ទីក្រុងវ៉ាស៊ីនតោន ៖ ខណៈប្រទេសកាណាដា ម៉ិកស៊ិក និងសហរដ្ឋអាមេរិក ផ្តោតការចរចាដំណាក់កាលបន្ទាប់ លើកិច្ចព្រមព្រៀងពាណិជ្ជកម្មសេរីអាមេរិកខាងជើង រដ្ឋាភិបាលដទៃរបស់ទ្វីបអាមេរិកមានសំណួរទាក់ទងនឹងការធ្វើពាណិជ្ជកម្ម ។ តើប្រទេសណានឹងក្លាយជាដៃគូពាណិជ្ជកម្មធំរបស់ពួកគេនាពេលអនាគត…
ទីក្រុងវ៉ាស៊ីនតោន ៖ ខណៈប្រទេសកាណាដា ម៉ិកស៊ិក និងសហរដ្ឋអាមេរិក ផ្តោតការចរចាដំណាក់កាលបន្ទាប់ លើកិច្ចព្រមព្រៀងពាណិជ្ជកម្មសេរីអាមេរិកខាងជើង រដ្ឋាភិបាលដទៃរបស់ទ្វីបអាមេរិកមានសំណួរទាក់ទងនឹងការធ្វើពាណិជ្ជកម្ម ។
តើប្រទេសណានឹងក្លាយជាដៃគូពាណិជ្ជកម្មធំរបស់ពួកគេនាពេលអនាគត ? សហរដ្ឋអាមេរិក អឺរ៉ុប ឬប្រទេសចិន ?
ចម្លើយក្នុងរយៈពេលជាង១០០ឆ្នាំមកនេះ គឺសហរដ្ឋអាមេរិក ព្រោះប្រទេសនេះស្ថិតនៅក្នុងទ្វីបនេះ និងមានអំណាចសេដ្ឋកិច្ចខ្លាំងក្លា ។ អាមេរិកឡាទីន ក៏ជាដៃគូពាណិជ្ជកម្មដ៏សំខាន់ជាមួយរដ្ឋចំនួន៣៧ របស់សហរដ្ឋអាមេរិកផងដែរ ។
ក្នុងឆ្នាំ២០១៦ ក្រុមហ៊ុនអាមេរិកបាននាំចេញផលិតផល និងសេវាកម្មសរុបមានតម្លៃប្រមាណ៥១៥ប៊ីលានដុល្លារទៅកាន់អាមេរិកឡាទីន និង Caribbean ច្រើនជាងការនាំចេញទៅកាន់ប្រទេសចិន ដល់ទៅ៣ដងឯណោះ ។ លើសពីនេះ សហរដ្ឋអាមេរិកមានឱនភាពពាណិជ្ជកម្មជាមួយចិន ខណៈមានផលលើសពាណិជ្ជកម្មជាមួយប្រទេសដទៃក្នុងទ្វីបអាមេរិក ។
ទោះជាយ៉ាងណា ស្ថានការណ៍នេះបានផ្លាស់ប្តូរយ៉ាងលឿន ដោយសារកត្តាដែលជំរុញឲ្យប្រទេសចិនលូតលាស់ក្នុងល្បឿនលឿន ។ ប៉ុន្តែវាក៏បង្ហាញពីយុទ្ធសាស្ត្ររយៈពេលវែងរបស់ប្រទេសចិនផងដែរ ក្នុងការបន្តតំណែងជាទីផ្សារទាក់ទាញជាងគេលើពិភពលោក ។
ក្នុងឆ្នាំ២០៣០ អាមេរិកឡាទីន និង Caribbean នឹងមានពលរដ្ឋសរុបប្រមាណ៧២០លាននាក់ ។ យោងតាមការព្យាករឲ្យដឹងថា GDP របស់ពួកគេនឹងស្មើប្រមាណ៩ទ្រីលានដុល្លារទៀតផង ។
លើសពីនេះ ប្រទេសក្នុងអាមេរិកឡាទីន និង Caribbean កំពុងតែខិតជិតការធ្វើសមាហរណកម្មផងដែរ ។ បច្ចុប្បន្ន ការធ្វើពាណិជ្ជកម្មរវាងប្រទេសអាមេរិកឡាទីន និង Caribbean ៨០% គឺមិនយកពន្ធទេ ។ វិធានការសម្របសម្រួលការធ្វើពាណិជ្ជកម្មជាច្រើន ក៏ត្រូវបានអនុម័តដែរ ។
និន្នាការខិតជិតការធ្វើសមាហរណកម្មនេះ នឹងផ្តល់ឱកាសមួយចូលទៅក្នុងទីផ្សារមានសក្តានុពលជាច្រើន ។ ចិនកំពុងតែទិញ និងសាងសង់រោងចក្រនៅប្រទេសប្រេស៊ីល ហើយអាចចែកចាយផលិតផលរបស់ពួកគេក្នុងលក្ខខណ្ឌល្អជាមួយប្រទេសជិតខាង ខណៈអាចទិញយកគ្រឿង និងវត្ថុធាតុដើមក្នុងតម្លៃទាប ។
សហភាពអឺរ៉ុបក៏ទទួលស្គាល់ពីសក្តានុពលរបស់អាមេរិកឡាទីនដែរ ប៉ុន្តែសហភាពអឺរ៉ុបនាំចេញទៅកាន់អាមេរិកឡាទីនកាន់តែតិចជាងមុន ស្មើតែ១៣,៥%នៃការនាំចូលសរុបរបស់អាមេរិកឡាទីនប៉ុណ្ណោះ ។ ពួកគេក៏ខិតខំបង្កើនការនាំចេញផងដែរ ដោយការចុះកិច្ចព្រមព្រៀង ។
ទោះជាយ៉ាងណា ចិនបន្តខិតខំប្រឹងប្រែងដើម្បីរក្សាជំហរដ៏មានអត្ថប្រយោជន៍របស់ខ្លួននៅអាមេរិកឡាទីន រួមមាន ការវិនិយោគផ្ទាល់ជាច្រើនក្នុងតំបន់នេះ ។ យោងតាមការព្យាករមួយចំនួនឲ្យដឹងថា ចិនបានវិនិយោគប្រាក់ប្រមាណ១០៦ប៊ីលានដុល្លារទៅកាន់អាមេរិកឡាទីន ក្នុងរយៈពេលប៉ុន្មានឆ្នាំថ្មីៗនេះ រួមមាន ៦០ប៊ីលានដុល្លារក្នុងប្រទេសប្រេស៊ីល ។
ការវិនិយោគរបស់ចិនភាគច្រើន គឺក្នុងវិស័យកសិកម្ម អគ្គិសនី និងគម្រោងជីករ៉ែថ្មជាដើម ប៉ុន្តែក៏មានកំណើនក្នុងផ្នែកផលិតកម្ម ដែលបង្កើតការងារមានប្រាក់បៀវត្សរ៍ខ្ពស់ផងដែរ ។
លើសពីនេះ ប្រទេសចិនក៏ដើរតួយ៉ាងសំខាន់ក្នុងការអភិវឌ្ឍហេដ្ឋារចនាសម្ព័ន្ធរបស់អាមេរិកឡាទីន ដោយការប្រើប្រាស់គំនិតផ្តួចផ្តើមខ្សែក្រវាត់ និងវិថីរបស់ខ្លួន ។ ផ្ទុយពីប្រទេសចិន និងសហភាពអឺរ៉ុប អាមេរិកបែរជាមិនសូវសកម្មក្នុងការដណ្តើមចំណែកទីផ្សារទៅវិញ ។ ប៉ុន្តែអាមេរិកអាចនឹងស្នើឲ្យមានសមាហរណកម្ម ។ អាមេរិកក៏មានចំណាប់អារម្មណ៍លើផ្នែកអគ្គិសនីក្នុងតំបន់នេះដែរ ។
ទោះជាយ៉ាងណា ខណៈពិភពលោកកំពុងជួបប្រទះនឹងភាពមិនប្រាកដប្រជា គោលគំនិត «ផលិតក្នុងអាមេរិក» បានផ្តល់ចំណុចពិសេសរួមមួយក្នុងតំបន់ ។ បើវាត្រូវបានអនុម័ត អាមេរិកអាចនឹងងាកមកកាន់ក្រុមប្រទេសទាំងនេះម្តងទៀត ៕
ដកស្រង់ពី Project-syndicate
ចែករំលែកព័តមាននេះ