រាជធានីភ្នំពេញ ៖ ជនជាតិបរទេសម្នាក់បានបើករថយន្តលុចស៊ិច RX៣០០ បត់ឆ្វេងឆ្លងផ្លូវមិនប្រយ័ត្ន ក៏ត្រូវបុរសពីរនាក់ជិះម៉ូតូក្នុងល្បឿនលឿន ព្រមទាំងខ្វះការប្រុងប្រយ័ត្នដូចគ្នា បានជ្រុលទៅបុកចំពាក់កណ្ដាលរថយន្តពេញទំហឹង បណ្ដាលឲ្យអ្នកបើកម៉ូតូរងរបួសធ្ងន់ម្នាក់ និងស្រាលម្នាក់…
រាជធានីភ្នំពេញ ៖ ជនជាតិបរទេសម្នាក់បានបើករថយន្តលុចស៊ិច RX៣០០ បត់ឆ្វេងឆ្លងផ្លូវមិនប្រយ័ត្ន ក៏ត្រូវបុរសពីរនាក់ជិះម៉ូតូក្នុងល្បឿនលឿន ព្រមទាំងខ្វះការប្រុងប្រយ័ត្នដូចគ្នា បានជ្រុលទៅបុកចំពាក់កណ្ដាលរថយន្តពេញទំហឹង បណ្ដាលឲ្យអ្នកបើកម៉ូតូរងរបួសធ្ងន់ម្នាក់ និងស្រាលម្នាក់ ហេតុការណ៍នេះបានកើតឡើងនៅវេលាម៉ោង០៩យប់ ថ្ងៃទី២៣ ខែវិច្ឆិកា ឆ្នាំ២០១៧ ទល់មុខនឹងខុនដូមួយកន្លែង ផ្ទះលេខ១៦៨ ផ្លូវ៣៧០ កែងនិងផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន ។
តាមប្រភព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញ បុរសជាជនជាតិបរទេសម្នាក់ បានបើករថយន្តម៉ាកឡិចស៊ីស RX៣០០ ពណ៌ទឹកមាស ពាក់ស្លាកលេខ ភ្នំពេញ ២AJ-៧០០៥ បានធ្វើដំណើរតាមផ្លូវព្រះនរោត្តម ក្នុងទិសដៅពីជើងទៅត្បូង ខណៈមកដល់ចំណុចកើតហេតុ បានបត់ឆ្វេង គោលបំណងចូលទៅខុនដូខាងលើ ខណៈពេលដែលរថយន្តបត់ឆ្លងបានពាក់កណ្ដាលផ្លូវ ក៏ស្រាប់តែមានបុរស២នាក់ ជិះម៉ូតូម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ កំពង់ចាម ១L-៨៧៥៧ ធ្វើដំណើរតាមផ្លូវព្រះនរោត្ដម ក្នុងទិសដៅពីត្បូងទៅជើង បញ្ច្រាសទិសដៅគ្នា ក្នុងល្បឿនលឿន ព្រមទាំងស្រវឹងផងនោះ បានជ្រុលទៅបុកនឹងរថយន្ត ចំពាក់កណ្ដាលពេញទំហឹង បណ្ដាលឲ្យមានអ្នកបើកម៉ូតូ ហោះប្លោងទៅផ្ទប់នឹងកញ្ចក់រថយន្តទ្វារក្រោយបែកខ្ចាយ និងធ្វើឲ្យរងរបួសរយះមុខរយះមាត់ សន្លប់ស្តូកស្តឹង ត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិកឯងជន ចំណែកអ្នកអង្គុយខាងក្រោយវិញរងរបួសរលាត់ដៃរលាត់ជើងតិចតួច មិនបានទៅមន្ទីរពេទ្យនោះទេ ។ ឬឯម៉ូតូវិញរងការខូចខាតខ្ទេចផ្នែកខាងមុខ និងវៀចជំពាស់ ។
ដោយឡែកខាងរថយន្តវិញរងការខូចខាតក្រពិតទ្វារក្រោយចំហៀងខាងស្តាំ និងបែកកញ្ចក់តែមិនមានគ្រោះថ្នាក់ដល់អ្នកបើកបរនោះទេ ភ្លាមនោះអ្នកបើកបរដែលជាជនជាតិបរទេស បានចុះពីលើរថយន្តដើរចូលទៅក្នុងខុនដូបាត់ស្រមោល ។
ក្រោយពេលកើតហេតុ សមត្ថកិច្ចមូលដ្ឋាន និងជំនាញ់បានចុះទៅដល់កន្លែងកើតហេតុ រួចហើយបានធ្វើវាស់វែងយកទៅម៉ូតូ និងរថយន្តទៅរក្សាទុកនៅអធិការដ្ឋានខណ្ឌចំការមន ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ