ខេត្តព្រះសីហនុ ៖ ព្រឹកថ្ងៃទី២៤ ខែវិច្ឆិកា ឆ្នាំ២០១៧ នាវាកងទ័ពជើងទឹកប្រទេសឥណ្ឌាមួយគ្រឿង បានចូលចតនៅកំពង់ផែអន្តរជាតិក្រុងព្រះសីហនុ ប្រកបដោយសុវត្ថិភាព ដើម្បីធ្វើទស្សនៈកិច្ចនៅព្រះរាជាណាចក្រកម្ពុជា រយៈពេល៣ថ្ងៃ គឺចាប់ពីថ្ងៃទី២៤ ខែវិច្ឆិកា ដល់ថ្ងៃទី២៧ ខែវិច្ឆិកា ឆ្នាំ២០១៧ ។ តាមរបាយការណ៍បានឲ្យដឹងថា នាវាខាងលើទម្ងន់ផ្ទុក៣,៣០០តោន បំពាក់ដោយអាវុធជាច្រើនប្រភេទដូចជា អាវុធការពារដែនអា
នៅក្នុងដំណើរចូលចតនាវាខាងលើនេះ បានការទទួលស្វាគមន៍ពី លោកឧត្តមនាវីត្រីយ៍ អ៊ិន សុខេមរា នាយរងសេនាធិការ កងទ័ពជើងទឹកមូលដ្ឋានសមុទ្រ តំណាងដ៏ខ្ពង់ខ្ពស់លោកឧត្តមនាវីឯក អ៊ុក សីហា មេបញ្ជាការរងកងទ័ពជើងទឹក និងជាមេបញ្ជាការមូលដ្ឋានសមុទ្រ និងក៏មានការទទួលស្វាគមន៍ពីស្ថានទូតឥណ្ឌានៅក្នុងខេត្តព្រះសីហនុផងដែរ ។
លោកឧត្តមនាវីត្រីយ៍ អ៊ិន សុខេមរា នាយរងសេនាធិការកងទ័ពជើងទឹកមូលដ្ឋានសមុទ្រ បានឲ្យដឹងថា ការចូលចតនាវាខាងលើ ដើម្បីរឹតចំណងសាមគ្គីភាព មិត្តភាព និងកិច្ចសហប្រតិបត្តការរវាងកងទព័ជើងទឹកប្រទេសទាំងពីរ ពិសេសចំណងកាទូតរវាងប្រទេសទាំងពីរ កាន់តែរឹងមាំថែមទៀត ។
លោកឧត្តមនាវីត្រីយ៍បានបញ្ជាក់ថា ក្នុងនាមមេបញ្ជាការរងកងទ័ពជើងទឹក និងជាមេបញ្ជាការមូលដ្ឋានសមុទ្រ នឹងសហការណ៍ក្នុងការការពារនៃការស្នាក់នៅរបស់គណ:ប្រតិភូខាងលើ លើទឹកដីខេត្តព្រះសីហនុ ទទួលបានសន្តិសុខ សុវត្ថិភាពជូនដល់នាវិកក្នុងដំណើរកម្សាន្តនៅលើទឹកដីខេត្តព្រះសីហនុ ក៏ដូចជានៅក្នុងព្រះរាជាណាចក្រកម្ពុជា ប្រកបដោយសុវត្ថិភាព ។
លោកវរនាវីឯក Nitin Carappa ប្រធានបេសកកម្មនាវាកងទ័ពជើងទឹកឥណ្ឌា បានថ្លែងអំណរគុណចំពោះកងទ័ពជើងទឹកកម្ពុជា អាជ្ញាធរខេត្ត និងប្រជាជនខេត្តព្រះសីហនុ ដែលបានទទួលស្វាគមន៍ក្នុងការចូលចតនាវាកងទ័ពឥណ្ឌា នៅលើទឹកដីខេត្តព្រះសីហនុ ក្នុងគោលបំណងពង្រឹងពង្រីកទំនាក់ទំនងមិត្តភាព សាមគ្គីភាព កិច្ចសហប្រតិបត្តិការរវាងកងទ័ពជើងទឹកនៃប្រទេសទាំងពីរ ឥណ្ឌា-កម្ពុជា ឲ្យកាន់តែរឹងមាំ ព្រមទាំងបានស្វែងយល់ពីវប្បធម៍ ប្រពៃណី ទំនៀមទម្លាប់ និងវិស័យយោធា នៃប្រទេសទាំងពីរ តាមរយៈដំណើរទស្សនៈកិច្ចនៅលើទឹកដី នៃព្រះរាជាណាចក្រកម្ពុជា ជាពិសេសការទំនាក់ទំនងទ្វេរភាគីរវាងប្រទេសទាំងពីរ ប្រជាជនទាំងពីរកាន់តែស្និទស្នាលបន្ថែមទៀត ហើយជាពិសេសបានធ្វើការផ្លាស់ប្តូរបទពិសោធន៍ពីគ្នាទៅវិញទៅមក ។
លោកវរនាវីឯក បានបន្តថា លោកមានសេចក្តីរីករាយបានដឹកនាំនាវា នៃកងទព័ជើងទឹកឥណ្ឌាមកចូលចត និងបានទទួលបានការស្វាគមន៍យ៉ាងកក់ក្តៅពីថ្នាក់ដឹកនាំកងទ័ពជើងទឹក នៃកងយោធពលខេមរភូមិន្ទ នៃព្រះរាជាណាចក្រកម្ពុជា និងអាជ្ញាធរខេត្តព្រះសីហនុ នាពេលនេះ ដោយបានពាំនាំមកនូវមិត្តភាព និងចក្ខុវិស័យដ៏ល្អប្រសើរ ដែលអភិវឌ្ឍន៍រួមគ្នាជាប្រទេសកាន់ព្រះពុទ្ធសាសនាប្រកបដោយសុជីវធម៍ល្អប្រពៃ ។ លោកវរនាវីឯកបានបញ្ជាក់ជាចុងក្រោយថា កងទ័ពទាំងពីរនឹងធ្វើសកម្មភាពជាច្រើនទៀត សមយុទ្ធរួមគ្នា ទស្សនៈសិក្សា និងផ្លាស់ប្តូរគំនិតការប្រកួតកីឡាជាដើម ៕
ចែករំលែកព័តមាននេះ