រាជធានីភ្នំពេញ ៖ បុរសជាជនរងគ្រោះម្នាក់បានរងគ្រោះត្រង់ដៃ ជើង និងដងខ្លួនរបួសធ្ងន់ធ្ងរ ខណៈជិះម៉ូតូមួយគ្រឿងទៅធ្វើការងារ ហើយត្រូវបានរថយន្តមួយគ្រឿងបើកយ៉ាងលឿនមកបុក ករណីគ្រោះថ្នាក់ចរាចរណ៍កើតឡើងកាលពីវេលាម៉ោង៤និង៣០នាទីល្ងាចថ្ងៃទី២៦ ខែវិច្ឆិកា ឆ្នាំ២០១៧ នៅចំណុចផ្លូវលេខ ៤៣២កែង និងផ្លូវលេខ១៦៧ ក្នុងសង្កាត់ទួលទំពូងទី២ ខណ្ឌចំការមន ។
នគរបាលបានប្រាប់ឲ្យដឹងថា បុរសរងគ្រោះឈ្មោះថន ពិសិដ្ឋ អាយុ២៤ឆ្នាំ បុគ្គលិកក្រុមហ៊ុន មានទីលំនៅផ្ទះលេខ២៨ ផ្លូវលេខ៤៤៦ ក្នុងសង្កាត់ទួលទំពូងទី១ ខណ្ឌចំការមន ។
មុនពេលកើតហេតុ បុរសរងគ្រោះបានចេញពីផ្ទះដោយជិះម៉ូតូ ពណ៌ត្រួយចេក ស្លាកលេខភ្នំពេញ១AD-៨២៩២ មួយគ្រឿង ជិះក្នុងពីកើតទៅលិចតាមបណ្តោយផ្លូវលេខ ៤៣២ លុះមកដល់ចំណុចកើតហេតុ ដែលជាផ្លូវបំបែកជាបួននោះ ស្រាប់តែមានរថយន្តមួយគ្រឿងបើកក្នុងទិសដៅពីជើងទៅត្បូងបុកបណ្តាលឲ្យដួល និងខ្ទាតមនុស្សចេញទៅឆ្ងាយ ។ ចំណែកឯម៉ូតូខ្ទាតទៅចូលក្រោមរថយន្តមួយគ្រឿងទៀតផងដែរ ។ តាមប្រភពដដែលបានប្រាប់បន្តទៀតថា ក្រោយពេលកើតហេតុ រថយន្តមួយគ្រឿងនោះបានបើករត់គេចខ្លួនបាត់ស្រមោល ដោយបានបន្សល់ទុកស្លាកលេខដែលមានលេខ ២AN-៤៤៥៣ មួយបន្ទះ និងជនរងគ្រោះ និងម៉ូតូប៉ុណ្ណោះ។
បុរសជាជនរងគ្រោះត្រូវបានក្រុមគ្រួសារបញ្ជូនយកទៅធ្វើការព្យាបាលនៅឯមន្ទីរពេទ្យ ចំណែកឯម៉ូតូរបស់ជនរងគ្រោះ និងស្លាកលេខដែលមានលេខ ២AN-៤៤៥៣ មួយបន្ទះនោះ ត្រូវបានយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីធ្វើការស្រាវជ្រាវរកម្ចាស់រថយន្តខាងលើមកធ្វើការដោះស្រាយគ្នាជាបន្តទៅទៀត ៕
ចែករំលែកព័តមាននេះ