រាជធានីភ្នំពេញ ៖ អគ្គិភ័យមួយបានឆាបឆេះកាកសំណល់ប្រេងខ្មៅ និងវាលស្មៅមួយកន្លែងយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់អាជ្ញាធរ និងកម្លាំងសមត្ថកិច្ចទាំងថ្ងៃ ហើយក៏មានការចេញអន្តរាគមន៍ពន្លត់ពីសំណាក់ក្រុមរថយន្តពន្លត់អគ្គិភ័យចំនួន៥គ្រឿងផងដែរ ទើបពន្លត់ភ្លើងរលត់ទៅវិញ មិនបានបណ្ដាលឲ្យឆេះរាលដាលដល់លំនៅឋានដែលស្ថិតនៅជិតៗនោះទេ ហេតុការណ៍មួយនេះបានបង្កឲ្យមានការភ័យខ្លាចយ៉ាងខ្លាំងដល់ប្រជាពលរដ្ឋដែលមានផ្ទះសម្បែងនៅក្បែរនោះយ៉ាងខ្លាំង ។
ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាម៉ោង០២និង១៥នាទីរសៀល ថ្ងៃទី២៧ ខែវិច្ឆិកា ឆ្នាំ២០១៧ នៅចំណុចផ្ទះចម្រាញ់ប្រេងខ្មៅ ដែលមានទីតាំងស្ថិតនៅខាងក្រោយបុរីពិភពថ្មី ក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ មានជាងផ្សាដែកបានផ្សាដំបូលសំយាបផ្ទះនៅចំណុចខាងលើ ហើយបានធ្លាក់កម្ទេចផ្កាភ្លើងទៅលើស្មៅ និងប្រេងខ្មៅនៅខាងក្រោម ទើបបណ្ដាលឲ្យឆាបឆេះ បង្កជាអណ្ដាតភ្លើងយ៉ាងសន្ធោសន្ធៅ និងមានផ្សែងហុយឡើងលើយ៉ាងខ្មួលខ្មាញ់ ។ ខណៈនោះបានបង្កឲ្យមានការភ្ញាក់ផ្អើលយ៉ាងខ្លាំង ហើយកម្លាំងអាជ្ញាធរ និងនគរបានខណ្ឌដង្កោ បាននាំគ្នាចេញអន្តរាគមន៍ និងមានរថយន្តពន្លត់អគ្គិភ័យចំនួន៥គ្រឿងទៅបាញ់ទឹកពន្លត់ និងបានបាញ់អស់ទឹក២រថយន្ត ទើបរលត់ទៅវិញមិនបានរាលដាលដល់ផ្ទះសម្បែងដែលស្ថិតនៅក្បែរនោះឡើយ ៕
https://youtu.be/GHKaLCyh3Dk
ចែករំលែកព័តមាននេះ