ខេត្តបាត់ដំបង ៖ ប្រភពបានបង្ហើបឱ្យដឹងមុននេះបន្តិចថា ប្រធានមន្ទីរព័ត៌មានខេត្ត គឺលោកស្រី ប៉ុក ចាន់ធារី បានវាយតប់បោចសក់គ្នាគ្មានត្រាប្រណី ជាមួយមន្ត្រីក្រោម
ឱវាទ បង្កឱ្យផ្អើលពេញមន្ទីរព័ត៌មានខេត្ត កើតឡើងកាលពីវេលាម៉ោងប្រហែល០៩ព្រឹកថ្ងៃទី២៣ វិច្ឆិកា នេះ ស្ថិតក្នុងភូមិរតន: សង្កាត់រតន: ក្រុងបាត់ដំបង ដែលគេសង្ស័យបណ្ដាលមកពីបញ្ហាផ្ទៃក្នុងរបស់មន្ទីរ និងបញ្ហាស៊ីដាច់លុយកាក់ ។
ប្រភពដដែលបានឲ្យដឹងទៀតថា អំពើហិង្សាដ៏កំរោលនៅក្នុងរដ្ឋបាលនៃមន្ទីរព័ត៌មានខេត្តនេះ ភាគីម្ខាង គេឃើញមានលោកស្រីប៉ុក ចាន់ធារី ប្រធានមន្ទីរព័ត៌មានខេត្ត និងកូនប្រុសរបស់គាត់ ឈ្មោះទេព្យ សុភមង្គល ដែលជាមន្ត្រីនៃមន្ទីររបស់ម្ដាយនេះដែរ ។
ដោយឡែក ភាគីម្ខាងទៀត ដែលមានតែម្នាក់ឯង គឺលោកស្រី អ៊ុក វី អតីតប្រធានគណនេយ្យនៃមន្ទីរព័ត៌មាន បច្ចុប្បន្ន ត្រូវបានគេដកហូតតំណែងឱ្យធ្វើជាមន្ត្រីធម្មតា នៅក្នុងមន្ទីរ ដែលសំបូរទៅដោយរឿងអាស្រូវមិនចេះចប់នេះ ។
គេមិនទាន់ដឹងមូលហេតុឲ្យប្រាកដ ដែលនាំឱ្យឈានដល់ការប្រើអំពើហិង្សា រវាងប្រធានមន្ទីរជាមួយមន្ត្រីក្រោមឱវាទរបស់ខ្លួននេះនៅឡើយទេ ។ ប៉ុន្តែបើតាមការពិនិត្យលើសកម្មភាពប្រតាយប្រតប់គ្នា ក្នុងវីដេអូឃ្លីបមួយ ដែលមានរយៈពេលជាង១នាទី គេឮសំឡេងលោកស្រី ប៉ុក ចាន់ធារី ស្រែកព្រមានលោកស្រីអ៊ុក វី រួចលោកស្រីប្រធានមន្ទីររូបនេះ ស្ទុះទៅវាយតប់ និងបោចសក់គ្នា អូសពីមាត់ទ្វារចូលក្នុងមន្ទីរតែម្ដង ។ ប៉ុន្តែនៅក្នុងហេតុការណ៍នេះ គេឃើញមានមន្ត្រីមន្ទីរព័ត៌មាន៣នាក់ បានចូលទៅឃាត់ ក្នុងនោះ មានកូនប្រុសលោកស្រីប្រធានមន្ទីរម្នាក់ផងដែរ ។
បើតាមប្រភពពីមន្ត្រីមួយចំនួនបានផ្ដល់ព័ត៌មាននេះជាបឋមថា អំពើហិង្សាខាងលើនេះ គឺជាជម្លោះផ្ទៃក្នុង ដែលគេសង្ស័យថា អាចបណ្ដាលមកពីទំនាស់រឿងលុយកាក់ និងបក្សពួកនិយម ។ រឿងដ៏អាស្រូវនៅក្នុងមន្ទីរមួយនេះ បានរង្គោះរង្កើរយូរមកហើយ តែមិនត្រូវបានគេទម្លាយចេញមកក្រៅទេ ។ ប៉ុន្តែជម្លោះផ្ទៃក្នុងពេលនេះ ទំនងអាចជាសញ្ញាចាប់ផ្ដើមបែកធ្លាយកាន់តែធ្ងន់ហើយ និងអាចឈានដល់ការប្ដឹងប្តល់គ្នា ឬ អាចឈានដល់ការប៉ះពាល់មុខតំណែងខ្លះៗផងក៏មិនដឹង ។
ចែករំលែកព័តមាននេះ