រាជធានីភ្នំពេញ ៖ គិតចាប់ពីដើមឆ្នាំ២០១៧នេះមក ផលិតកម្មក្នុងស្រុកដែលចុះបញ្ជីត្រឹមត្រូវនៅក្រសួងវប្បធម៌និងវិចិត្រសិល្បៈមានចំនួន៥២ផលិតកម្មប៉ុណ្ណោះ ប្រៀបធៀបមុនឆ្នាំ២០១៧មានចំនួនប្រមាណ១៤៥ផលិតកម្មឯណោះ ។
ប្រធានស្តីទីនាយកដ្ឋានភាពយន្ត និងផ្សព្វផ្សាយវប្បធម៌លោកប៉ុក បូរ័ក្ស កាលពីពេល ថ្មីៗកន្លងមកឲ្យដឹងថា បើគិតមុនឆ្នាំ២០១៧ ផលិតកម្មក្នុងស្រុកមានចំនួនច្រើន ប៉ុន្តែក្នុងឆ្នាំ២០១៧ ចំនួនបានធ្លាក់ចុះមកនៅត្រឹមតែ៥២ផលិតកម្មប៉ុណ្ណោះដែលបានចុះបញ្ជីនៅក្រសួងវប្បធម៌ ។ ការធ្លាក់ចុះនៃចំនួនផលិតកម្មនេះ ដោយសាររាជរដ្ឋាភិបាលចេញច្បាប់យកពន្ធលើVat ក្នុងនោះក៏មានម្ចាស់ផលិតកម្មមួយចំនួនទៀតសុំច្បាប់បើករួចរាល់ហើយ តែមិនមានសកម្មភាពអ្វីទាំងអស់ទើបបិទទៅវិញ ។
ដោយឡែកពាក់ព័ន្ធទៅនឹងផលិតករមួយចំនួនដែលមានបំណងចង់បិទផលិតកម្មរបស់ខ្លួនក្រោយពេលចេញច្បាប់របស់ក្រសួងវប្បធម៌កាលពីពេល ថ្មីៗទៅលើការប្រកាសយកពន្ធទៅលើការបញ្ចាំងខ្សែភាពយន្តនោះ រហូតមកដល់ពេលនេះក្រសួងនៅមិនទាន់បានទទួលលិខិតណាមួយនៅឡើយទេក្នុងរយៈពេល២ខែចុងក្រោយនេះ ។
លោកប៉ុក បូរ័ក្ស បញ្ជាក់ថា ការយកពន្ធផ្សេងៗដែលបានធ្វើឡើងក្នុងសិក្ខាសាលាកន្លងទៅនោះគឺបានឯកភាពគ្នារួចហើយ ប៉ុន្តែការអនុវត្តជាក់ស្តែងនោះគឺនៅដំណាច់ឆ្នាំ២០១៨ខាងមុខនេះ ។ ចំណែកការស្នើសុំពីបណ្តាផលិតករលើការអនុគ្រោះពន្ធ ផ្សេងៗនោះគឺក្រសួងបានដាក់ជូនរាជរដ្ឋាភិបាលដើម្បីពនិត្យរួចរាល់ហើយ ប៉ុន្តែការសម្រេចបែបណានោះមិនទាន់ទទួលបានចម្លើយនៅឡើយទេ ។
បើតាមលោកប៉ុក បូរ័ក្ស ជាធម្មតាការបើកផលិតកម្មមួយគឺជាបន្ទុកមួយសម្រាប់ម្ចាស់ផលិតកម្មនោះផ្ទាល់ទៅលើពន្ធសម្រាប់បើកអាជីវកម្ម និងពន្ធលើសួយសារអាករ ផ្សេងៗទៀត ហើយទាំងអស់នេះគឺជាការអនុវត្តដូចគ្នានៅបណ្តាប្រទេសជាច្រើនទៀតផងដែរ ។
លោកប៉ុក បូរ័ក្ស ថ្លែងថា«សូមបណ្តាផលិតកម្ម និងផលិតករនានាសូមរក្សាភាពស្ងប់ស្ងាត់ ហើយរង់ចាំចម្លើយជាផ្លូវការណាមួយពីរាជរដ្ឋាភិបាលជាមុនសិន តើនឹងជួយអ្វីខ្លះជុំវិញបញ្ហានេះ ។ ប៉ុន្តែជាទូទៅកន្លងមករដ្ឋាភិបាលតែងតែយកចិត្តទុកដាក់ និងជួយដល់ផលិតករជាបន្តបន្ទាប់ ហើយរាល់ការស្នើសុំទាំងអស់គឺរដ្ឋាភិបាលតែងតែទទួលយកទៅគិតនិងពិចារណា ។
អ្វីដែលផលិតករទាំងអស់ត្រូវធ្វើនាពេលនេះគឺត្រូវខិតខំពង្រឹងគុណភាពដោយខ្លួនឯង ជៀសវាងធ្វើនំមិនឆ្ងាញ់ ហើយបង្ខំឲ្យទស្សនិកជនហូបនោះជាការលំបាក ។ បើទោះបីជារដ្ឋខិតខំជួយយ៉ាងណាក៏ដោយ ប៉ុន្តែការ ផលិតនៅតែគ្មានភាពទាក់ទាញទេ គឺផលិតករទាំងអស់មិនអាចប្រឈមក្នុងសម័យបច្ចុប្បន្ន ដែលជាសម័យសាកលភាវូបនីយកម្មនេះបានឡើយ ។ យើងមិនអាចបិទកុនបរទេសមិនឲ្យហូរចូលមកស្រុកខ្មែរបានឡើយ ព្រោះយើងមានការទាក់ទងពាណិជកម្មរវាងប្រទេស និងប្រទេស ដូច្នេះបើយើងផលិតនៅមានភាពទន់ខ្សោយនោះគឺយើងមិនអាចប្រកួតប្រជែងជាមួយគេបានឡើយ »។
ពាក់ព័ន្ធទៅនឹងការព្រួយបារម្ភពីសមាគមទូរទស្សន៍ជុំវិញការប្រកាសយកពន្ធទៅលើរឿងភាគនាំចូលពីបរទេសបញ្ចាំងតាមទូរទស្សន៍នោះលោកប៉ុក ប៉ូរ័ក្ស អះអាងថា នេះជាអ្វីដែលបានអនុម័តក្នុងកិច្ចប្រជុំអន្តរក្រសួង ដែលដឹកនាំដោយក្រសួងសេដ្ឋកិច្ចនិងហិរញ្ញវត្ថុ ។ ការយកពន្ធនេះគឺជាយុទ្ធសាស្ត្រមួយក្នុងការកៀរគរ និងការទប់ស្កាត់ការហូរចូលភាពយន្តបរទេស ។
លោកប៉ុក បូរ័ក្ស បញ្ជាក់ថា «បច្ចុប្បន្នការផលិតនៅក្នុងស្រុកនៅមានកម្រិត ហើយចំណាយខ្ពស់ តែការទិញ និងនាំចូលភាពយន្តបរទេសមកបញ្ចាំងក្នុងស្រុកវិញថោក ហេតុនេះនាំឲ្យមានការពិបាកក្នុងការប្រកួតប្រជែងនៅក្នុងស្រុក ។ ហេតុនេះយើងត្រូវរួមគ្នាក្នុងការអនុវត្តសេចក្តីសម្រេចនេះ ព្រោះយើងមិនចង់ឲ្យវប្បធម៌បរទេសហូរចូលមកសាបព្រោះនៅក្នុងស្រុកបន្តទៀតឡើយ បើទោះបីជាច្បាប់នេះជាការដាក់បន្ទុកបន្តិចមែន ប៉ុន្តែយ៉ាងហោចណាស់វាក៏ជារបាំងមួយសម្រាប់ទប់ស្កាត់ការហូរចូលនូវភាពយន្តបរទេសមួយផ្នែកផងដែរ» ៕
ចែករំលែកព័តមាននេះ