ប្រទេសរុស្ស៊ី-ប្រទេសបារាំង ៖ មហាសេដ្ឋី និងជាព្រឹទ្ធសមាជិករុស្ស៊ី លោកស៊ូឡីម៉ាន់ កេរីម៉ូវ ដែលត្រូវចាប់ខ្លួនពេលចុះពីយន្តហោះកាលពីយប់ថ្ងៃទី២០ វិច្ឆិកា នៅទីក្រុងនីស ប្រទេសបារាំង ញ៉ាំងឱ្យរុស្ស៊ីខឹងសម្បានោះនាថ្ងៃទី២២ វិច្ឆិកា ត្រូវជាប់ការចោទប្រកាន់ពីបទលាងលុយកខ្វក់នៃការលួចបន្លំពន្ធ ។
រដ្ឋអាជ្ញាបារាំង លោក JEAN MICHEL PRÊTRE បញ្ជាក់ប្រាប់ AFP ថា លោកត្រូវប្រគល់លិខិតឆ្លងដែន ហើយបង់ប្រាក់ធានា៥លានអឺរ៉ូ ។ លោកពុំមានសិទ្ធិចាកចេញពីខេត្ត DES ALPES-MARITIMES ដែលមានទីក្រុងនីសឡើយ ។
លោកកេរីម៉ូវ ត្រូវឃាត់ខ្លួនពេលចុះពីយន្តហោះនាយប់ថ្ងៃទី២០ វិច្ឆិកា នៅក្រុងនីស ហើយត្រូវឃុំខ្លួនភ្លាមៗ ។ មហាសេដ្ឋីរូបនេះកាន់លិខិតឆ្លងដែនការទូតមួយ ប៉ុន្តែលោកពុំប្រើវាឡើយនាថ្ងៃទី២០ វិច្ឆិកា នោះ ព្រោះលោកធ្វើដំណើរជាលក្ខណៈឯកជន ។ ការឃាត់ខ្លួនលោកញ៉ាំងឱ្យបណ្តាសមាជិកសភា រុស្ស៊ីផ្ទុះកំហឹង និងផ្ទុះប្រតិកម្មរបស់វិមានក្រឹមឡាំង ។
លោកកេរីម៉ូវ មានទ្រព្យសម្បត្តិជាច្រើននៅប្រទេសបារាំង ពិសេសនៅ CAP D’ANTIBES ដោយលោកទិញដីធ្លី និងភូមិគ្រឹះទាំងឡាយជាបន្តបន្ទាប់ ក្នុងទឹកប្រាក់ដែលពុំបានប្រកាស ដែលប្រភពមួយថា មានជាច្រើនសិបលានអឺរ៉ូ ៕
ចែករំលែកព័តមាននេះ