រាជធានីភ្នំពេញ ៖ សំឡេងនៃការសាងសង់បានលាន់រំពងគ្រប់ទីកន្លែង អគារខ្ពស់ៗជាច្រើនកំពុងលូតឡើងទៅលើអាកាសា និងកំពុងអួតរចនាបថដាក់គ្នា ខណៈវត្តមានដងស្ទូចធំៗបានបង្ហូតឡើងនៅការដ្ឋានសាងសង់កាន់តែច្រើន ដែលនេះជាសញ្ញាថ្មីមួយបង្ហាញថា រាជធានីភ្នំពេញកំពុងវិវត្តន៍ឆ្ពោះទៅកាន់ដំណាក់កាលថ្មីមួយ និងកំពុងក្លាយជាមជ្ឈមណ្ឌលសេដ្ឋកិច្ច និងពាណិជ្ជកម្មអន្តរជាតិ…
រាជធានីភ្នំពេញ ៖ សំឡេងនៃការសាងសង់បានលាន់រំពងគ្រប់ទីកន្លែង អគារខ្ពស់ៗជាច្រើនកំពុងលូតឡើងទៅលើអាកាសា និងកំពុងអួតរចនាបថដាក់គ្នា ខណៈវត្តមានដងស្ទូចធំៗបានបង្ហូតឡើងនៅការដ្ឋានសាងសង់កាន់តែច្រើន ដែលនេះជាសញ្ញាថ្មីមួយបង្ហាញថា រាជធានីភ្នំពេញកំពុងវិវត្តន៍ឆ្ពោះទៅកាន់ដំណាក់កាលថ្មីមួយ និងកំពុងក្លាយជាមជ្ឈមណ្ឌលសេដ្ឋកិច្ច និងពាណិជ្ជកម្មអន្តរជាតិ ដែលស្ថិតក្នុងក្រសែភ្នែកវិនិយោគិនជាតិ និងអន្តរជាតិ ។
ទីក្រុងនេះបានងើបពីសុបិន និងលេចឡើងនូវវត្តមានអគារខ្ពស់ៗកប់ពពកស្ទើរគ្រប់ទីកន្លែង ជំនួសអគារចាស់ៗដែលជាប់ស្លែខ្មៅ និងបែកបាក់ដោយសារភ្លើងសង្គ្រាម ជាអ្វីដែលស្រមោលអតីតកាលត្រូវបានលាងជម្រះដោយពេលវេលាបន្តិចម្តងៗ ។
ការមកដល់នៃវិនិយោគិនអន្តរជាតិ ប្រតិភូធុរកិច្ច និងថ្នាក់ដឹកនាំល្បីៗនៅលើពិភពលោក ជាបន្តបន្ទាប់ ពិសេសក្នុងពេលដែលកម្ពុជាធ្វើជាម្ចាស់ផ្ទះនៃវេទិកាសេដ្ឋកិច្ចពិភពលោក ស្តីពីអាស៊ានកាលពីចុងខែឧសភាកន្លងមកនេះ ជាព្រឹត្តិការណ៍បង្ហាញមុខមាត់ កិត្យានុភាពប្រទេសកម្ពុជា ពិសេសក្រុងភ្នំពេញទៅកាន់ពិភពលោក ក្នុងនាមជាទីក្រុងដែលមានការរីកចម្រើនយ៉ាងឆាប់រហ័សនៅអាស៊ីអាគ្នេយ៍មួយនេះ ។
ការកើនឡើងនូវវត្តមានអគារខ្ពស់ៗនៅទីក្រុងភ្នំពេញ ទំនងជាមិនបញ្ចប់នៅពេលឆាប់ៗ នោះទេ ។ ជាក់ស្តែង អគារភ្លោះថៃប៊ុនរ៉ុង ដែលជាអគារខ្ពស់ជាងគេនៅក្នុងតំបន់អាស៊ាន និងគ្រោងចំណាយប្រាក់វិនិយោគ៥.០០០លានដុល្លារ នឹងក្លាយជាមេដែកឆក់មួយដែលផ្តល់ទំនុកចិត្ត និងទាក់ទាញវិនិយោគិនមកកាន់ប្រទេសនេះកាន់តែច្រើនថែមទៀតនាពេលអនាគត ប្រសិនជាវត្តមានអគារនេះលេចរូបរាងពិតប្រាកដ ។
ការមកដល់នូវវិនិយោគិនចិន, កូរ៉េ, សិង្ហបុរី និងម៉ាឡេស៊ី បានធ្វើឲ្យប្រទេសនេះក្លាយជាខ្លាសេដ្ឋកិច្ចថ្មីមួយក្នុងតំបន់អាស៊ី ជាឈ្មោះថ្មីដែលធនាគារអភិវឌ្ឍន៍អាស៊ី (ADB) បានប្រសិទ្ធនាមឲ្យកម្ពុជាកាលពីឆ្នាំមុន ។ ជាមួយគ្នានេះ ធនាគារពិភពលោក ក៏បានចាត់ចំណាត់ថ្នាក់ថ្មីដល់កម្ពុជា ចេញពីប្រទេសអភិវឌ្ឍន៍តិចតួច មកជាប្រទេសមានប្រាក់ចំណូលមធ្យមកម្រិតទាបកាលពីឆ្នាំមុនផងដែរ ។
អ្នកនាង អាន សុធីតា នាយិកាក្រុមហ៊ុនអចលនទ្រព្យ CBRE Cambodia បានថ្លែងថា កម្ពុជាកំពុងធ្វើដំណើរទៅមុខ និងក្លាយជាមជ្ឈមណ្ឌលពាណិជ្ជកម្មអន្តរជាតិនៅ៥ទៅ១០ឆ្នាំខាងមុខ ព្រោះបើយោងតាមការសិក្សារបស់យើង រហូតមកទល់ពេលនេះ កម្ពុជាមានក្រុមហ៊ុនលំដាប់ពិភពលោកចំនួន៧០ បានចូលមកវិនិយោគនៅកម្ពុជា ក្នុងចំណោមក្រុមហ៊ុនលំដាប់អន្តរជាតិចំនួន៥០០ ។ អ្នកនាងបន្តថា ៖« នៅរយៈពេល៥ឆ្នាំខាងមុខ យើងរំពឹងថា នឹងមានក្រុមហ៊ុន៥០%នៃក្រុមហ៊ុនទាំង៥០០ ចូលមកវិនិយោគនៅកម្ពុជា ដោយសារកម្ពុជាពេលនេះបាននិងកំពុងក្លាយជាគោលដៅរបស់អ្នកវិនិយោគអន្តរជាតិ » ។ អ្នកនាងថា ៖« បច្ចុប្បន្ន និយាយពីកម្ពុជា គឺមិនទាន់ក្លាយជាមជ្ឈមណ្ឌលពាណិជ្ជកម្មអន្តរជាតិទេ ប៉ុន្តែរយៈពេល១០ឆ្នាំខាងមុខ កម្ពុជានឹងសម្រេចបាននូវគោលដៅនេះ » ។
ដើម្បីក្លាយជាមជ្ឈមណ្ឌលពាណិជ្ជកម្មអន្តរជាតិបាន ទាមទារឲ្យប្រទេសមួយមានធនធាន មនុស្ស ធនធានអភិវឌ្ឍន៍ ចំណេះដឹង និងបទពិសោធន៍ ប៉ុន្តែបច្ចុប្បន្ន កម្ពុជាកំពុងខ្វះធនធានមនុស្ស និងបទពិសោធន៍ ។ នេះបើតាមការបញ្ជាក់របស់អ្នកនាង អាន សុធីតា ។
អ្នកនាងបន្តថា ៖« កាលពីមុន និយាយពីកម្ពុជា គេមិនសូវស្គាល់ទេនៅក្រៅប្រទេស ប៉ុន្តែដោយសារការរីកចម្រើននៃវិស័យនេះ បានធ្វើឲ្យទីក្រុងភ្នំពេញ និងប្រទេសរបស់យើងត្រូវបានគេស្គាល់កាន់តែច្រើន » ។
ពិតជាជាក់ស្តែង និងមិនអាចប្រកែកបាន ដោយសារកម្ពុជា ក្នុង១ទសវត្សរ៍ចុងក្រោយនេះ ទទួលបានទុនវិនិយោគក្នុងវិស័យនេះរាប់ពាន់លានដុល្លារ ។
ជាក់ស្តែង ទុនវិនិយោគក្នុងវិស័យសំណង់នៅដំណាច់ឆ្នាំ២០១៦កន្លងមកនេះ មានទំហំទឹកប្រាក់រហូតដល់ជាង៨.៥៣៤លានដុល្លារអាមេរិក កើនឡើង១៥៥,៦៨% បើធៀបនឹងរយៈពេលមួយឆ្នាំដូចគ្នាកាលពីឆ្នាំ២០១៥ ហើយទំហំទុនពិតប្រាកដពីលំហូរវិនិយោគផ្ទាល់ពីបរទេស (FDI) មកកម្ពុជា រយៈពេល២០ឆ្នាំ ពីឆ្នាំ១៩៩៤ ដល់២០១៤ មានប្រមាណ១៩,២ពាន់លានដុល្លារ ក្នុងនោះ៤៤%គឺជាទឹកប្រាក់នៃការវិនិយោគរបស់ចិន ។
យោងតាមរបាយការណ៍របស់មន្ទីររៀបចំដែនដីក្រុងភ្នំពេញ បានរកឃើញថា នៅរាជធានីភ្នំពេញមានវត្តមានអគារខ្ពស់ៗចាប់ពី៥ជាន់ រហូតដល់ជាង៤០ជាន់ចំនួនជាង៧០០អគារ និងមានអគារជាច្រើនទៀតកំពុងចាប់ផ្តើមសាងសង់ ដែលមានកម្ពស់រហូតដល់៦៣ជាន់ ។
ជាមួយនឹងគោលដៅនេះ កម្ពុជាក៏សម្រេចបាននូវកំណើនប្រាក់ចំណូលយ៉ាងខ្ពស់ផងដែរ។ ជាក់ស្តែង យោងតាមការសិក្សារបស់អង្គភាពព័ត៌មានសេដ្ឋវិទូបានរកឃើញថា ទំហំនៃប្រាក់ចំណូលរបស់ប្រជាពលរដ្ឋក្នុងទីក្រុងភ្នំពេញ មានចំនួន១០.៩០០ដុល្លារកាលពីឆ្នាំមុន និងកើនដល់៣២.២០០ដុល្លារនៅឆ្នាំ២០៣០ខាងមុខ ។
យោងតាមតួលេខរបស់ក្រសួងពាណិជ្ជកម្មបានបង្ហាញថា កម្ពុជាបាននាំចេញទៅកាន់ពិភពលោក ក្នុងទំហំទឹកប្រាក់១២ពាន់លានដុល្លារកាលពីឆ្នាំមុន ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក គីម ហ៊ាង បានថ្លែងថា ៖« កាលពី១០ឆ្នាំមុន ខ្ញុំមិនហ៊ានរំពឹងថា ទីក្រុងភ្នំពេញមានភាពរីកចម្រើនបែបនេះទេ តែពេលនេះ វត្តមានអគារខ្ពស់ៗបានរីកដូចផ្សិត វាជាមោទនភាពមួយ » ។ លោកបន្តថា ៖« នៅពេលជនបរទេសចុះពីយន្តហោះ ពួកគេឃើញហាងទំនើបៗ អគារខ្ពស់ៗ រថយន្តទំនើបៗ ពួកគេសប្បាយចិត្តនឹងមករស់នៅ និងវិនិយោគនៅទីនេះ » ។
ភាពរីកចម្រើននេះ មិនអាចកាត់ផ្តាច់ចេញពីសន្តិភាព ស្ថិរភាពនយោបាយ និងការរក្សាបាននូវកំណើនសេដ្ឋកិច្ចយ៉ាងរឹងមាំទេ ។ ជាក់ស្តែង គិតត្រឹមរយៈពេល២ទសវត្សរ៍ កម្ពុជាសម្រេចបានមានកំណើនសេដ្ឋកិច្ច៧,៧% គិតពីឆ្នាំ១៩៩៤ ដល់ឆ្នាំ២០១៤ និងរក្សាកំណើនរហូតដល់៧%បន្ថែមទៀត សម្រាប់រយៈពេលមធ្យមខាងមុខនេះ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា កម្ពុជាពិតជាបានរីកចម្រើនច្រើនលើសម្ភារ និងសេដ្ឋកិច្ច ដែលកាលពី១០ឆ្នាំមុន ឬយូរជាងនេះ យើងមិនទាន់មានអ្វីនៅឡើយ ទេ ។ ប៉ុន្តែការរីកចម្រើនរបស់យើងខ្វះគុណភាពជីវិត ព្រោះទីក្រុងរបស់យើងមិនគួរមានតែកន្លែងផឹកស៊ីទេ តែគួរមានសួនច្បារ សារមន្ទីរ វិចិត្រសាល និងកន្លែងតាំងពិព័រណ៍លំដាប់អន្តរជាតិជាដើម ។
លោកថ្លែងថា ៖« បើគិតពីអាយុមនុស្ស ខ្ញុំគិតថា កម្ពុជាប្រៀបបាននឹងមនុស្សជំទង់វ័យ១៣ទៅ១៤ឆ្នាំប៉ុណ្ណោះ » ៕
ចែករំលែកព័តមាននេះ