ខេត្តកែប ៖ នៅសល់មិនដល់១ខែទៀតទេ ព្រឹត្តិការណ៍បុណ្យសមុទ្រលើកទី៦ ជុំទី២ ដែលនឹងប្រារព្ធធ្វើនៅខេត្តកែប នឹងចូលមកដល់ ។ ក្នុងនោះក៏ជាឱកាសរបស់អាជីវករ ពាណិជ្ជករទាំងក្នុងនិងក្រៅស្រុក…
ខេត្តកែប ៖ នៅសល់មិនដល់១ខែទៀតទេ ព្រឹត្តិការណ៍បុណ្យសមុទ្រលើកទី៦ ជុំទី២ ដែលនឹងប្រារព្ធធ្វើនៅខេត្តកែប នឹងចូលមកដល់ ។ ក្នុងនោះក៏ជាឱកាសរបស់អាជីវករ ពាណិជ្ជករទាំងក្នុងនិងក្រៅស្រុក បានបង្ហាញផលិតផលរបស់ខ្លួនដើម្បីបញ្ជ្រាបចូលទីផ្សារផងដែរ ។ បើតាមការអះអាងពីអនុប្រធានមន្ទីរទេសចរណ៍ខេត្តកែប បានឲ្យកោះសន្ដិភាពដឹងថា ក្នុងព្រឹត្តិការណ៍ដ៏ធំនេះ មានស្ដង់ជាង៤០០ នឹងដាក់បង្ហាញផលិតផលក្នុងស្រុក ក៏ដូចជាផលិតផលដទៃទៀតដែលនាំចូលមកទីផ្សារកម្ពុជា ដើម្បីស្វែងរកដៃគូអាជីវកម្ម ។
លោក ប៉ុក ទាំង អនុប្រធានមន្ទីរទេសចរណ៍ខេត្តកែប បានប្រាប់តាមទូរស័ព្ទនៅថ្ងៃទី២៧ វិច្ឆិកា ថា រហូតមកដល់ពេលនេះ មានស្ដង់ចំនួនជាង៤០០ហើយដែលត្រៀមជាស្រេច ក្នុងការបង្ហាញផលិតផលរបស់ពួកគេទៅកាន់ភ្ញៀវជាតិ និងអន្តរជាតិ នៅក្នុងពិធីបុណ្យសមុទ្រនេះ ។
លោកថា ៖« ក្នុងចំណោមស្ដង់ទាំងនោះ គឺស្ដង់ផលិតផលក្នុងស្រុកមានចំនួន២០០ និងស្ដង់ពិព័រណ៍ពាណិជ្ជកម្ម មានចំនួន២០០ដូចគ្នាដែលមកពីប្រទេសថៃ » ។
នៅក្នុងព្រឹត្តិការណ៍ដ៏អស្ចារ្យមួយនេះ ខេត្តកែបរំពឹងថា នឹងមានមនុស្សមកលេងកម្សាន្ដចូលខ្ទង់លាននាក់ ព្រោះនឹងមានកម្មវិធីសម្តែងសិល្បៈ របាំ កីឡាលើខ្សាច់ លើទឹក និងមានល្បែងជាច្រើនប្រភេទទៀត ដូចជា ហត្ថពលកម្មជាដើម ។ រហូតមកដល់ពេលនេះ ខេត្តបានរៀបចំបន្ទប់នៅតាមសណ្ឋាគារ និងផ្ទះសំណាក់ សម្រាប់ទទួលស្វាគមន៍ភ្ញៀវទេសចររួចជាស្រេចហើយ ដែលមានទាំងអស់ចំនួន១ពាន់បន្ទប់ក្នុងខេត្តកែបផ្ទាល់តែម្ដង ។
ទោះបីយ៉ាងណា ចំនួននេះ គឺវាមិនគ្រប់គ្រាន់ដើម្បីបំពេញតាមតម្រូវការទេក្នុងឱកាសរយៈពេល៣ថ្ងៃនោះ ។ ដូច្នេះ ខេត្តកំពុងតែរៀបចំ និងត្រួតពិនិត្យផ្ទះរបស់ប្រជាពលរដ្ឋបន្ថែមទៀតដើម្បីទទួលភ្ញៀវទេសចរ និងធានាសុវត្ថិភាពជូនភ្ញៀវ ។
លោក ប៉ុក ទាំង បានបន្ថែមថា ៖« ១ពាន់បន្ទប់នេះ គឺមិនអាចទទួលភ្ញៀវអស់ទេ អីចឹង ខេត្តកំពុងតែរៀបចំផ្ទះរបស់ប្រជាពលរដ្ឋបន្ថែមទៀត តែត្រូវមើលកន្លែងសិនថា អាចផ្ដល់សុវត្ថិភាពដល់ភ្ញៀវបានឬអត់ ហើយខេត្តក៏កំពុងរៀបចំកន្លែងបោះតង់នៅតាមសួន ច្បារសម្រាប់យុវជន និងភ្ញៀវសម្រាកផងដែរ » ។
ក្នុងនោះ សាលាបច្ចេកទេស ដុន បូស្កូខេត្តកែប ដែលជាសាលាផ្តល់អាទិភាពដល់សិស្សក្រីក្រក្នុងការសិក្សា ក៏បានរៀបចំបន្ទប់ស្នាក់នៅរួចជាស្រេចផងដែរក្នុងការទទួលភ្ញៀវទេសចរប្រកបដោយសុវត្ថិភាព ។
លោក សោម ផានិត ប្រធានផ្នែកបដិសណ្ឋារកិច្ច និងទេសចរណ៍ បានប្រាប់ថា សាលាបានរៀបចំបន្ទប់ស្នាក់នៅជាក្រុមយ៉ាងស្រស់ស្អាត និងមានផាសុកភាព ព្រមទាំងសុវត្ថិ ភាព ហើយអ្វីដែលកាន់តែពិសេសនោះ គឺតម្លៃថោកសមរម្យដែលនឹកស្មានមិនដល់ ។
លោកថា ៖« សម្រាប់បន្ទប់យើងខ្ញុំ គឺមានទទួលជាលក្ខណៈគ្រួសារចាប់ពី២នាក់ ទៅ៥នាក់ ដោយតម្លៃ៣០ដុល្លារ និងលក្ខណៈជាក្រុម គឺ១នាក់ ៣ដុល្លារ ដែលអាចដាក់ភ្ញៀវបាន៤០នាក់ » ។
លោក សោម ផានិត បានបញ្ជាក់ថា សម្រាប់ភ្ញៀវដែលគាត់បានមកស្នាក់នៅក្នុងសាលាបច្ចេកទេសដុន បូស្កូ ១យប់ ប្រៀបដូចជាអ្នកបានជួយដល់ក្មេងក្រីក្រម្នាក់ឲ្យមានអនាគតភ្លឺស្វាងផងដែរ ។
គួររំឭកថា រាជរដ្ឋាភិបាលកម្ពុជា បានកំណត់យកថ្ងៃទី២២-២៣-២៤ ខែធ្នូ ឆ្នាំ២០១៧ ជាកាលបរិច្ឆេទប្រារព្ធពិធីបុណ្យសមុទ្រលើកទី៦ ជុំទី២ នៅខេត្តកែប ដែលព្រឹត្តិការណ៍ទេសចរណ៍ដ៏ធំនេះ នឹងបើកជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នាថ្ងៃទី២៣ ធ្នូ នៅមុខសាលាខេត្តកែប ក្រោមប្រធានបទ «ឆ្នេរសមុទ្របៃតង ៖ អនាគត គឺបច្ចុប្បន្ន» និរន្តរភាពទេសចរណ៍ដើម្បីអភិវឌ្ឍន៍ ក្រោមការសម្រេចពីរាជរដ្ឋាភិបាលកម្ពុជា ។
ដើម្បីរៀបចំព្រឹត្តិការណ៍នេះឲ្យកាន់តែអធិកអធម រដ្ឋមន្ត្រីក្រសួងទេសចរណ៍បានជំរុញឲ្យអាជ្ញាធរខេត្តខិតខំកែលម្អហេដ្ឋារចនាសម្ព័ន្ធ និងធ្វើជាខេត្តគំរូក្នុងការធ្វើឲ្យទីក្រុងមានភាពស្អាត និងបៃតង ស្របតាមស្ដង់ដាអាស៊ាន ដើម្បីរួមចំណែកទាក់ទាញភ្ញៀវទេសចរជាតិ ទេសចរក្នុងតំបន់ ក៏ដូចជាទេសចរនៅជុំវិញពិភពលោកផងដែរ ។
ក្នុងនោះ លោករដ្ឋមន្ត្រី ថោង ខុន បានបន្តជំរុញ និងដាក់ផែនការមួយចំនួនដើម្បីពន្លឿនការរៀបចំពិធីបុណ្យសមុទ្រ ឆ្នាំ២០១៧ រួមមាន ៖
១-អាជ្ញាធរខេត្តត្រូវពន្លឿនការរៀបចំកែលម្អសោភ័ណភាពក្រុងកែបឱ្យបានស្អាត រៀបចំបង្គន់អនាម័យសាធារណៈ បង្គន់ចល័តឱ្យបានគ្រប់គ្រាន់ និងត្រូវសម្អាតអនាម័យជាប្រចាំ។ ត្រូវជំរុញរៀបចំហេដ្ឋារចនាសម្ព័ន្ធនានាក្នុងខេត្ត ឲ្យបានរួចរាល់ទាន់ពេលវេលា សម្រាប់រៀបចំពិធីបុណ្យសមុទ្រ ឆ្នាំ២០១៧ ។
២-ចុះអប់រំបណ្តុះបណ្តាល និងពង្រឹងគុណភាពសេវាកម្មទេសចរណ៍នានា និងបញ្ហាអនាម័យដល់អាជីវករ និងប្រជាពលរដ្ឋ ដើម្បីបម្រើទេសចរជាតិ និងអន្តរជាតិ ក្នុងឱកាសពិធីបុណ្យសមុទ្រ ឆ្នាំ២០១៧ ឲ្យបានពេញចិត្ត ពិសេសសេវាម្ហូបអាហារ និងកន្លែងស្នាក់នៅ ។ គ្រប់ភោជនីយដ្ឋានទាំងអស់ ដើម្បីលុបបំបាត់ការបោះក្រដាសចោលក្រោមតុ ត្រូវបញ្ឈប់ការប្រើប្រាស់ក្រដាសជូតមាត់ទៀត គប្បីប្រើកន្សែងត្រជាក់ជំនួស ។
៣-ត្រូវខិតខំបំផុស និងណែនាំប្រជាពលរដ្ឋក្នុងខេត្តឲ្យរៀបចំ និងតុបតែងគេហដ្ឋានរបស់ខ្លួនឲ្យបានស្អាតសម្រាប់ជួលឲ្យភ្ញៀវជាតិ និងអន្តរជាតិ ដែលមកចូលរួមពិធីបុណ្យសមុទ្រ ឆ្នាំ២០១៧ ចូលស្នាក់នៅ សំដៅទាញផលចំណេញឲ្យបានដល់ដៃប្រជាពលរដ្ឋផ្ទាល់ ។
៤-ត្រូវរៀបចំអភិវឌ្ឍន៍ផលិតផលទេសចរណ៍ថ្មីៗឲ្យបានច្រើន ដើម្បីបម្រើ និងទាក់ទាញទេសចរជាតិ និងអន្តរជាតិមកចូលរួមក្នុងពិធីបុណ្យសមុទ្រ ឆ្នាំ២០១៧ ឲ្យបានច្រើនកុះករ ។
៥-ត្រូវរៀបចំទស្សនីយភាពសិល្បៈ ការតាំងពិព័រណ៍ផលិតផលទេសចរណ៍ ពាណិជ្ជកម្ម សកម្មភាពកីឡា ការបោះតង់ និងកម្មវិធីសម្អាតឆ្នេរឲ្យបានល្អ និងអញ្ជើញបណ្តាខេត្តជាប់សមុទ្រទាំង៤ និងខេត្តជាសម្ព័ន្ធមិត្តចូលរួមសម្តែងផងដែរ ។ ចំពោះកម្មវិធីកីឡានេះទៀតសោត ត្រូវរៀបចំប្រភេទកីឡាលើទឹក និងលើឆ្នេរឱ្យបានច្រើន ដូចជា ទូកក្តោង ម៉ូតូទឹក និងត្រូវរៀបចំព្យុះហយាត្រាឱ្យបានល្អ ។
៦-ត្រូវខិតខំយកចិត្តទុកដាក់ការពារ រក្សាសន្តិសុខ សុវត្ថិភាព និងសណ្តាប់ធ្នាប់ឲ្យបានល្អប្រសើរក្នុងឱកាសពិធីបុណ្យសមុទ្រ ឆ្នាំ២០១៧។ ត្រៀមរថយន្តសង្គ្រោះ ត្រៀមស្ដង់ពេទ្យប្រចាំការ និងត្រៀមអ្នកសង្គ្រោះបឋមឲ្យបានគ្រប់គ្រាន់ ដើម្បីត្រៀមជួយសង្គ្រោះជនរងគ្រោះដោយប្រការណាមួយក្នុងឱកាសពិធីបុណ្យសមុទ្រ ។
៧-ជំរុញការផ្សព្វផ្សាយអំពីបុណ្យសមុទ្រឲ្យបានទូលំទូលាយ តាមរយៈប្រព័ន្ធផ្សព្វផ្សាយសាធារណៈ និងឯកជន មានទូរទស្សន៍ ព័ត៌មានអនឡាញ វិទ្យុ ស្លាកសញ្ញាតាមដងផ្លូវ ស្លាកស្ទិកឃ័រនៅតាមផ្ទះសំណាក់ និងសណ្ឋាគារជាដើម ។
៨-មន្ទីរទេសចរណ៍ខេត្តកែប ចុះត្រួតពិនិត្យតាមផ្ទះសំណាក់ សណ្ឋាគារ និងរមណីយដ្ឋានទេសចរណ៍ជាដើម ប្រសិនបើកន្លែងណាគ្មានអាជ្ញាប័ណ្ណទេសចរណ៍ ត្រូវជំរុញឲ្យថៅកែ ឬប្រធានគ្រប់គ្រងមកសុំអាជ្ញាប័ណ្ណឲ្យបានត្រឹមត្រូវតាមច្បាប់ ៕
ចែករំលែកព័តមាននេះ