រាជធានីភ្នំពេញ ៖ ការនាំចេញអង្កររបស់កម្ពុជាទៅកាន់ទីផ្សារបរទេស រយៈពេលជិត១ឆ្នាំ២០១៧នេះឃើញថា នៅតែបន្ដមានកំណើន ហើយបើពិនិត្យតាមតួលេខនាំចេញប្រចាំខែ អាចព្យាករបានថា នៅដំណាច់ឆ្នាំ២០១៧នេះ ការនាំចេញអង្ករនឹងមានកំណើនតិចតួច បើធៀបនឹងឆ្នាំ២០១៦…
រាជធានីភ្នំពេញ ៖ ការនាំចេញអង្កររបស់កម្ពុជាទៅកាន់ទីផ្សារបរទេស រយៈពេលជិត១ឆ្នាំ២០១៧នេះឃើញថា នៅតែបន្ដមានកំណើន ហើយបើពិនិត្យតាមតួលេខនាំចេញប្រចាំខែ អាចព្យាករបានថា នៅដំណាច់ឆ្នាំ២០១៧នេះ ការនាំចេញអង្ករនឹងមានកំណើនតិចតួច បើធៀបនឹងឆ្នាំ២០១៦ ខណៈរយៈពេល១០កន្លងមកនេះ ការនាំចេញមានចំនួនជាង៤៩ម៉ឺនតោន បើធៀបនឹងរយៈពេលដូចគ្នាឆ្នាំ២០១៦ មានចំនួនជាង៤២ម៉ឺនតោន ។ ចំណែកការនាំចេញសរុបក្នុងឆ្នាំ២០១៦ មានចំនួនជាង៥៤ម៉ឺនតោន ធៀបនឹងឆ្នាំ២០១៥ ការនាំចេញសម្រេចបានជាង៥៣ម៉ឺនតោន ។
តាមអ្នកជំនាញក្នុងវិស័យស្រូវអង្ករកម្ពុជាមើលឃើញថា ការនាំចេញអង្ករសរុបក្នុងឆ្នាំ២០១៧នេះ នៅតែបន្តកើនឡើងដោយផ្អែកលើតម្រូវការទីផ្សារនៅប្រទេសចិន ។
លោកឧកញ៉ា សុង សារ៉ន អគ្គនាយកក្រុមហ៊ុន អេមរុ រាយស៍ មានប្រសាសន៍កាលពីថ្ងៃទី២៦ វិច្ឆិកា ថា ៖« ផ្អែកលើការបង្កើនចំនួនកូតាបញ្ជាទិញរបស់ប្រទេសចិន ក្នុងឆ្នាំ២០១៧នេះ ការនាំចេញអង្ករសរុបអាចនឹងកើនដល់៦០ម៉ឺនតោន លើសឆ្នាំទៅ ជាង៥ម៉ឺនតោន » ។
លោកឧកញ៉ាបន្តថា ៖« នៅ២ខែចុងក្រោយនេះ គ្មានចំណុចណាមួយដែលអាចធ្វើឱ្យប៉ះពាល់ដល់ការនាំចេញអង្កររបស់កម្ពុជាទេ ។ ការនាំចេញនឹងកើនឡើង ដោយសារប្រទេសចិនបានបញ្ជាទិញកើនឡើង ។ ដូច្នេះ អ្វីដែលគាត់បញ្ជាទិញ គាត់នឹងទិញ ហើយយើងរង់ចាំតែវេចខ្ចប់ឱ្យគាត់ប៉ុណ្ណោះ អីចឹង គ្មានហេតុផលអ្វីដែលធ្វើឲ្យការនាំចេញអង្ករត្រូវថយចុះទេ » ។
លោកឧកញ៉ា វង្ស ប៊ុនហេង នាយកក្រុមហ៊ុនវង្សប៊ុនហេង រ៉ាយស៍ មានប្រសាសន៍ថា ៖«ការនាំចេញអង្ករនៅឆ្នាំ២០១៧ អាចនឹងកើនឡើងបន្ថែមជាង២ម៉ឺនតោន ដោយសារនៅខែវិច្ឆិកា និងខែធ្នូនេះ ជារដូវប្រមូលផលនិងជំរុញការផលិតនាំចេញ ។ ក្នុងឆ្នាំនេះដែរ ខ្ញុំមើលមិនឃើញថា មានចំណុចណាដែលថា ការនាំចេញអង្ករថយចុះទេ គឺមានតែកើន ឡើង ។ បើយើងគិតពីចំនួនកូតាចិន កើនឡើងរហូតក្នុង១ឆ្នាំ កើនឡើង១០ម៉ឺនតោន ហើយអឺរ៉ុបគឺជាទីផ្សារមួយថេរ » ។
តាមមន្ត្រីជំនាញលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ លោក ឌិន នរិន្ធ បានឲ្យដឹងថា បរិមាណនាំចេញអង្ករសរុបនៅឆ្នាំ២០១៧នេះ នឹងនៅតែបន្តកើនឡើង គ្មានទេការថយចុះ ។ ជាក់ស្តែង ក្នុងខែវិច្ឆិកា ឆ្នាំ២០១៧នេះ ការនាំចេញអង្ករទៅបរទេស នៅតែមានសន្ទុះកើនឡើងដូចគ្រាមុនៗ ។
បើទោះបីជាកម្ពុជាមិនបានសម្រេចតាមទិសដៅនាំចេញ១លានតោនក្នុង១ឆ្នាំ ចាប់ពីឆ្នាំ២០១៥មកក្ដី ក៏កម្ពុជានៅតែរក្សាការប្តេជ្ញាចិត្ត និងខិតខំអភិវឌ្ឍន៍ ក៏ដូចជាកៀងគរវិនិ យោគិនបរទេសមកបណ្ដាក់ទុនលើវិស័យនេះ ធ្វើយ៉ាងណា ឲ្យកាន់តែប្រសើរឡើង ។
ជាក់ស្ដែង ការចុះអនុស្សរណៈយោគយល់គ្នា ស្ដីពីគម្រោងជំរុញផលិតកម្មស្រូវ និងការនាំចេញអង្កររវាងរដ្ឋាភិបាលកម្ពុជា និងចិន ដើម្បីបង្កើតប្រព័ន្ធឃ្លាំងសាធារណៈសម្រាប់ស្តុកស្រូវជាដើម ។
បើតាមសេចក្ដីប្រកាសព័ត៌មានពីក្រសួងសេដ្ឋកិច្ច និងហិរញ្ញវត្ថុ តាមការសិក្សាបឋម គម្រោងនឹងសាងសង់ប្រព័ន្ធឃ្លាំងស្តុក និងឡសម្ងួតស្រូវ ចំនួន១៥ ដែលមានសមត្ថភាពសម្ងួតស្រូវសើមដល់ទៅ១៩.៥០០តោនក្នុង១ថ្ងៃ និងស្តុកស្រូវបានដល់ទៅ១លានតោន ដែលគ្រោងនឹងសាងសង់ក្នុងខេត្តមានសក្តានុពលផលិតស្រូវ ចំនួន១១ ។ គម្រោងនេះមិនត្រឹមតែមានការសាងសង់ហេដ្ឋារចនាសម្ព័ន្ធទេ ប៉ុន្តែរួមទាំងមានប្រតិបត្តិការ ការថែទាំល្អ និងប្រព័ន្ធគ្រប់គ្រងវត្ថុបញ្ចាំ ដើម្បីសម្របសម្រួលផ្តល់ឥណទាន ដោយប្រើប្រាស់ឃ្លាំងស្តុកស្រូវអង្ករជាវត្ថុបញ្ចាំ ។
គម្រោងនេះមានលទ្ធផលរំពឹងទុកដូចជា បង្កើនសមត្ថភាពសម្ងួត និងស្តុកស្រូវអង្ករ ក្នុងបរិមាណ១លានតោន ។ ទន្ទឹមគ្នានឹងការបង្កើនលទ្ធភាពទទួលឥណទានសម្រាប់ពង្រីកទុនបង្វិល ដែលនឹងកាត់បន្ថយការហូរចេញស្រូវទៅប្រទេសជិតខាង, ពង្រឹងខ្សែសង្វាក់ផ្គត់ផ្គង់ស្រូវ, បង្កើនការបញ្ជាទិញសម្រាប់ការនាំចេញ, បង្កើនតម្លៃបន្ថែម និងចំណូលក្នុងវិស័យស្រូវអង្ករកម្ពុជាព្រមទាំងធ្វើឲ្យតម្លៃស្រូវមានស្ថិរភាពសម្រាប់កសិករ ។
ទន្ទឹមនឹងនេះ នៅដើមឆ្នាំ២០១៨ខាងមុខ ក្រុមហ៊ុន២ដែលទទួលបានការដេញថ្លៃសាងសង់ឃ្លាំងស្តុក និងឡសម្ងួតស្រូវពីធនាគារអភិវឌ្ឍន៍ជនបទរបស់រាជរដ្ឋាភិបាលកម្ពុជា នឹងដំណើរការឡសម្ងួត និងឃ្លាំងស្តុកស្រូវ ដែលបានសង់នៅខេត្តចំនួន៣ ។
ដំណើរការឡសម្ងួត និងឃ្លាំងស្តុកស្រូវនេះ នឹងអាចជួយឲ្យវិស័យស្រូវអង្កររបស់កម្ពុជា មានភាពល្អប្រសើរឡើងវិញ ជាពិសេស ជួយកសិករកម្ពុជាបានច្រើន មិនធ្វើឲ្យខូចខាតស្រូវដូចកាលពីពេលមុនៗទៀត ៕
ចែករំលែកព័តមាននេះ