រាជធានីភ្នំពេញ ៖ សំរាមបានក្លាយជាប្រធានបទមួយនៅក្នុងសង្គមបច្ចុប្បន្ន បើទោះបីជាមានការខិតខំផ្សព្វផ្សាយពីការទុកដាក់ និងវេចខ្ចប់សំរាមឲ្យបានត្រឹមត្រូវយ៉ាងណាក៏ដោយ ក៏បញ្ហានេះនៅតែមិនប្រសើរឡើង ។ ការបោះសំរាមពាសវាលពាសកាល មិនត្រឹមតែប៉ះពាល់ដល់បរិស្ថាន និងសុខភាពប៉ុណ្ណោះទេ ថែមទាំងជះឥទ្ធិពលដល់លំហូរភ្ញៀវទេសចរ និងមុខមាត់ប្រទេសជាតិផងដែរ ។
ដើម្បីឲ្យក្នុងសហគមន៍នីមួយៗស្អាត មានបរិស្ថានស្រស់ស្អាត គ្មានថង់់ប្លាស្ទិកហោះហើរពាសពេញដី គឺត្រូវពឹងទៅលើពលរដ្ឋខ្លួនឯងដែលជាម្ចាស់សំរាម ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាសហស្ថាបនិកនៃកម្មវិធី «ភ្នំពេញស្អាត» មានប្រសាសន៍កាលពីថ្ងៃទី២៦ វិច្ឆិកា នៅពហុកីឡដ្ឋានជាតិអូឡាំពិកថា ដើម្បីឱ្យកម្ពុជាក្លាយជាព្រះរាជាណាចក្រស្អាត គ្មានសំរាម គឺត្រូវផ្តើមចេញពីពលរដ្ឋ ដោយធ្វើជាពលរដ្ឋគំរូ និងមានទំនួលខុសត្រូវរៀងៗខ្លួន ។
លោកថ្លែងថា ៖« ដើម្បីឱ្យកម្ពុជាយើងក្លាយជាព្រះរាជាណាចក្រស្អាត ខ្ញុំគិតថា គួរចាប់ផ្តើមពីយើង និងត្រូវមានទំនួលខុសត្រូវរៀងៗខ្លួន ដើម្បីភាពស្អាត និងស្រស់បំព្រងនៃបរិស្ថាននៅជុំវិញខ្លួន ។ អ្នកក៏អាចធ្វើបាន យើងក៏អាចធ្វើបាន អីចឹង ជឿជាក់ថា ខ្មែរទាំងមូលក៏អាចធ្វើបានដូចគ្នា » ។
លោក ហូ វណ្ឌី អគ្គលេខាធិការនៃសម្ព័ន្ធទេសចរណ៍ជាតិកម្ពុជា ធ្លាប់មានប្រសាសន៍ថា ការយល់ដឹងពីការរៀបចំទុកដាក់សំរាម ក៏ដូចជាការប្រើប្រាស់ថង់ប្លាស្ទិកសព្វថ្ងៃនៅមានកម្រិត ដែលទាមទារឱ្យក្រសួង និងស្ថាប័នពាក់ព័ន្ធធ្វើការផ្សព្វផ្សាយឲ្យបានផុសផុល និងចាត់វិធានការបន្ថែម ។
លោកបន្តថា ៖« បរិស្ថានយើងសព្វថ្ងៃនេះ ក្នុងករណីវាកាន់តែអាក្រក់ទៅ មិនថាភ្ញៀវទេសចរបរទេសទេ សូម្បីតែភ្ញៀវក្នុងស្រុក ក៏មិនមានការចេញដើរកម្សាន្តដែរ ព្រោះពេលចេញទៅណាម្តងៗ ឃើញមានការបោះចោលសំរាមនៅតាមដងផ្លូវ មិនត្រឹមតែធ្វើឱ្យបរិស្ថានកខ្វក់នោះទេ វាថែមធ្វើឱ្យប៉ះពាល់ដល់ពលរដ្ឋក្រីក្រ អាចកើតជំងឺរមាស់ផ្សេងៗទៀត ។ ដូចនេះ ដើម្បីចៀសវាងផលអវិជ្ជមាននេះ អាជ្ញាធរថ្នាក់ក្រោមជាតិ ធ្វើយ៉ាងម៉េច នៅតាមភូមិឃុំជួយពន្យល់ទៅដល់ពលរដ្ឋ និងប្រធានរោងចក្រជួយរៀបចំគ្រប់គ្រងសំរាម និងថង់ប្លាស្ទិកឱ្យបានល្អ » ។
លោក ហ៊ុន ម៉ានី លើកឡើងថា ដើម្បីសម្រេចគោលបំណង និងទិសដៅការងារខាងលើនេះ យុទ្ធនាការ «ភ្នំពេញស្អាត» នៅឆ្នាំដំបូង មានចក្ខុវិស័យវែងឆ្ងាយនាពេលអនាគត ដោយធ្វើយ៉ាងណា កែប្រែទម្លាប់ទុកដាក់សំរាមរបស់ពលរដ្ឋឱ្យបានត្រឹមត្រូវ ដែលជាគន្លឹះយ៉ាងសំខាន់ក្នុងការកាត់បន្ថយការបោះចោលសំរាមពាសវាលពាសកាលនៅតាមទីសាធារណៈ ដោយពុំមានការទទួលខុសត្រូវ និងជំរុញឱ្យមានការលើកកម្ពស់វិន័យ និងសណ្តាប់ធ្នាប់របស់អ្នកចោលសំរាមផ្តេសផ្តាសឱ្យមានភាពល្អប្រសើរឡើងជាងមុន។
លោករំពឹងថា ៖« យុទ្ធនាការនេះ នឹងជះឥទ្ធិពលវិជ្ជមានប្រកបដោយនិរន្តរភាពមួយយូរអង្វែង ដើម្បីបង្កើតភាពគំរូទៅដល់យុវជនជំនាន់ក្រោយ ព្រមទាំងជំរុញការគិតជាវិជ្ជមានក្នុងការចូលរួមដោះស្រាយបញ្ហាប្រឈមដែលសង្គមជាតិទាំងមូលកំពុងតែជួបប្រទះ » ។
កាលពីពេលថ្មីៗនេះ រាជរដ្ឋាភិបាលតាមរយៈក្រសួងបរិស្ថាន បានចេញអនុក្រឹត្យមួយ ស្ដីពីការគ្រប់គ្រងថង់ប្លាស្ទិក ហើយនៅពាក់កណ្តាលខែធ្នូខាងមុខនេះ ក្រសួងនឹងរៀបចំសិក្ខាសាលាស្តីពីការគ្រប់គ្រង និងប្រើប្រាស់ថង់ប្លាស្ទិកទៅដល់ម្ចាស់ផ្សារទំនើបផងដែរ៕
ចែករំលែកព័តមាននេះ