កីឡាករ រិន សារ័ត្ន នៅតែមានសន្ទុះល្អជាង ប៉ុន្តែអាចបណ្ដាលមកពីគេមើលស្រាលចំពោះគង់ សំបូរ ទើបករណីភ្លាត់ស្នៀតបានកើតមានឡើង ។ យ៉ាងណាមិញ លោកក៏សម្ដែងការអបអរសាទរផងដែរ ដែលកីឡាករវ័យក្មេងរូបនេះបើកឆាកប្រយុទ្ធបានល្អជាមួយនឹងកីឡាកររិន សារ័ត្ន ហើយធ្វើឱ្យលោកកត់សម្គាល់ពីសមត្ថភាពខ្លាំងក្លារបស់គេ ។ ក្នុងទឹកទី១ និងទី២លោកថា ការប្រកួតរបស់ពួកគេចំណាយកម្លាំងចោលទទេ ដោយមិនមានកីឡាករណាមួយប្រឹងសម្ញែ៉ងសមត្ថភាពឱ្យរស់រវើកបំពេញចិត្តអ្នកទស្សនានោះទេ គឺលុះត្រាតែទឹកទី៣ និងទី៤ ទើបភាគីម្ខាងប្រឹងប្រកួតបានបន្តិច ប៉ុន្តែក៏មិនល្អត្រូវចិត្តរបស់លោកនោះដែរ ទើបលោកយល់ថា ជារឿងគួរឱ្យស្ដាយដោយសារតែកីឡាករ គង់ សំបូរ ហាក់នៅញញើតញញើមចំពោះគូប្រកួតនៅឡើយ បើធៀបនឹងគូប្រកួតដែលគេហាក់មានការសម្រុកចូលច្រើនជាង។
លោកទទូចឱ្យកីឡាករកម្ពុជាទាំងអស់ប្រឹងប្រកួតឱ្យអស់ពីសមត្ថភាព ដោយលោកបានចាត់ទុកថាបើកីឡាករកម្ពុជាមិនប្រកួតឱ្យអស់ដៃនោះទេ នោះកីឡាករជាគូប្រកួតមិនថាកីឡាករកម្ពុជា ឬបរទេសក៏មិនធ្វើការប្រកួតឱ្យល្អនោះដែរ ៕
ចែករំលែកព័តមាននេះ