រាជធានីភ្នំពេញ ៖ នៅល្ងាចថ្ងៃសៅរ៍ ទី២៥ វិច្ឆិកា ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រកួតប្រដាល់ជាលក្ខណៈអន្តរជាតិទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញ ។…
រាជធានីភ្នំពេញ ៖ នៅល្ងាចថ្ងៃសៅរ៍ ទី២៥ វិច្ឆិកា ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រកួតប្រដាល់ជាលក្ខណៈអន្តរជាតិទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញ ។ កីឡាករ ចាន់ សំអាត នឹងក្លាយជាសមាសភាពរបស់កម្ពុជាតែមួយរូបគត់ ដែលនឹងស្វាគមន៍កីឡាករថៃ ខណៈការប្រកួតទាំងមូលក៏នឹងកាន់តែមានការចាប់អារម្មណ៍ថែមទៀត ដោយសារតែក្រៅពីការប្រកួតជាលក្ខណៈអន្តរជាតិនោះក៏មានការប្រកួតជម្រុះរវាងកីឡាករជើងខ្លាំង៤រូបក្នុងវគ្គ៨នាក់សម្រាប់សប្ដាហ៍ចុងក្រោយដែលពិតជាមានអ្នកគាំទ្ររង់ចាំទស្សនាកកកុញមិនខាន ។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចស្អែកនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនោះនិយមមកទស្សនាកកកុញ ស្របគ្នាដែលនៅប៉ុស្ដិ៍លេខ៥ក៏មានកំណើនអ្នករស់នៅច្រើនឡើងព្រោះតែសំណង់បុរីព្រោងព្រាតនោះផង ។ កីឡាករកម្ពុជាគឺ ចាន់ សំអាត និងជើងខ្លាំងមកពីប្រទេសថៃ Verak Prawattlek នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏ត្រូវប៉ះគ្នាក្នុងវគ្គផ្ដាច់ព្រ័ត្រសម្រាប់ការប្រកួតជម្រុះ១៦នាក់យក៨នាក់ដែលជាការប្រកួតក្នុងវគ្គដ៏សំខាន់ចាប់តាំងពីប៉ុស្ដិ៍លេខ៥បានបើកការប្រកួតជម្រុះជ្រើសរើសជើងឯក អមដោយការប្រកួតជាលក្ខណៈអន្តរជាតិមួយគូៗនោះផង ។
សម្រាប់ការប្រកួតជាលក្ខណៈអន្តរជាតិឯណេះវិញ កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន ដើម្បីក្រេឌីត ។
លោក សេង កដិកា អ្នករៀបចំការប្រកួតប្រចាំនៅទូរទស្សន៍ប៉ុស្ដិ៍លេខ៥បានថ្លែងប្រាប់ថា ក្នុងចំណោមកីឡាករកម្ពុជា និងថៃទាំង២រូបដែលមានឈ្មោះដណ្ដើមយកខ្សែក្រវាត់ក្នុងព្រឹត្តិការណ៍ប្រដាល់នោះ កីឡាករ ចាន់ សំអាត គឺជាជើងខ្លាំងដែលធ្លាប់មានឈ្មោះបោះសំឡេង បើទោះជាគេត្រូវប្រឈមនឹងកីឡាករថៃល្អជាគូប្រកួតពោរពេញដោយសមត្ថភាពក្ដី ។ គេត្រូវប៉ះប្រកួតជាមួយកីឡាករថៃឈ្មោះ Verak Prawattlek ក្នុងនាមជាគូដណ្ដើមពិន្ទុអន្តរជាតិសម្រាប់ប្រដាល់អន្តរជាតិ នៅថ្ងៃសៅរ៍ស្អែក ដោយការប្រកួតរបស់ពួកគេក៏មានការចាប់ អារម្មណ៍មិនតិចនោះដែរ ដោយសារតែមានការប្រកួតរបស់ជើងខ្លាំង៤រូបនៅថ្ងៃនោះផង ។ លោកថា ជំនួបរវាងពួកគេមិនមែនជារឿងធម្មតានោះទេ ដោយសារអ្នកណាឈ្នះក្រៅពីទទួលបានទឹកប្រាក់ច្រើនហើយ ក៏ទទួលបានទំនុកចិត្តពីអ្នកគាំទ្រដូចគ្នា ។ ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរនោះទេ ហើយនឹងធ្លាក់ដោយស្វ័យប្រវត្តិទៅទៀត ។ លោកថា ជំនួបរបស់ពួកគេត្រូវដាក់យ៉ាងពិសេសសម្រាប់ថ្ងៃសៅរ៍សប្ដាហ៍ទី៤ចុងខែនេះតែម្ដង ។ លោកថា កីឡាករ ចាន់ សំអាត អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។
លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួប ចាន់ សំអាត ជាមួយកីឡាករជាដៃគូពិតជាមិនធម្មតាសម្រាប់ការប្រកួតទាំងមូល ។ លោកថា កីឡាករកម្ពុជារូបនេះមានការឈានឡើងសមត្ថភាព ហើយការប្រកួតប៉ុន្មានលើកចុងក្រោយក៏ល្អផងដែរ ទើបលោកយល់ថាគេអាចបាន៣ពិន្ទុពីការប្រកួតនៅថ្ងៃស្អែក បើទោះជាមុននេះបន្តិចគេវាយជាមួយថៃល្អខ្លះ និងមិនសូវល្អខ្លះ នៅលើសង្វៀនអន្តរជាតិ ។ លោកនិយាយថា ចាន់ សំអាត នៅតែចាត់ទុកថាជាជើងខ្លាំងនៅលើសង្វៀន ទើបលោករំពឹងខ្ពស់សម្រាប់ការប្រកួតលើកនេះ ។ កីឡាករថៃដែលត្រូវប្រកួតជាមួយ ចាន់ សំអាត លោកថា ធ្លាប់ប្រកួត៨១លើក ឈ្នះ៦៤លើក ចាញ់១៧លើក និងស្មើ០ ក្នុងពេលដែលកីឡាករកម្ពុជា ធ្លាប់ប្រកួតរហូតដល់៨១លើក ឈ្នះ៦៦លើក ចាញ់១៣លើក និងស្មើ២លើក ។ គូនេះប្រកួតគ្នាក្នុងប្រភេទទម្ងន់៥៤គីឡូក្រាម ដោយការប្រកួតរបស់គេគឺជាលើកទី១ដែលអ្នកទាំងពីរប៉ះគ្នាផងដែរ ។
សម្រាប់ការប្រកួតជម្រុះ១៦នាក់យក៨នាក់ លោកថារួមមានកីឡាករ វត្ថា ប៊ុនឃាង មកពីក្លិបអង្គរធំ ត្រូវប្រកួតជម្រុះជាមួយកីឡាករ សៅ វណ្ណា មកពីក្លិបយុវជនវាលស្បូវ ដោយអ្នកទាំងពីរសុទ្ធតែជាអ្នកឈ្នះក្នុងវគ្គ១៦នាក់ដូចគ្នា ហើយការប្រកួតរបស់គេក៏ស៊ីសាច់ហុតឈាម ព្រោះមានតែម្នាក់ប៉ុណ្ណោះដែលមានឱកាសបានប្រកួតបន្ត ដោយសារតែលក្ខខណ្ឌនៃការប្រកួតគឺតម្រូវឱ្យអ្នកឈ្នះបានឡើងប្រកួតបន្តក្នុងវគ្គ៨នាក់ ហើយម្នាក់ទៀតដែលបរាជ័យគឺនឹងធ្លាក់ដោយស្វ័យប្រវត្តិ ។ លោកសេង កដិកា បញ្ជាក់ថា ការប្រកួតគូនេះ ម្នាក់ៗមានការត្រៀមទុកសម្បើមណាស់ ដោយសារតែអ្នកដែលបានឡើងទៅវគ្គ៨នាក់ក្នុងពេលខាងមុខ គឺនឹងមានឱកាសកាន់តែច្រើន។
លោកថា ការប្រកួតរបស់ពួកគេនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែលភាគីម្ខាងៗសុទ្ធតែអះអាងថា ត្រូវតែដណ្ដើមឱ្យបានកៅអីក្នុងវគ្គ៨នាក់ចុងក្រោយនៅ ។
លោកចាត់ទុកថា អ្នកទាំងពីរគឺជាធនធានកីឡាករដ៏កម្រដែលមានសមត្ថភាពខ្ពស់នៅក្នុងសង្វៀនប្រដាល់ ។ លោកថា ភាគីម្ខាងៗ សុទ្ធតែបានត្រៀមខ្លួន តែគេមិនទាន់ប្រាកដថាតើការតាំងចិត្តរបស់អ្នកនាងនឹងទទួលបានជ័យជម្នះសម្រាប់ការប្រកួតមួយនេះ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងម្ខាងៗ ។ សម្រាប់មួយគូទៀត គឺកីឡាករ ពុយ វណ្ណៈ មកពីក្លិបឃ្លាំងមឿងកីឡា ជាមួយនឹងកីឡាករ មាស សុជាតិ មកពីក្លិបប៉ោយប៉ែត ដោយអ្នកទាំងពីរក៏ជាបេក្ខភាពត្រូវប្រកួតជម្រុះយកកៅអី៨នាក់ផងដែរ ខណៈដែលអ្នកទាំងពីរក៏ជាបេក្ខភាពជើងខ្លាំងក្នុងវគ្គ១៦នាក់នៅក្នុងព្រឹត្តិការណ៍នោះដែរ ។ សម្រាប់ការប្រកួតនៅទូរទស្សន៍អាស៊ីអាគ្នេយ៍ ក៏មានការប្រកួតជាលក្ខណៈអន្តរជាតិផងដែរ តាំងពីរសៀលថ្ងៃសៅរ៍ និងព្រឹកថ្ងៃអាទិត្យ ៕
ចែករំលែកព័តមាននេះ