ខេត្តត្បូងឃ្មុំ ៖ សកម្មភាពដាក់ដាយនៅព្រែកជីកអតីតឡូត៏នេសាទលេខ៩ ឃុំទន្លេបិទ ស្រុកត្បូងឃ្មុំ មានដាក់ជាច្រើនកន្លែងទោះបីជាកន្លងមកធ្លាប់ត្រូវបានសមត្ថកិច្ចចំរុះធ្វើការបង្ក្រាបយ៉ាងណាក្តី ។
ដោយមើលឃើញបែបនេះទើបថ្នាក់ដឹកនាំខេត្តចាត់ឲ្យមន្ត្រីជំនាញចុះបង្ក្រាបព្រឹកថ្ងៃទី២៣ ខែវិច្ឆិកា ឆ្នាំ២០១៧ ប៉ុន្តែមិនមានជនខិលខូចណាម្នាក់ត្រូវបានចាប់ខ្លួននោះទេ គឺបានត្រឹមបំផ្លាញចោលនូវឧបករណ៏នេសាទខុសច្បាប់ប្រភេទដាយជាច្រើនមាត់ផងដែរ ។
លោក ម៉ា យ៉ុងរី នាយខណ្ឌរដ្ឋបាលជលផលខេត្តត្បូងឃ្មុំមានប្រសាសន៏ឲ្យដឹងថា ក្រោយពីទទួលបានបញ្ជារពីថ្នាក់ដឹកនាំខេត្តនោះរូបលោកបានដឹកនាំមន្ត្រីក្រោមឱវាទជាច្រើននាក់ក្នុងនោះមានទាំងកម្លាំងអធិការដ្ឋានរដ្ឋបាលជលផលមេគង្គដោយបានចុះទៅផ្នែកខាងលើជាប់បឹងឃើញមានក្រុមអ្នកខិលខូចដាក់របាំងព្រួលផ្ជិតព្រែកមានរហូតដល់ទៅ០២កន្លែង គឺត្រូវបានកម្លាំងចំរុះចុះបង្ក្រាបដែលបានធ្វើឡើងជាបន្តបន្ទាប់ទោះបីជាមិនមានបញ្ជារពីថ្នាក់លើក៏ជំនាញរបស់លោកនូវតែចុះបង្ក្រាបដែរ ។
លោកបន្តថា ក្នុងនោះមានលបចំនួន១៥លបត្រូវបានបំផ្លាញចោលក្នុងប្រតិបត្តិការចុះបង្ក្រាបនេះពិតជាបានឃើញមានដាយតូចធំបានដាក់ជាច្រើនកន្លែងមែន ។ ដោយកម្លាំងជលផលនិងនគរបាលបានចុះក្នុងព្រែកកាត់បំផ្លាញដាញបានជាបន្តបន្ទាប់ដែលមានចំនួន១៥មាត់ក្នុងនោះមានពលរដ្ឋមួយចំនួនដែលមានការភ្ញាក់រលឹកបានចុះទៅសារ និងរុះរើដាយដោយខ្លួនឯង ។ ចាប់តាំងពីពេលដែលរដូវទឹកទន្លេមេគង្គ បានឡើងមក និងស្រកទៅវិញនៅក្នុងអតីតឡូត៏នេសាទលេខ៩នេះគឺបានចុះបង្ក្រាបដែលបានធ្វើឡើងជាបន្តបន្ទាប់ចំនួន០៤លើកមកហើយដែលមើលទៅ ហាក់បីដូចជាវែកចកផងដែរ ។
លោកនាយខណ្ឌរដ្ឋបាលជលផលខេត្តត្បូងឃ្មុំបញ្ជាក់ថា កន្លងមកមន្ត្រីជលផលធ្លាប់បានចុះណែនាំដល់ប្រជានេសាទមួយចំនួនតាមបណ្តាស្រុកដែលជាប់នឹងដងទន្លេមេគង្គឲ្យបានយល់ដឹងពីឧបករណ៏នេសាទខុសច្បាប់ និងឧបករណ៏នេសាទស្របច្បាប់ ហើយក៏មានអ្នកខ្លះមានការភ្ញាក់រលឹកបានងាកពីនេសាទមិនស្របច្បាប់មកនេសាទស្របច្បាប់វិញដែលនេះជាការប្រសើរបំផុត ៕
ចែករំលែកព័តមាននេះ