រាជធានីភ្នំពេញ ៖ ស្របពេលការបោះឆ្នោតថ្នាក់ជាតិកាន់តែខិតជិតមកដល់ អ្នកមួយចំនួនបានបង្ហាញពីការព្រួយបារម្ភទៅលើវិស័យ អចលនវត្ថុកម្ពុជា និងមួយចំនួនទៀតមានទស្សនៈផ្ទុយ ដោយបង្ហាញនូវសុទិដ្ឋិនិយមថាវិស័យអចលនវត្ថុកម្ពុជា បើទោះបីជាបច្ចុប្បន្ននេះ គម្រោងសាងសង់អគារការិយាល័យ អគារពាណិជ្ជកម្ម…
រាជធានីភ្នំពេញ ៖ ស្របពេលការបោះឆ្នោតថ្នាក់ជាតិកាន់តែខិតជិតមកដល់ អ្នកមួយចំនួនបានបង្ហាញពីការព្រួយបារម្ភទៅលើវិស័យ អចលនវត្ថុកម្ពុជា និងមួយចំនួនទៀតមានទស្សនៈផ្ទុយ ដោយបង្ហាញនូវសុទិដ្ឋិនិយមថាវិស័យអចលនវត្ថុកម្ពុជា បើទោះបីជាបច្ចុប្បន្ននេះ គម្រោងសាងសង់អគារការិយាល័យ អគារពាណិជ្ជកម្ម និងអគារខុនដូមួយចំនួនបញ្ចប់យឺតយ៉ាវ ប៉ុន្តែសកម្មភាពសាងសង់នៅតែបន្ដ ។
យ៉ាងណាក៏ដោយ កាលពីពេលថ្មីៗនេះ មានគម្រោងខុនដូមួយចំនួនបានប្រកាសពន្យារការសាងសង់ និងគម្រោងខ្លះទៀតបានប្រកាសលុបចោលតែម្ដង ដែលទាំងនេះហើយធ្វើឲ្យអតិថិជន ទាំងវិនិយោគិន និងអ្នកចង់បានគម្រោងខុនដូសម្រាប់ស្នាក់នៅ ក៏មានភាពស្ទាក់ស្ទើរផងដែរ ក្នុងការសម្រេចចិត្តទិញគម្រោងខុនដូ ។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏បានក្រើនរំលឹកដល់ពលរដ្ឋកម្ពុជាផងដែរ ពីការសម្រេចចិត្តទិញគម្រោងអចលនទ្រព្យណាមួយនៅក្នុងប្រទេសកម្ពុជា ។ លោកថា ពលរដ្ឋគួរតែពិនិត្យមើល និងសិក្សាឲ្យបានច្បាស់លាស់ មុននឹងសម្រេចចិត្តទិញគម្រោងណាមួយពីអ្នកអភិវឌ្ឍន៍ ព្រោះបច្ចុប្បន្ននេះ មានអ្នកវិនិយោគមិនពិតប្រាកដជាច្រើន ដោយគ្រាន់តែចេញប្លង់រួចហើយប្រកាសលក់តែម្ដង ហើយទទួលលុយកក់ពីអតិថិជន ទាំងដែលគម្រោងនោះមិនទាន់មានភាពច្បាស់លាស់នៅឡើយ ។
លោក ច្រឹក សុខនីម នាយកប្រតិបត្តិក្រុមហ៊ុនអចលនទ្រព្យ Century 21 Mekong បានឲ្យដឹងថា បច្ចុប្បន្ននេះ មានគម្រោងអគារមួយចំនួនយឺតយ៉ាវក្នុងការសាងសង់ និងផ្ដល់ជូនអតិថិជនទៅតាមការសន្យា ហើយសកម្មភាពនេះ វាគ្មានច្រើនទេនៅក្នុងវិស័យអចលនទ្រព្យកម្ពុជា ។ ដូចនេះ យើងមិនអាចវាយតម្លៃទៅលើវិស័យអចលនទ្រព្យទាំងមូលទេ ។ លោកនិយាយថា ៖« យើងមិនអាចវាយតម្លៃថា ត្រី១កន្ត្រក ស្អុយ១ ស្អុយទាំងអស់ទេ ។ ផ្ទុយទៅវិញ ក្នុងវិស័យនេះ យើងនឹងព្យាយាមធ្វើឲ្យវាកាន់តែប្រសើរឡើងបន្ថែម » ។
លោកបន្តថា ជាទូទៅ ការវិនិយោគលើវិស័យអចលនទ្រព្យតែងតែមានហានិភ័យ ដូចនេះហើយតម្រូវឲ្យមានការប្រុងប្រយ័ត្នខ្ពស់ចំពោះការវិនិយោគលើវិស័យនេះ រួមទាំងអ្នកអភិវឌ្ឍន៍ផងដែរ ។ អ្នកអភិវឌ្ឍន៍ពិតប្រាកដ ទៅលើវិស័យអចលនទ្រព្យ ពួកគាត់នឹងព្យាយាមប្រឹងប្រែងធ្វើឲ្យគម្រោងរបស់ពួកគាត់នឹងនៅតែដំណើរការ ដោយមិនចង់ឲ្យអតិថិជន ជាអ្នកវិនិយោគខកចិត្ត ឬបាត់បង់ទំនុកចិត្តទេ។ ជាក់ស្ដែង បើសិនជាគម្រោងពួកគាត់មិនជោគជ័យ ឬហៅថា គម្រោងបោកគេ យកលុយធ្វើអ្វីផ្សេង គាត់នឹងមានឱកាសតែម្ដងគត់ក្នុងការធ្វើអាជីវកម្ម ព្រោះអតិថិជននឹងលែងជឿជាក់ទៅលើការវិនិយោគនោះ ។
លោក គីម ហ៊ាង ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ផងដែរថា កាលពីប៉ុន្មានឆ្នាំមុន ការវិនិយោគលើវិស័យខុនដូនៅកម្ពុជាមានតិចតួចនៅឡើយ ហើយពេលនោះឲ្យតែមានអ្នកមកវិនិយោគ កម្ពុជាស្វាគមន៍ជានិច្ច ដោយមិនត្រូវការសិក្សា ឬលក្ខខណ្ឌច្រើនទេ ។ ដូចនេះហើយ ទើបគម្រោងអភិវឌ្ឍន៍ខុនដូ និងអគារមួយចំនួនសាងសង់យឺតយ៉ាវ ។ ប៉ុន្តែចាប់ពីពេលនេះទៅ សកម្មភាពបែបនេះនឹងលែងមាននៅកម្ពុជាទៀតហើយ ពីព្រោះពេលនេះ មានវិនិយោគិនច្រើនលើវិស័យមួយនេះ ។ អីចឹង មុននឹងអនុញ្ញាតឲ្យវិនិយោគិនទាំងនោះចាប់ផ្ដើមដំណើរការ ឬប្រកាសពីការវិនិយោគ ក៏ត្រូវតែពិនិត្យមើល និងដាក់លក្ខខណ្ឌច្បាស់លាស់ទៅពួកគេផងដែរ ។
លោកបន្ថែមថា ការសាងសង់គម្រោងមួយចំនួននៅពេលបច្ចុប្បន្នមានភាពយឺតយ៉ាវនៅកម្ពុជានេះ វាមានផលប៉ះពាល់តិចតួច ក៏ប៉ុន្តែវាក៏ជាបទពិសោធន៍មួយសម្រាប់កម្ពុជានៅពេលអនាគត ក្នុងវិស័យខុនដូនេះ ។ លោកថា ៖«ចាប់ពីពេលនេះតទៅ ខ្ញុំជឿជាក់ថា គម្រោងដែលយឺតយ៉ាវ នឹងលែងមាននៅកម្ពុជាទៀតហើយ ព្រោះយើងបានសិក្សាច្បាស់ពីប្រភពទុន និងប្រវត្តិរបស់អ្នកអភិវឌ្ឍន៍ មុននឹងអនុញ្ញាតឲ្យពួកគាត់ចាប់ផ្ដើមដំណើរការគម្រោង » ។
លោក គីម ហ៊ាង បញ្ជាក់ថា នៅឆ្នាំ ២០១៨ វិស័យអចលនទ្រព្យ លោកមិនរំពឹងថាឡើងបន្តទៀតទេ ព្រោះអីកន្លងមក វាឡើងខ្ពស់ពេកហើយ អីចឹងដល់ពេលដែលត្រូវរក្សាឲ្យមានស្ថិរភាពវិញ ទើបប្រសើរ ហើយក៏ជាពេលវេលាដែលជិតដល់វដ្ដរបស់វាដែរ ។
លោកថា ៖«វាមិនចេះតែឡើងរហូតនោះទេ ! វាមានឡើងមានចុះជាធម្មតារបស់វាទៅហើយ តែត្រូវធ្វើយ៉ាងណា រក្សាស្ថិរភាពកុំឲ្យមានបញ្ហាធ្ងន់ធ្ងរទៅបានហើយ » ៕
ចែករំលែកព័តមាននេះ