រាជធានីភ្នំពេញ ៖ យុវជនម្នាក់ខណៈដែលកំពុងជិះម៉ូតូ១គ្រឿង គ្រាន់តែជួបកម្លាំងនគរបាលកំពុងល្បាតពួនស្ទាក់បទល្មើសនៅក្នុងមូលដ្ឋាន ស្រាប់តែដោះអាវបោះចោលរួចព្យាយាមរត់គេចខ្លួន។ ប៉ុន្តែត្រូវបាននគរបាលដេញតាមចាប់ខ្លួនបាន និងឆែកឆេរឃើញថ្នាំញៀន១កញ្ចប់តូចផងដែរ បន្ទាប់មកបាននាំទៅសាកសួរ និងកសាងសំណុំរឿងចាត់ការតាមច្បាប់។ ការចាប់ខ្លួននោះបានធ្វើឡើងនៅវេលាម៉ោង៨ និង២០នាទីយប់ ថ្ងៃទី២៧ ខែវិច្ឆិកា ឆ្នាំ២០១៧ នៅជិតផ្លូវរថភ្លើងខ្សែភ្នំពេញ-កំពត ស្ថិតនៅក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។ យុវជនសង្ស័យខាងលើនោះឈ្មោះ ជា តុលា អាយុ២៣ឆ្នាំ ស្នាក់នៅផ្ទះជួល ក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើតនៅក្នុងភូមិបឹង ឃុំឈើកាច់ ស្រុកបាភ្នំ ខេត្តព្រៃវែង។
ជនសង្ស័យជិះម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ព្រៃវែង 1I-3180។ នគរបាលបានឲ្យដឹងថា នៅមុនពេលកើត ហេតុកម្លាំងនគរបាលប៉ុស្តិ៍ត្រពាំងក្រសាំងបានចេញល្បាតពួនស្ទាក់បទល្មើសនៅក្នុងមូលដ្ឋានរបស់ខ្លួន។ ហើយក្រោយពីដើរល្បាតនៅកន្លែងផ្សេងៗរួច កម្លាំងបានបន្តទៅល្បាតនៅចំណុចខាងលើនោះទៀតព្រោះមានការសង្ស័យនៅត្រង់ចំណុជិតផ្លូវរថភ្លើងខាងលើនោះមានការជួញដូរគ្រឿងញៀនយូរមកហើយ។ ប្រភពដដែលបានបន្តទៀតថា មិនតែប៉ុណ្ណោះកន្លងមកប្រជាពលរដ្ឋបានលួចខ្សឹបប្រាប់ថា មានក្រុមជួញដូរគ្រឿងញៀន បានធ្វើសកម្មភាពជួញដូរទាំងយប់ទាំងថ្ងៃថែមទៀតផង។
ពេលនោះកម្លាំងបានទៅល្បាតកាត់តាមនោះ និងធ្វើការតាមឃ្លាំមើលសកម្មភាពផ្សេងៗរបស់ក្រុមសង្គមងងឹតផងដែរ លុះពេលទៅដល់បានជួបយុវជនសង្ស័យកំពុងជិះម៉ូតូចេញពីចំណុចសង្ស័យ។ ប្រភពខាងលើបានបន្តថា គ្រាន់តែបានឃើញកម្លាំងនគរបាលភ្លាម ស្រាប់តែជននេះដោះអាវបោះចោល ដែលការដោះអាវនោះទៀតសោត មិនបានដោះស្រួលបួលនោះឡើយ គឺទាញទាំងបង្ខំបណ្ដាលឲ្យដាច់ឡេវ តែម្ដង។ បន្ទាប់មកបានព្យាយាមរត់គេចខ្លួន ប៉ុន្តែរត់មិនរួចឡើយ ដោយត្រូវបានកម្លាំងតាមចាប់ខ្លួនបាន និងឆែកឃើញមានថ្នាំញៀន១កញ្ចប់នៅជាប់ខ្លួន និងសង្ស័យមានច្រើនកញ្ចប់ទៀតដែលបោះចោលជាមួយអាវ។ បន្ទាប់មកបាននាំទៅសាកសួរនៅប៉ុស្ដិ៍ដើម្បីចាត់ការតាមច្បាប់ និងបន្តទៅស្វែងរកចាប់ខ្លួនបក្ខពួកដែលនៅសល់ច្រើននាក់ទៀត៕
https://youtu.be/lNlsRYgsiHU
ចែករំលែកព័តមាននេះ