រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសានបានឱ្យដឹងថា មជ្ឈមណ្ឌលសិទ្ធិមនុស្សនៅកម្ពុជា ហៅកាត់ថា (CCHR) គឺជារឿងចាំបាច់ មិនអាចទុកឱ្យអង្គការនេះនៅបន្តធ្វើប្រតិបត្តិការបម្រើផលប្រយោជន៍បរទេសនោះទេ ហើយក៏មាន «លទ្ធភាពខាងផ្លូវច្បាប់គ្រប់គ្រាន់នៅក្នុងដែនឯករាជ្យ និងអធិបតេយ្យភាពរបស់ព្រះរាជាណាចក្រកម្ពុជា»។
លោក សុខ ឥសាន បានបន្តថា បើតាមមាត្រា ៤៤៣ នៃក្រមព្រហ្មទណ្ឌកម្ពុជាចែងយ៉ាងច្បាស់ថា ជនណា ឬអង្គការណាដែលប្រព្រឹត្តអំពើសន្និដ្ឋិភាពឃុបឃិតជាមួយបរទេស បង្កើតអំពើប្រទូស្តរាយដល់ប្រទេសជាតិ ត្រូវប្រឈមនឹងបទល្មើសក្បត់ជាតិ ដែលត្រូវជាប់ទោសពី ១៥ឆ្នាំទៅ៣០ឆ្នាំ ។
អ្នកនាំពាក្យគណបក្សប្រជាជនកម្ពុជារូបនេះបញ្ជាក់ថា៖ «ដូច្នេះ CCHR ដែលលោក កឹម សុខា បានបង្កើតឡើងតាមការបញ្ជារបស់បរទេស គឺជាអង្គការធ្វើតាមបរទេសដែលចាំបាច់ត្រូវបិទមិនឱ្យធ្វើសកម្មភាពតទៅទៀតទេ។ បើបង្កើតឡើងដោយបរទេស ចៀសមិនរួចពីធ្វើការបម្រើបរទេសនោះទេ»។ លោក សុខ ឥសានឱ្យដឹងទៀតថា ភ័ស្តុតាងជាក់ស្តែងតាមរយៈសម្តីលោក កឹម សុខ បាននិយាយតាមប្រព័ន្ធផ្សព្វផ្សាយ CBN ច្បាស់មិនអាចប្រកែកបានឡើយ។
ការលើកឡើងរបស់លោក សុខ ឥសានធ្វើឡើងបន្ទាប់ពីសម្តេចតេជោ ហ៊ុន សែន បញ្ជាទៅក្រសួងមហាផ្ទៃឱ្យពិនិត្យផ្លូវច្បាប់បិទអង្គការនេះចោល។
យ៉ាងណាមិញ លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជាបានបញ្ចេញប្រតិកម្មលើ គណនីហ្វេសប៊ុករបស់នាងថា នាងបានធ្វើការ និងដឹកនាំមជ្ឈមណ្ឌលនេះអស់រយៈពេលជាង ១០ ឆ្នាំមកហើយ ។ ហើយក៏មានអតីតបុគ្គលិករបស់មជ្ឈមណ្ឌលសិទ្ធិមនុស្សកម្ពុជាមួយចំនួនតូចបានចូលប្រឡូកក្នុងនយោបាយ និងចូលរួមជាមួយគណបក្សនយោបាយនានាទាំងក្នុងគណបក្សកាន់អំណាច និងគណបក្សប្រឆាំង។
អ្នកស្រី ចក់ សុភាព បន្តថា «បើទោះបីជា CCHR គាំទ្រសិទ្ធិរបស់បុគ្គលគ្រប់រូបក្នុងការចូលប្រឡួកក្នុងឆាកនយោបាយ ក៏មជ្ឈមណ្ឌល CCHR មិនត្រូវបានរងឥទ្ធិពលណាមួយពីអតីតបុគ្គលិក ដែលបានចូលប្រឡូកក្នុងឆាកនយោបាយនោះទេ ។ ខ្ញុំមានកិត្តិយសដ៏ខ្ពង់ខ្ពស់ក្នុងការបំរើ CCHR រួមជាមួយសមាជិកក្រុមការងាររបស់យើង ហើយយើងប្តេជ្ញាបន្តបេសកកម្មរបស់យើង ក្នុងការលើកកម្ពស់ការគោរពសិទ្ធិមនុស្សនៅកម្ពុជាដោយផ្អែកលើមូលដ្ឋានគ្រឹះរបស់ស្ថាប័នស្តីពី ឯករាជ្យភាព តម្លាភាព សមភាព និងមានការរើសអើង»។
អ្នកស្រី ចក់ សុភាព សង្កត់ធ្ងន់ថា៖ «យើងមានទំនុកចិត្តថា ការស៊ើបអង្កេតដោយឯករាជ្យ និងមិនលំអៀងណាមួយ នឹងរកមិនឃើញកំហុស ពាក់ព័ន្ធនឹងផ្នែកណាមួយរបស់ CCHR ឡើយ»៕
ចែករំលែកព័តមាននេះ