រាជធានីភ្នំពេញ៖ ស្ត្រីមិនស្គាល់អត្តសញ្ញាណម្នាក់បានចុះពីរថយន្តតាក់ស៊ី១គ្រឿង ដោយមានពកូនស្រីអាយុប្រហែលជាង១ខួបម្នាក់ផងនោះ រួចបានឡើងជិះរថយន្ត១គ្រឿងផ្សេងទៀត ដោយបានប្រាប់អ្នកបើកបររថយន្តថា ធ្វើដំណើរតាមផ្លូវជាតិលេខ៣ លុះបន្តិចក្រោយមកបានប្រាប់អ្នកដំណើរដូចគ្នាថា បានភ្លេចទូរស័ព្ទទដៃ១គ្រឿងនៅក្នុងរថយន្តឈ្នួលដែលជិះមុនដំបូងនោះ។ បន្ទាប់មកបានផ្ញើកូនទៅស្ត្រីអ្នកដំណើរម្នាក់ រួចរត់ដេញតាមរថយន្តដែលខ្លួនភ្លេចទូរស័ព្ទនោះ តែរត់មិនទាន់ឡើយក្រោយមកមិនដឹងថាទៅណាទៀតនោះទេ ក៏ស្រាប់តែបាត់ដំណឹងសូន្យឈឹង មិនឃើញត្រលប់ទៅយកកូនវិញឡើយ។ ចំណែកស្ត្រីអ្នកទទួលបញ្ញើកូនគេ បានយកក្មេងស្រីខាងលើទៅប្ដឹងនគរបាលខណ្ឌពោធិ៍សែនជ័យ ដែលកំពុងប្រចាំការនៅគោលដៅមុខច្រកចូលអាកាសយានដ្ឋានអន្តរជាតិភ្នំពេញ ដើម្បីជួយស្រាវជ្រាវរកម្ដាយប៉ុន្តែរកមិនឃើញទើបនាំយកទៅប្រគល់ជូនខាងសាខាការិយាល័យវិទ្យុ អេប៊ីស៊ី ពោធិ៍ចិនតុងជួយប្រកាសស្វែងរក ប៉ុន្តែនៅតែមិនបានរកឃើញស្ត្រីជាម្ដាយនោះដដែល ហើយទោះបីជាស្ត្រីអ្នកទទួលបញ្ញើរួមជាមួយបុគ្គលិកវិទ្យុអេប៊ីស៊ី លួងយ៉ាងណាក៏ក្មេងស្រីខាងលើនោះបានយំមិនឈប់ឡើយ។
ម្យ៉ាងទៀតនៅមិនទាន់ដឹងថា តើស្ត្រីជាម្ដាយដែលយកកូនស្រីរូបនេះទៅប្លុងចោល ឬបែបណានោះទេ។ ហេតុការណ៍នោះបានកើតឡើង កាលពីវេលាម៉ោង៣និង១៥នាទីរសៀល ថ្ងៃទី២៦ ខែវិច្ឆិកា ឆ្នាំ២០១៧ នៅចំណុចគល់ស្ពានអាកាស៧មករា ពេទ្យលោកសង្ឃ ស្ថិតនៅក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ ក្មេងស្រីខាងលើនោះមានអាយុប្រហែលជា១ខួបប៉ុណ្ណោះ មានរូបរាងស្អាតគួរឲ្យស្រលាញ់ ហើយមិនត្រូវបានគេស្គាល់អត្តសញ្ញាណម្ដាយរបស់នាងឡើយ។ ចំណែកស្ត្រីដែលទទួលក្មេងស្រីនោះពីម្ដាយឈ្មោះ ទូច មុំ អាយុ៤៦ឆ្នាំ មុខរបរលក់ដូរមុខរោងចក្រកាត់ដេរ មានទីលំនៅក្នុងភូមិអង្គសុគន្ធា ឃុំមហាឥសី ស្រុកគងពិសី ខេត្តកំពង់ស្ពឺ។ ស្ត្រីរូបនេះបាននិយាយថា នៅមុនពេលកើតហេតុគាត់បានជិរថយន្តឈ្នួល១គ្រឿង ម៉ាកសាំយ៉ុង ពាក់ស្លាកលេខ ភ្នំពេញ2AP-8210 ដឹកអីវ៉ាន់ចេញពីភ្នំពេញឆ្ពោះទៅផ្ទះនៅក្នុងខេត្តកំពង់ស្ពឺ លុះពេលទៅដល់ត្រង់ចំណុចគល់ស្ពានអាកាស៧មករា រថយន្តឈ្នួលនោះបានឈប់ដាក់ម៉ូយថែម។ ខណៈនោះស្រាប់តែមានរថយន្តឈ្នួល១គ្រឿងទៀត មិនចាំម៉ាក និងស្លាកលេខបានទៅឈប់នៅជិតនោះដែរ បន្ទាប់មកមានស្ត្រីម្នាក់ បានចុះពីលើរថយន្តនោះ រួចបានដើរទៅកាន់រថយន្តដែលគាត់កំពង់ជិះនោះ។
ពេលទៅដល់ស្ត្រីខាងលើបានសួរថា《តើរថយន្តនេះទៅតាមផ្លូវជាតិលេខ៣អត់》ម្ចាស់រថយន្តក៏បានប្រាប់ថា《ដល់តើ》 ពេលនោះស្ត្រីខាងលើក៏បានប្រាប់ថា《ចឹងខ្ញុំទៅដែរ》បន្ទាប់មកបានឡើងជិះរថយន្តនោះតែម្ដង ប៉ុន្តែរថយន្តមិនបានចេញដំណើរភ្លាមៗនោះទេ។ ប្រភពដដែលបានបន្តទៀតថា ក្រោយពេលឡើងដល់លើរថយន្តបន្តិច ស្ត្រីរូបនោះបានសួរទៅកាន់អ្នកនៅលើរថយន្តទាំងអស់ រួមទាំងអ្នកបើកបររថយន្តផងថា《តើមាននរណាមានប្រព័ន្ធទូរស័ព្ទស្មាតអត់ ខ្ញុំខ្ចីខលបន្តិចព្រោះអីខ្ញុំភ្លេចទូរស័ព្ទនៅលើរថយន្តដែលខ្ញុំជិះមុនបាត់ហើយ?》។ ប៉ុន្តែខណៈនោះអ្នកនៅលើរថយន្តទាំងអស់បានប្រាប់វិញថា《អត់មានទេ》ហើយស្ត្រីរូបនោះបានពកូនចុះរត់ដេញតាមរថយន្ត ដែលខ្លួនភ្លេចទូរស័ព្ទនោះ ប៉ុន្តែដេញតាមមិនទាន់ទេ រួចហើយបានពកូនស្រីរត់ត្រលប់ក្រោយវិញ ហើយបាននិយាយទៅកាន់គាត់ថា《អីចឹងខ្ញុំសុំផ្ញើកូនស្រីឲ្យបងជួយមើលបន្តិច ខ្ញុំដេញតាមយកទូរស័ព្ទសិន》 រួចក៏ហុចកូនស្រីទៅឲ្យគាត់ហើយរត់តាមរថយន្តនោះបន្តទៀត ប៉ុន្តែរត់មិនទាន់ទេក្រោយមកក៏ឈប់។
ប្រភពខាងលើបានបន្តទៀតថា បន្ទាប់មកទៀតរថយន្តដែលគាត់ជិះនោះបានចេញដំណើរ ហើយដោយសារតែទីនោះចង្អៀតនគរបាលមិនឲ្យឈប់រថយន្តខ្លាចមានការកកស្ទះចរាចរណ៍ ទើបរថយន្តបើកទៅមុខយឺតៗ ហើយគាត់បានស្រែកឲ្យស្ត្រីនោះរត់ឡើងរថយន្ត និងយកកូនវិញដែរ ប៉ុន្តែនាងមិនព្រមឡើងទេ និងបានរត់ឡើងជិះរថយន្តផ្សេងទៅវិញ។ បន្ទាប់គាត់បានយកក្មេងស្រីម្នាក់នេះទៅកាន់គោលដៅនគរបាលចរាចរណ៍ខណ្ឌពោធិ៍សែនជ័យ ចំណុចភ្លើងស្តុបមុខច្រកចូលអាកាសយានដ្ឋានអន្តរជាតិភ្នំពេញ ដើម្បីឲ្យនគរបាលជួយស្រាវជ្រាវរកស្ត្រីនោះទៅទទួលយកកូនវិញ បន្ទាប់មកនគរបាលបាននាំយកក្មេងទៅប្រគល់ជូនខាងសាខាការិយាល័យ វិទ្យុអេប៊ីស៊ី ពោធិ៍ចិនតុងជួយប្រកាសស្វែងរកបន្ត។
ចំណែករូបគាត់បានពក្មេងស្រីម្នាក់នេះដោយផ្ទាល់ ដោយឲ្យរថយន្តឈ្នួលដឹកអីវ៉ាន់ទៅផ្ទះមុន ខណៈនោះខាងវិទ្យុ អេប៊ីស៊ី បានប្រកាសម្ដងហើយម្ដងទៀតជាច្រើនដង ប៉ុន្តែនៅតែមិនបានរកឃើញស្ត្រីជាម្ដាយនោះដដែល។ ដោយឡែកក្មេងស្រីនោះបានយំជាប់រហូតស្រែករកម្ដាយ ហើយទោះបីជារូបគាត់រួមជាមួយបុគ្គលិកវិទ្យុអេប៊ីស៊ី ខំលួងយ៉ាងណា ក៏ក្មេងស្រីខាងលើនោះបានយំមិនឈប់ឡើយ គឺយំឡើងទន់ខ្លួនតែម្ដង ហើយក្រោយមកដោយសារតែមិនឃើញម្ដាយទៅយក ទើបខាងបុគ្គលិកវិទ្យុអេប៊ីស៊ី បានយកក្មេងស្រីខាងលើទៅកាន់ស្ថានីយវិទ្យុ នៅឯភូមិព្រែកថ្លឹង សង្កាត់ព្រែកកំពឹស ខណ្ឌដង្កោ ដើម្បីប្រកាសស្វែងរកស្ត្រីជាម្ដាយបន្តទៀត៕
https://youtu.be/ospeIpWp1BY
ចែករំលែកព័តមាននេះ