ខេត្កណ្ដាល ៖ ក្មេងប្រុសម្នាក់បានលួចយកម៉ូតូ១គ្រឿងពីកន្លែងជាងជួសជុលម៉ូតូ ប៉ុន្តែត្រូវបានម្ចាស់ម៉ូតូដឹងក៏បានតាមរកហើយ បានប្រទះឃើញក៏ចាប់ខ្លួនប្រគល់ខ្លួនឲ្យនគរបាលស្រុកអង្គស្នួលចាត់ការតាមច្បាប់តែម្ដង ហើយ ចាប់ខ្លួនបានកាលពីវេលាម៉ោង១០និង៣០នាទីព្រឹកថ្ងៃទី២៣ ខែវិច្ឆិកា ឆ្នាំ២០១៧ នៅផ្សារទួលលៀប សង្កាត់ស្នោ ខណ្ឌពោធិសែនជ័យ រាជធានីភ្នំពេញ ។
ជនសង្ស័យឈ្មោះ សុវណ្ណ នុត អាយុ១៦ឆ្នាំ ជនជាតិខ្មែរ មុខរបរមិនពិត ភូមិច្រកក្រសាំង ឃុំទួលព្រេច ស្រុកអង្គស្នួល ខេត្តកណ្តាល ។ បានលួចម៉ូតូ១គ្រឿងសេ១១០ ពណ៌ខ្មៅ ស៊េរីឆ្នាំ២០១២ ស្លាកលេខ ភ្នំពេញ១BH-៨៥២៤ ហើយម៉ូតូនេះត្រូវបានដកហូតបានមកវិញ ។ ជនរងគ្រោះឈ្មោះរី វិរះ ភេទប្រុស អាយុ១៧ឆ្នាំ ជនជាតិខ្មែរ មុខរបរជាងភ្លើង ស្នាក់ភូមិច្រកក្រសាំង ឃុំទួលព្រេចនោះដែរ ។
ព័ត៌មានបានឲ្យដឹងថា កាលពីថ្ងៃទី២២ ខែវិច្ឆិកា ឆ្នាំ២០១៧ វេលាម៉ោង១៧និង៣០នាទីព្រឹក ក្មេងប្រុសដែលជាម្ចាស់ម៉ូតូ បានយកម៉ូតូរបស់ខ្លួនទៅឲ្យ ជាងជួសជុលម្នាក់ឈ្មោះផុន ផល ភេទប្រុស អាយុ៥៥ឆ្នាំ រស់នៅក្នុងភូមិទន្លាប់ ឃុំទួលព្រេច ស្រុកអង្គស្នួល ខេត្តកណ្តាល ជួសជុលឲ្យដោយម៉ូតូបែកពីដាងមុខ និងត្រូវប្ដូរប្រេងម៉ាស៊ីនផងដែរ ។ ប៉ុន្តែពេលយកទៅដល់ជាងមិនទាន់បានជួសជុលឲ្យនៅឡើយ ដោយសារជាប់រវល់ទៅបុណ្យ ហើយក៏បានឲ្យម្ចាស់ទុកម៉ូតូនៅក្នុងផ្ទះគាត់សិន ដោយមិនបានដកសោរចេញឡើយ ។ ប្រភពបន្តទៀតថា មុនពេលចេញទៅបុណ្យជាងបានផ្ដាំប្រពន្ធគាត់ឲ្យមើលម៉ូតូផង រួចទើបចាកចេញទៅបាត់ ចំណែកជនសង្ស័យបានដើរទៅឃើញម៉ូតមានសោរជាប់ស្រាប់ក៏បានធ្វើសកម្មភាពលួចជិះចេញទៅបាត់ ប៉ុន្តែពេលនោះត្រូវបានប្រពន្ធជាងម៉ូតូឃើញទាន់ ។ ក្រោយពីជាងត្រឡប់មកពីបុណ្យវិញប្រពន្ធបានប្រាប់ទើបទាំងជាង និងម្ចាស់ម៉ូតូបាននាំគ្នាដើររករហូត១ថ្ងៃ ក្រោយទើបបានប្រទះឃើញជនសង្ស័យកំពុងដើររកកន្លែងលក់ម៉ូតូម្ដុំផ្សារទួលលៀប សង្កាត់ស្នោរ ខណ្ឌពោធិ៍សែនជ័យ ក៏ចាប់ខ្លួននាំទៅប្រគល់ជូននគរបាលតែម្ដង ។
ជនសង្ស័យបានសារភាពថា ពេលលួចបានខ្លួនបានយកម៉ូតូនោះជិះទៅភ្នំពេញ រួចបានដោះគ្រឿងមួយចំនួនមានដូចជា បេនសាំង បូមក្រោយ១គូរ និងកាងក្រោយ ព្រមទាំងកុងទ័រ លក់បានលុយមួយចំនួន រួចទិញគ្រឿងក្នុងម៉ូតូមួយទឹកដាក់ចូលវិញ នៅសល់លុយសរុប១៥ដុល្លារប៉ុណ្ណោះ បន្ទាប់មកបានជិះម៉ូតូ ដើម្បីរកកន្លែងលក់ ហើយក៏ត្រូវបានម្ចាស់គេចាប់ខ្លួនតែម្ដង ៕
ចែករំលែកព័តមាននេះ