ព្រឹត្តិការណ៍ Khmer-Thai Fight កក្រើកស្តាតមិនធម្មតា
- ភ្នំពេញ
រាជធានីភ្នំពេញ ៖ កាលពីយប់ថ្ងៃទី២៥ វិច្ឆិកា ស្ថានីយទូរទស្សន៍ PNN សហការជាមួយក្រុមហ៊ុន ISUZU បានរៀបចំព្រឹត្តិការណ៍ប្រដាល់អន្តរជាតិដែលមានឈ្មោះថា Khmer-Thai…
រាជធានីភ្នំពេញ ៖ កាលពីយប់ថ្ងៃទី២៥ វិច្ឆិកា ស្ថានីយទូរទស្សន៍ PNN សហការជាមួយក្រុមហ៊ុន ISUZU បានរៀបចំព្រឹត្តិការណ៍ប្រដាល់អន្តរជាតិដែលមានឈ្មោះថា Khmer-Thai Fight យ៉ាងកក្រើកនៅស្ដាតអូឡាំពិក ដោយមានកីឡាករ១៦រូបចូលរួមក្នុងនោះកីឡាករកម្ពុជា៤រូបនិងកីឡាករថៃ៤រូបត្រូវឡើងប្រកួតជាមួយកីឡាករមកពីទ្វីបអឺរ៉ុបដូចគ្នា ដោយសារការប្រកួតលើកនេះមិនតម្រូវឱ្យកីឡាករកម្ពុជា និងថៃប៉ះគ្នានោះទេ ។ នេះជាការប្រកួតលើកដំបូងដែលព្រឹត្តិការណ៍ Thai Fight បានបើកការប្រកួតនៅក្នុងប្រទេសកម្ពុជា ដោយប្រាក់ចំណូលដែលបានពីការលក់សំបុត្រ និងប្រាក់ដែលបានបរិច្ចាគដាក់ក្នុងហិបនៅក្នុងពិធីនោះ ក្រុមហ៊ុន ISUZU ដែលជាអ្នកចំណាយការរៀបចំបានយកប្រាក់ចំណេញទាំងស្រុងដែលសល់ពីការចំណាយប្រមាណជាង៨ពាន់ដុល្លារជួយដល់មន្ទីរពេទ្យគន្ធបុប្ផា ទើបធ្វើឱ្យព្រឹត្តិការណ៍ទាំងមូលទទួលបានសំឡេងអបអរសាទរយ៉ាងកងរំពងតែម្ដងនៅពេលប្រកាសថា ប្រាក់ចំណេញគឺក្រុមហ៊ុនយកទៅជួយដល់ពេទ្យគន្ធបុប្ផា។
ការប្រកួតដែលបានធ្វើឡើងនៅស្ដាតអូឡាំពិកនេះ មានអ្នកទិញសំបុត្រយ៉ាងណែនណាន់តាន់តាប់តែម្ដង ដោយនៅកៅអីខាងក្រោមគឺគ្មានកន្លែងអង្គុយ ហើយកៅអីនៅខាងលើទាំង៣ជ្រុងនៅសល់កន្លែងចំហតិចតួចប៉ុណ្ណោះ ទើបទោះជាបានចំណាយអស់ច្រើនហើយតម្លៃសំបុត្រទាបខុសពីនៅស្រុកគេ ក៏សល់ប្រាក់ចំណេញជាង៨ពាន់ដុល្លារសម្រាប់ជួយដល់ពេទ្យគន្ធបុប្ផា ដោយមិនទាន់រាប់បញ្ចូលប្រាក់បរិច្ចាគក្នុងហិប ។
លោក ថូស៊ីអាគិ ម៉ាអេខាវ៉ា អគ្គនាយកក្រុមហ៊ុន Tri Petch Isuzu Sales Co.,Ltd. ដែលបានបោះទុនរៀបចំព្រឹត្តិការណ៍នេះអះអាងថា ការប្រកួតមួយនេះទម្រាំតែអាចទាញឱ្យមកប្រកួតនៅក្នុងប្រទេសកម្ពុជា គឺមានការចំណាយអស់ច្រើន ប៉ុន្តែលោកសម្រេចមិនយកតម្លៃសំបុត្រដែលបានដាក់លក់មកទូទាត់នឹងការចំណាយក្នុងផ្នែកណាមួយវិញទេ គឺលោកនឹងប្រគល់ប្រាក់ចំណូលដែលទទួលបានទាំងអស់ទៅឱ្យមន្ទីរពេទ្យគន្ធបុប្ផា ។
លោកថា ព្រឹត្តិការណ៍នេះត្រូវបាននាំមកប្រទេសកម្ពុជានៅអំឡុងខែវិច្ឆិកា នេះ គឺដោយសារតែស្របគ្នានឹងខួប៦៧ឆ្នាំនៃចំណងមិត្តភាពរវាងប្រទេសថៃ និងកម្ពុជាផង និងដើម្បីឱ្យកាន់តែមានទំនាក់ទំនងគ្នាកាន់តែល្អផងក្នុងនាមជាប្រទេសជិតខាងគ្នា។
លោកថា នាពេលកន្លងមកក្រុមហ៊ុនរបស់លោកបានរៀបចំការប្រដាល់នៅក្នុងប្រទេសថៃដែលមានឈ្មោះថា ISUZU Cup រយៈពេល២៨ឆ្នាំមកហើយ ដោយកម្មវិធីមួយនេះទទួលបានជោគជ័យយ៉ាងខ្លាំងនៅក្នុងប្រទេសថៃ ទើបលោកសម្រេចជ្រោមជ្រែងកម្មវិធីការប្រដាល់មួយនេះ ហើយបានចំណាយបោះទុនយកមកប្រកួតនៅកម្ពុជាដើម្បីចែករំលែកបទពិសោធន៍ និងដើម្បីឱ្យអ្នកគាំទ្រកីឡាករទូទាំងពិភពលោកចាប់អារម្មណ៍ពីកម្ពុជា ។ លោកថា ការប្រកួតមួយនេះ បានទទួលជោគជ័យយ៉ាងខ្លាំង ជាពិសេសគឺជ័យជម្នះរបស់កីឡាករកម្ពុជាដែលបានវាយផ្ដួលកីឡាករខ្លាំងៗមកពីទ្វីបផ្សេងៗធ្វើឱ្យមានការទទួលស្គាល់ពីក្បាច់គុនខ្មែរកាន់តែខ្លាំងលើឆាកអន្តរជាតិ ។ ព្រឹត្តិការណ៍នេះក៏ទទួលបានកិត្តិយសដ៏ធំធេងពីការអញ្ជើញចូលរួមជាអធិបតីពីសំណាក់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិផងដែរ ។
ងាកទៅកាន់ការប្រកួតវិញ កីឡាករ ពេជ្រ ម្ទេសខ្មាំង(ណាត ស៊ៀកនីន) ប្រើពេលត្រឹមតែ១នាទីដំបូងប៉ុណ្ណោះក្នុងការផ្ដួលកីឡាករប្រេសុីល Jonathans Silva ឱ្យបោះបង់ការប្រកួតបាន។ តាមការអះអាង ក្រៅពីទទួលបានតម្លៃខ្លួន១ពាន់ដុល្លារ កីឡាករកម្ពុជារូបនេះក៏ទទួលបានប្រាក់ឧបត្ថម្ភពីក្រុមហ៊ុនអាកាសចរណ៍មួយចំនួន១ពាន់ដុល្លារ និងទទួលបានប្រាក់ឧបត្ថម្ភពីក្រុមហ៊ុនភេសជ្ជៈមួយចំនួន១ពាន់ដុល្លារផងដែរ។
កីឡាករ ឃីម ឌីម៉ា(ឃុន ឌីម៉ា) ដែលត្រូវគេស្គាល់ជាម្ចាស់មេដាយមាសស៊ីហ្គេមមុននេះ បានត្រឹមតែឈ្នះពិន្ទុកីឡាកររុស្សុី Dimitri Mordvinov ប៉ុណ្ណោះ ។ ចំណែកកីឡាករកម្ពុជា២រូបទៀត គឺឡៅ ចិត្រា ឈ្នះពិន្ទុកីឡាកររុស្សុី Kazbek Alisultanov និងកីឡាករ ម៉ឺន សុភា ឈ្នះកីឡាករន័រវែស Muhammad Khalil ដោយពិន្ទុដូចគ្នា ។ សម្រាប់កីឡាករថៃទាំង៤រូបក៏ឈ្នះគូប្រកួតទាំង៤ដូចកីឡាករកម្ពុជាដែរ៕
ចែករំលែកព័តមាននេះ