រាជធានីភ្នំពេញ ៖ កិច្ចប្រជុំថ្នាក់រដ្ឋមន្ត្រីទេសចរណ៍អាស៊ានស្តីពីតំបន់មេគង្គ និងកិច្ចប្រជុំស្តីពីអាស៊ានបូក៣មានចិន ជប៉ុន និងកូរ៉េ បានប្រព្រឹត្តទៅយ៉ាងឱឡារិករយៈពេល២ថ្ងៃ គឺថ្ងៃទី១៧ និង១៨ មករា នៅទីស្តីការនាយករដ្ឋមន្ត្រីវិមានសន្តិភាព។ លោកទិត្យ ចន្ថា អគ្គនាយកទេសចរណ៍នៃក្រសួងទេសចរណ៍បានឱ្យដឹងថា លទ្ធផលនៃកិច្ចប្រជុំខាងលើនេះគឺសំរេចបានផែនការយុទ្ធសាស្ត្រទេសចរណ៍២០១១-២០១៥ ដែលផែនការយុទ្ធសាស្ត្រនេះត្រូវបានមន្ត្រីជំនាញខាងទេសចរណ៍បានយកមកធ្វើការប្រជុំពិភាក្សាគ្នាអស់រយៈពេលប្រមាណជា១ឆ្នាំមកហើយ ហើយពេលនេះត្រូវបានដាក់ឱ្យថ្នាក់រដ្ឋមន្ត្រីទាំង១០ធ្វើការអនុម័តសំរេច ហើយរដ្ឋមន្ត្រីទាំងអស់បានបង្ហាញនូវការគាំទ្រ១០០ភាគរយនូវផែនការយុទ្ធសាស្ត្រនេះ។ ការងារនេះក៏បានបង្ហាញនូវមោទនភាពសំរាប់កម្ពុជាផងដែរ ដោយផែនការយុទ្ធសាស្រ្តនេះត្រូវបានយកមកអនុម័តនៅប្រទេសកម្ពុជាក្នុងកិច្ចប្រជុំនេះ។
គួររំលឹកថា កាលពីឆ្នាំ២០០៣ផែនការយុទ្ធសាស្ត្រទេសចរណ៍អាស៊ានក៏បានយកមកសំរេចអនុម័តនៅភ្នំពេញដែរ ហើយនៅឆ្នាំ២០១១នេះព្រឹត្តិការណ៍នេះនឹងត្រូវសំរេចនៅភ្នំពេញទៀត។ លោកទិត្យ ចន្ថា បានឱ្យដឹងទៀតថា ចំពោះអាស៊ានបូក៣មានចិន ជប៉ុន កូរ៉េដែលបានចូលរួមប្រជុំផងដែរនោះ ក៏បានទទួលដឹងឮ និងគាំទ្រ ផែនការយុទ្ធសាស្ត្ររបស់ទេសចរណ៍អាស៊ាននេះដែរ ហើយបន្តសហការជាមួយប្រទេសអាស៊ានទាំង១០ដើម្បីជួយអភិវឌ្ឍវិស័យទេសចរណ៍ឱ្យបានខ្លាំងក្លាថែមទៀត ដោយយកផែនការយុទ្ធសាស្ត្រដែលសំរេចរួចហើយនោះធ្វើជាគោល។ លោកអគ្គនាយកបានឱ្យដឹងទៀតថា ចំពោះការប្រជុំរដ្ឋមន្ត្រីទេសចរណ៍តំបន់មេគង្គ(GMF)ក៏បានសំរេចនូវឯកសារសំខាន់មួយដែរ គឺផែនទីបង្ហាញផ្លូវសំរាប់ការអភិវឌ្ឍទេសចរណ៍ក្នុងតំបន់មេគង្គ ហើយការងារនេះក៏បានសំរេចនៅប្រទេសកម្ពុជាដែរ។ ផែនទីបង្ហាញផ្លូវនេះបានយកចេញពីយុទ្ធសាស្ត្រអភិវឌ្ឍទេសចរណ៍តំបន់មេគង្គ ដែលបានអនុវត្តតាំងពីឆ្នាំ២០០៦មក។
លោកទិត្យ ចន្ថា បានបញ្ជាក់ទៀតថា ចំពោះផែនការយុទ្ធសាស្ត្រទេសចរណ៍អាស៊ានដែលត្រូវអនុវត្តឆ្នាំ២០១១-២០១៥នោះ ក៏មានទ្រង់ទ្រាយប្រហាក់ប្រហែលយុទ្ធសាស្ត្រទេសចរណ៍តំបន់មេគង្គដែរ គឺក្នុងនោះមានទិសដៅធំ៣ដែលសំខាន់ ទី១ ជំរុញការអភិវឌ្ឍទេសចរណ៍អាស៊ានឱ្យក្លាយទៅជាគោលដៅទេសចរណ៍លំដាប់ពិភពលោក ក្នុងនោះមានការអភិវឌ្ឍផលិតផលទេសចរណ៍ និងជំរុញការផ្សព្វផ្សាយ។ ទី២ ត្រូវលើកកំពស់គុណភាពសេវា គុណភាពផលិតផល រួមទាំងធនធានមនុស្សផងដែរ ធ្វើយ៉ាងណាឱ្យមានស្តង់ដា។ ទី៣ ការសំរួលការធ្វើដំណើរ ការដឹកជញ្ជូនទេសចរ ដែលគេត្រូវគិតពីទិដ្ឋាការ ការធ្វើបែបបទនៅតាមច្រកទ្វារព្រំដែន ការចេញ-ចូលដឹកជញ្ជូនត្រូវឱ្យមានភាពងាយស្រួល។ ជាចក្ខុវិស័យ គឺត្រូវយកវិស័យទេសចរណ៍ឱ្យក្លាយជាឧបករណ៍ដ៏សំខាន់ក្នុងការរួមចំណែកកសាងសេដ្ឋកិច្ចសង្គម និងជួយប្រជាពលរដ្ឋក្នុងការកាត់បន្ថយភាពក្រីក្រ៕
ចែករំលែកព័តមាននេះ