រាជធានីភ្នំពេញ ៖ ទីបំផុតរដ្ឋសភាបានកំណត់យកថ្ងៃទី២៧ វិច្ឆិកា ឆ្នាំ២០១៧ខាងមុខនេះបើកសម័យប្រជុំពេញអង្គ ដើម្បីប្រកាសផ្តល់សុពលភាពអ្នកតំណាងរាស្ត្រថ្មីចំនួន៤៤រូប ដែលគណៈកម្មាធិការជាតិរៀបចំការបោះឆ្នោត (គ.ជ.ប) បានបែងចែងរួចហើយជាលើកទី១ ។…
រាជធានីភ្នំពេញ ៖ ទីបំផុតរដ្ឋសភាបានកំណត់យកថ្ងៃទី២៧ វិច្ឆិកា ឆ្នាំ២០១៧ខាងមុខនេះបើកសម័យប្រជុំពេញអង្គ ដើម្បីប្រកាសផ្តល់សុពលភាពអ្នកតំណាងរាស្ត្រថ្មីចំនួន៤៤រូប ដែលគណៈកម្មាធិការជាតិរៀបចំការបោះឆ្នោត (គ.ជ.ប) បានបែងចែងរួចហើយជាលើកទី១ ។ នេះបើតាមការឲ្យដឹងពីលោក ឈាង វុន អ្នកនាំពាក្យរដ្ឋសភា។
ថ្លែងក្នុងសន្និសីទសារព័ត៌មានព្រឹកថ្ងៃទី២៤ វិច្ឆិកា ក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភាដែលដឹកនាំដោយសម្តេច ហេង សំរិ នប្រធានរដ្ឋសភានោះ លោក ឈាង វុន បានឲ្យដឹងថា គ.ជ.ប បានប្រគល់បញ្ជីបេក្ខភាពដែលត្រូវជាប់ជាអ្នកតំណាងរាស្ត្រមករដ្ឋសភារួចហើយ ក្នុងនោះមានតែគណបក្សនយោបាយចំនួនបីប៉ុណ្ណោះដែលបានបេក្ខជន សរុបស្មើ ៤៤អាសន្នៈ ដែលត្រូវប្រកាសសុពលភាពនៅពេលខាងមុខនេះ ។
លោកបញ្ជាក់ថា៖ «ថ្ងៃច័ន្ទខាងមុខនេះសភានឹងប្រជុំពេញអង្គ ព្រោះថា អាលូវនេះសភាដំណើរការ ។
អញ្ចឹងយើងនឹងប្រកាសសុពលភាព សម្តេចប្រធានរដ្ឋសភា នឹងអានឈ្មោះបេក្ខជនដែលបានដាក់បញ្ជូនមក ហើយអ្នកដែលមិនបានដាក់មកនោះនឹងដាក់នៅជុំទី២ ដែលនៅខ្វះ ១១នាក់»។ លោកបានបន្ថែមថា អ្នកដែលត្រូវរដ្ឋសភាប្រកាសសុពលភាពនឹងត្រូវទៅស្បថក្នុងព្រះបរមរាជវាំង ទើបទទួលបានជាអ្នកតំណាងរាស្ត្រពេញសិទ្ធិ ។
លោកបញ្ជាក់បន្ថែមថា « អញ្ចឹង ហើយពីការៀបចំអាសន្នៈឡើងវិញនេះអាចធ្វើនៅជុំទី២ ដើម្បីបំពេញបន្ថែម១១អាសន្នៈទៀត ដែលមិនទាន់មានឈ្មោះ ។ សូមបញ្ជាក់ថា ការងាររបស់សភានេះមិនមែនដើមអាណត្តិទី៥ អីញ្ចឹងមានភាពខុសគ្នា »។
ជាមួយគ្នានោះដែរ លោក ឈាង វុន ក៏បានឲ្យដឹងថា ក្នុងកិច្ចប្រជុំគណៈកម្មាធិការអចិន្ត្រៃយ៍ ក៏បានសម្រេចរឿងជ្រើសរើសសមាជិក គ.ជ.ប ថ្មីចំនួន ៣ រូប សម្រាប់ជំនួសតំណែងសមាជិក គ.ជ.ប ដែលបានលាលែងកាលពីពេលថ្មីៗកន្លងមកចំនួន៣ រូប ។
ដោយការជ្រើសរើសនេះអចិន្ត្រៃយ៍សភា បានសម្រេចឱ្យអគ្គលេខាធិការដ្ឋានរដ្ឋសភារៀបចំបែបបទ និងនីតិវិធីដើម្បីប្រកាសជ្រើសរើសសមាជិកថ្មី ៕
ចែករំលែកព័តមាននេះ