រាជធានីភ្នំពេញ៖ បើតាមមន្ត្រីគណបក្សហ៊្វុនស៊ិនប៉ិចដែលនឹងទទួលបានអាស្ននៈសរុប ៤១ អាសន្នៈនៅរដ្ឋសភាក្រោយពីត្រូវបានគណៈកម្មាធិការជាតិរៀបចំការបោះឆ្នោតបែងចែករួចនោះ ក៏បានឲ្យដឹងថា គណបក្សបានកំណត់ដាក់បេក្ខភាពលោក នុត សុខុម ជាអនុប្រធានគណៈកម្មាធិការជាតិរៀបចំការបោះឆ្នោត និង លោក ញ៉េប ប៊ុនជិនជាអនុប្រធានរដ្ឋសភា ។
ការបែកធ្លាយនេះបន្ទាប់ពីគណបក្សដែលទើបតែបានអាសន្នៈដោយការបែងចែងពីគណៈកម្មការជាតិរៀបចំការបោះឆ្នោតចំនួន៤១ នេះបានដាក់បញ្ចូលបេក្ខភាពលោក នុត សុខុម ជាអ្នកតំណងរាស្ត្រមណ្ឌលកំពង់ឆ្នាំង និងលោក ញ៉េប ប៊ុនជិនមណ្ឌលបាត់ដំបង់ ។
យ៉ាងណាក្តី លោក ញ៉េប ប៊ុនជិន អ្នកនាំពាក្យគណបក្សនេះបានអះអាងថា មិនទាន់មានការបែងចែង ឬដាក់បេក្ខភាពលោក នុត សុខុម ជាអនុប្រធានគណៈកម្មាធិការជាតិរៀបចំការបោះឆ្នោត និងរូបលោកជាអនុប្រធានរដ្ឋសភានោះទេ ។
ប្រាប់កោះសន្តិភាពតាមរយៈទូរស័ព្ទនារសៀលថ្ងៃទី២៤ វិច្ឆិកានេះ លោក ញ៉េប ប៊ុនជិនបានបញ្ជាក់ថា៖ « មិនពិតទេប្អូន ពេលនេះយើងកំពុងតែពិភាក្សាគ្នា ។ ភ្នាល់ជាមួយបង! បងថា អត់ពិតទេ ១០០រៀល បងយកពីប្អូន។ បើពិត ហើយពិតប្អូនយកពីបង១ម៉ឺនរៀល។ អត់ទេ ក្នុងចំណោមបេក្ខភាពនឹង យើងបានដាក់ជូនសម្តេចព្រះប្រធាន ដើម្បីជ្រាប និងព្រះតម្រិះរួចហើយ តែពេលនេះមិនទាន់ដឹងទេ ។ ពេលនេះយើងកំពុងតែជជែកគ្នា យើងមិនទាន់សម្រេចទេ »។
យ៉ាងណាក្តីបើតាមអ្នកនាំពាក្យគណបក្សហ៊្វុនស៊ិនប៉ិចរូបនេះបានឲ្យដឹងថា បេក្ខភាព អនុប្រធាន គ.ជ.ប និងអនុប្រធានទី១ រដ្ឋសភា នឹងដឹងនៅរយៈពេលស្អែក ឬខានស្អែកហើយ ។
សូមជម្រាបថា ការជ្រើសបេក្ខភាពអនុប្រធាន គ.ជ.ប ថ្មីនេះ បន្ទាប់ពីសមាជិក គ.ជ.ប ចំនួន៣រូបមកពីគណបក្សសង្គ្រោះជាតិបានលាលែងពីតំណែងកាលពេលថ្មីកន្លងមកនេះ ។ ក្នុងនៅអនុប្រធាន គ.ជ.ប លោក គួយ ប៊ុនរឿន បាន លោក រ៉ុង ឈុន សមាជិក និងលោក រញី តែ ម៉ានីរ៉ុង សមាជិក ។ យ៉ាងណាក្តីបើតាមសម្តេចតេជោ ហ៊ុន សែននាយករដ្ឋមន្ត្រី បានធ្លាប់បានឲ្យដឹងថា សមាជិក គ.ជ.ប ថ្មីនឹងត្រូវជ្រើសចេញពីគណបក្សហ៊្វុនស៊ិនប៉ិច ជាអនុប្រធាន និងសមាជិក ១ រូបទៀតមកពីសង្គមស៊ីវិល និង១រូបទៀតមកពីគណបក្សសញ្ជាតិកម្ពុជា ៕
ចែករំលែកព័តមាននេះ