ខេត្តកំពត ៖ ព្រឹកថ្ងៃទី៤ វិច្ឆិកា ២០១២ សាខាកាកបាទក្រហមកម្ពុជាខេត្តកំពត ដឹកនាំដោយលោកអ៊ុយ សំអាត ប្រធាននាយកដ្ឋានគ្រោះមហន្តរាយកាកបាទក្រហមកម្ពុជា និងជាតំណាងដ៏ខ្ពង់ខ្ពស់លោកជំទាវកិត្តិព្រឹទ្ធបណ្ឌិត ហ៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងមន្ត្រីជាច្រើននាក់បាននាំយកអំណោយចែកជូនដល់ប្រជាពលរដ្ឋដែលរងគ្រោះដោយខ្យល់ព្យុះកាលពីថ្ងៃទី៣១ តុលា ២០១២ កន្លងទៅ ចំនួន២៤៥គ្រួសារ ។
ប្រជាពលរដ្ឋរងគ្រោះទាំងនោះរស់នៅស្រុកទឹកឈូ មាន៧៧គ្រួសារប៉ះពាល់ឃុំបួន គឺឃុំកូនសត្វ២គ្រួសារ, ឃុំជុំគ្រៀល៣០គ្រួសារ, ឃុំត្រពាំងធំ៣៣គ្រួសារ, ឃុំត្រពាំងព្រីង១២គ្រួសារ។ ក្រុងកំពតមាន១៦៨គ្រួសារ ប៉ះពាល់លើសង្កាត់៤ គឺសង្កាត់ក្រាំងអំពិល, សង្កាត់អណ្តូងខ្មែរ, សង្កាត់ត្រើយកោះ និងសង្កាត់កំពង់កណ្តាល។ អំណោយដែលត្រូវចែកជូននាពេលនេះ មួយគ្រួសារទទួលបានអង្ករ២០គីឡូក្រាម ត្រីខ១២កំប៉ុង មី១កេស ភួយ១ សារុង១ មុង១ ស្បែកជើង១គូរ សាប៊ូកក់សក់១ថង់ស្មើនឹង៤៨កញ្ចប់ ខោអាវមួយកំប្លេ ក្រមា១ និងប្រាក់ចំនួន៥ម៉ឺនរៀល ។
លោកអ៊ុយ សំអាត បានមានប្រសាសន៍ថា អំណោយនេះវាតិចតួចទេ ប៉ុន្តែវាចូលរួមសម្រាល និងរំលែកទុក្ខលំបាកដល់បងប្អូនដែលរងការខូចខាតលំនៅឋាន និងទ្រព្យសម្បត្តិដោយសារគ្រោះមហន្តរាយខ្យល់ព្យុះនាពេលកន្លងមក ។ លោកក៏បានពាំនាំការសាកសួរសុខទុក្ខពីលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាចំពោះបងប្អូនផងដែរ ដែលលោកជំទាវជាប់មមាញឹកកិច្ចការដ៏សំខាន់ធំៗពុំបានអញ្ជើញមកផ្ទាល់ ។ ជាពិសេសពាំនាំសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលក៏ដូចជាសម្តេចថ្នាក់ដឹកនាំគណបក្សប្រជាជនទាំង៣ តែងតែគិតគូរពីជីវភាពរស់នៅរបស់បងប្អូនដោយមិនប្រកាន់ពូជសាសន៍ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ