សមត្ថកិច្ចចាប់បាន៣នាក់ក្នុងចំណោម៧នាក់ ករណីហិ.ង្សាលើយុវជនម្នាក់
- តាកែវ
ខេត្តតាកែវ ៖ បន្ទាប់ពីឃាត់ជនសង្ស័យឈ្មោះ កែវ ថេងឡា ភេទប្រុស រស់នៅភូមិសំបួរ ឃុំតាំងយ៉ាប ស្រុកព្រៃកប្បាស ពាក់ព័ន្ធករណីហិង្សាដោយចេតនា…
ខេត្តតាកែវ ៖ បន្ទាប់ពីឃាត់ជនសង្ស័យឈ្មោះ កែវ ថេងឡា ភេទប្រុស រស់នៅភូមិសំបួរ ឃុំតាំងយ៉ាប ស្រុកព្រៃកប្បាស ពាក់ព័ន្ធករណីហិង្សាដោយចេតនា មានស្ថានទម្ងន់ទោស កាលពីថ្ងៃទី២៣ ខែវិច្ឆិកា ឆ្នាំ២០១៧ នៅចំណុចភូមិចំប៉ា ឃុំចំប៉ា ស្រុកព្រៃកប្បាស ខេត្តតាកែវ ។
នៅថ្ងៃទី២៤ ខែវិច្ឆិកា ឆ្នាំ២០១៧ កម្លាំងជំនាញអធិការនគរបាលស្រុកព្រៃកប្បាស ធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យចំនួន២នាក់បន្ថែមទៀត ក្នុងចំណោមបក្សពួក៧នាក់ ។
តាមរបាយការណ៍បន្ថែម លោក ជុំ ឈឿន អធិការនគរបាលស្រុកព្រៃកប្បាស បានឱ្យដឹងថា ជនសង្ស័យជាក្មេងទំនើងចំនួន២នាក់ ដែលឃាត់ខ្លួនមាន ទី១.ឈ្មោះ ឃុន មេតា ភេទប្រុស រស់នៅភូមិច្រនៀងខ្ពស់ ឃុំតាំងយ៉ាប ស្រុកព្រៃកប្បាស និងទី២.ឈ្មោះ អ៊ុំ ដារ៉ាត់ ភេទប្រុស រស់នៅភូមិវាល ឃុំក្តាញ់ ស្រុកព្រៃកប្បាស ព្រមទាំងដកហូតវត្ថុតាងរួមមានម៉ូតូ២គ្រឿង និងដំបង៣កំណាត់១ដើម ។
ចំណែកជនសង្ស័យចំនួន០៤នាក់ផ្សេងទៀតមាន ទី១.ឈ្មោះ ហង់ ណារិទ្ធ ភេទប្រុស រស់នៅភូមិព្រៃផ្តៅជើង ឃុំព្រៃផ្តៅ ស្រុកព្រៃកប្បាស ទី២.ឈ្មោះ ឆឹង ម៉េងហាក់ ភេទប្រុស អាយុ២០ឆ្នាំ រស់នៅភូមិព្រៃផ្តៅត្បូង ឃុំព្រៃផ្តៅ ស្រុកព្រៃកប្បាស ទី៣.ឈ្មោះ យី ឌីណា ភេទប្រុស រស់នៅភូមិព្រៃភ្ញី ឃុំព្រៃផ្តៅ ស្រុកព្រៃកប្បាស និងទី៤.ឈ្មោះ សង លីស្សា ភេទប្រុស រស់នៅភូមិព្រៃភ្ញី ឃុំព្រៃផ្តៅ ស្រុកព្រៃកប្បាស ។
សូមរំឭកថា នៅវេលាកើតហេតុខាងលើ ជនសង្ស័យទាំង៧នាក់ បានធ្វើសកម្មភាពប្រដាប់ដោយដំបង៣កំណាត់ ព្រួតវាយទៅលើជនរងគ្រោះឈ្មោះ ហេង សីហា ភេទប្រុស អាយុ២២ឆ្នាំ រស់នៅភូមិឬស្សីថ្មី ឃុំចំប៉ា ស្រុកព្រៃកប្បាស បណ្តាលឱ្យរងរបួសត្រង់កណ្ដាលក្បាល ប្រវែង៨សង់ទីម៉ែត្រ ដោយមូលហេតុ ជនសង្ស័យខឹងនឹងជនរងគ្រោះយកនំបុ័ងគប់ទៅលើមិត្តភក្តិរបស់ខ្លួន ។
លោកវរសេនីយ៍ឯក សែម សុជាតិ នាយការិយាល័យព្រហ្មកំរិតធ្ងន់ខេត្ត បានឲ្យដឹងថា បានកសាងសំណុំរឿងរួចរាល់ហើយនៅថ្ងៃទី២៤ ខែវិច្ឆិកា ឆ្នាំ២០១៧ នេះ នឹងបានបញ្ជូនជនសង្ស័យ រួមនឹងវត្ថុតាង ទៅសសលាដំបូងខេត្តចាត់ការទៅតាមច្បាប់ និងបន្តស្វែងរកចាប់ខ្លួនបក្ខពួកជនសង្ស័យដែលរត់គេចខ្លួន យកមកកាត់ទោសឲ្យខានតែបាន ៕
ចែករំលែកព័តមាននេះ