ខេត្តបាត់ដំបង ៖ អំពើចោរកម្មដ៏កក្រើកដែលកើតឡើងផ្ទូនៗនៅក្នុងក្រុងបាត់ដំបង នាប៉ុន្មានថ្ងៃកន្លងទៅនេះ កម្លាំងនគរបាលផ្នែកបង្ការ បង្ក្រាប នៃស្នងការដ្ឋានខេត្ត បានប្រឹងប្រែងធ្វើការស្រាវជ្រាវរហូតឈានដល់ការឃាត់ខ្លួនក្រុមចោរដៃស្អិត(ចោរឆក់)បានចំនួន២នាក់ កាលពីរសៀលថ្ងៃទី២២ វិច្ឆិកា…
ខេត្តបាត់ដំបង ៖ អំពើចោរកម្មដ៏កក្រើកដែលកើតឡើងផ្ទូនៗនៅក្នុងក្រុងបាត់ដំបង នាប៉ុន្មានថ្ងៃកន្លងទៅនេះ កម្លាំងនគរបាលផ្នែកបង្ការ បង្ក្រាប នៃស្នងការដ្ឋានខេត្ត បានប្រឹងប្រែងធ្វើការស្រាវជ្រាវរហូតឈានដល់ការឃាត់ខ្លួនក្រុមចោរដៃស្អិត(ចោរឆក់)បានចំនួន២នាក់ កាលពីរសៀលថ្ងៃទី២២ វិច្ឆិកា ខណៈជនទាំង២នាក់នេះកំពុងសម្ងំស្នាក់នៅក្នុងបន្ទប់សណ្ឋាគារ (ផាក) ដែលស្ថិតនៅក្នុងភូមិរំចេក៤ សង្កាត់រតនៈ ក្រុងបាត់ដំបង ។
លោក ឈឿង គឹមសុង ប្រធានក្រុមបង្ការ បង្ក្រាបនៃស្នងការដ្ឋានខេត្តបានឲ្យដឹងថា ជនសង្ស័យដែលកម្លាំងរបស់លោកឃាត់ខ្លួនបាន២នាក់នោះ ឈ្មោះសឺម សីហា ហៅ ង៉ា អាយុ២២ឆ្នាំ នៅភូមិវត្តតាមឹម ឃុំអូរដំបង១ ស្រុកសង្កែ និងឈ្មោះអេង ឆៃ អាយុ២៥ឆ្នាំ នៅភូមិកម្មករ សង្កាត់រតនៈ ក្រុងបាត់ដំបង ។
លោកបានប្រាប់ថា ក្រុមចោរដៃស្អិតទាំងនេះគឺជាមុខសញ្ញាដែលជាប់ពាក់ព័ន្ធនឹងបទល្មើស(ឆក់))តាមដងផ្លូវក្នុងរយៈពេលប៉ុន្មានថ្ងៃកន្លងទៅនេះ នៅក្នុងក្រុងបាត់ដំបង ។ លោកបានបញ្ជាក់ថា ក្រោយពីកំណត់បាននូវមុខសញ្ញានេះ លោកស្នងការបានបញ្ជាឲ្យកម្លាំងរបស់លោកក្រោមការដឹកនាំផ្ទាល់ពីលោកជេត វណ្ណនី ស្នងការរងខេត្ត ធ្វើការស៊ើបអង្កេត និងស្រាវជ្រាវរហូតឈានដល់ការឃាត់ខ្លួនជនសង្ស័យ២នាក់ ដែលពួកគេកំពុងសម្ងំស្នាក់នៅក្នុងសណ្ឋាគារ(ផាក) ស្ថិតក្នុងភូមិសង្កាត់ខាងលើ។ លោកឈឿង គឹមសុង បានបញ្ជាក់ថា ជាមួយនឹងការឃាត់ខ្លួននោះ មន្ត្រីរបស់លោកបានដកហូតវត្ថុតាងមួយចំនួនដែលជននេះបានឆក់យកពីជនរងគ្រោះ ហើយជនរងគ្រោះមានទាំងជនបរទេសផង ។
បន្ទាប់ពីត្រូវឃាត់ខ្លួន ជនដៃដល់ទាំង២នាក់ បានផ្ដល់ចម្លើយជាបឋមប្រាប់សមត្ថកិច្ចថា ពួកខ្លួនពិតជាបានធ្វើសកម្មភាព(ឆក់)យកទ្រព្យសម្បត្តិអ្នកដំណើរតាមដងផ្លូវមែន ។ ជននេះបានសារភាពថា ពួកខ្លូនមិនចាំពេលវេលាប្រព្រឹត្តទេ តែបានប្រាប់ថា ពួកខ្លួនធ្លាប់ធ្វើសកម្មភាពឆក់កាបូបស្ពាយ ឬឆក់ទូរស័ព្ទរបស់ជនរងគ្រោះមិនតិចជាង៥លើកឡើយ ក្នុងនោះបានឆក់កាបូបស្ពាយជនបរទេសចំនួន២លើកផង ដែរក្នុងរយៈពេលប៉ុន្មានថ្ងៃមុននេះ ។
សូមបញ្ជាក់ថា បើតាមប្រភពព័ត៌មានពីមន្ត្រីជំនាញបានបង្ហើបឲ្យដឹងថា អំពើចោរកម្មហាក់បានកំរើកយ៉ាងខ្លាំង នៅក្នុងក្រុងបាត់ដំបង ក្នុងរយៈពេលប៉ុន្មានខែចុងក្រោយនេះ ។ អំពើចោរកម្មដែលកំពុងបង្កឲ្យពលរដ្ឋមានក្ដីបារម្ភយ៉ាងខ្លាំងនេះមានដូចជា ចោរឆក់ ចោរគាស់ផ្ទះ ឬតូបលក់ដូរ និងចោរកាច់សោ.កលួចយកម៉ូតូ។ល។និង។ល។ ប៉ុន្តែកម្លាំងជំនាញរបស់ស្នងការខេត្តក៏បង្ក្រាបបានជាបន្តបន្ទាប់ដែរ ខណៈកម្លាំងនគរបាលក្រុងត្រូវគេគត់សម្គាល់ថា ហាក់ងាប់ដៃងាប់ជើងស្ដូកគ្មានសកម្មភាពតែម្ដង ។
បើតាមប្រភពពីសមត្ថកិច្ចបានទម្លាយឲ្យដឹងខ្លះៗថា គ្រាន់តែក្នុងរយ:ពេលជាងកន្លះខែក្នុងខែវិច្ឆិកា ឆ្នាំ២០១៧នេះ ករណីចោរឆក់ ចោរគាស់ផ្ទះ និងចោរកាច់សោ.កលួចម៉ូតូបានកើតឡើងមិនតិចជាង២០លើកឡើយ ។ នេះជារបាយការណ៍បឋមប៉ុណ្ណោះ ប៉ុន្តែមានករណីឆក់ខ្លះ ជនរងគ្រោះមិនបានដាក់ពាក្យបណ្ដឹងទៅសមត្ថកិច្ចទេ ដោយសារគេហាក់គ្មានជំនឿទៅលើសមត្ថកិច្ច ។
លោក ជេត វណ្ណនី ស្នងការរងខេត្តបានថ្លែងដោយទទូលស្គាល់ថា បទល្មើសចោរឆក់ ចោរលួច និងគាស់ទម្លុះទម្លាយលួចទ្រព្យសម្បត្តិនេះ ពិតជាមានមែន តែសមត្ថកិច្ចបង្ក្រាបបានជាបន្តបន្ទាប់ដែរ រីឯមុខសញ្ញាមួយចំនួនមន្ត្រីជំនាញក៏កំពុងធ្វើការស្រាវជ្រាវ ព្រោះកំណត់បានខ្លះៗហើយ ៕
ចែករំលែកព័តមាននេះ