លោក RATKO MLADIC ត្រូវតុលាការកាត់ទោសដាក់គុកមួយជីវិត
អតីតយូហ្គោស្លាវី ៖ មានរហស្សនាមថា «ពេជ្ឈឃាតតំបន់បាល់កង់» លោក RATKO MLADIC អតីតប្រមុខយោធាស៊ែបបូស្នី កាលពីថ្ងៃទី២២ វិច្ឆិកា…
អតីតយូហ្គោស្លាវី ៖ មានរហស្សនាមថា «ពេជ្ឈឃាតតំបន់បាល់កង់» លោក RATKO MLADIC អតីតប្រមុខយោធាស៊ែបបូស្នី កាលពីថ្ងៃទី២២ វិច្ឆិកា…
អតីតយូហ្គោស្លាវី ៖ មានរហស្សនាមថា «ពេជ្ឈឃាតតំបន់បាល់កង់» លោក RATKO MLADIC អតីតប្រមុខយោធាស៊ែបបូស្នី កាលពីថ្ងៃទី២២ វិច្ឆិកា ត្រូវតុលាការអន្តរជាតិកាត់ទោសដាក់គុកអស់មួយជីវិតពីបទប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម ។
ចៅក្រមតុលាការព្រហ្មទណ្ឌសម្រាប់អតីតយូហ្គោស្លាវី TPIY លោក ALPHONS ORIE ថ្លែងថា ដោយសារការប្រព្រឹត្តអំពើទាំងនេះតុលាការសម្រេចកាត់ទោសលោក RATKO MLADIC ដាក់គុកអស់មួយជីវិត ។ ការប្រកាសទោសនេះធ្វើឡើងដោយអវត្តមានជនជាប់ចោទដែលត្រូវនាំចេញពីសាលសវនាការមុននេះបន្តិច ព្រោះតែលោកជេរចៅក្រមទាំងឡាយរបស់តុលាការនោះថា សុទ្ធតែពួកភូតកុហក ។
កូនប្រុសជនជាប់ចោទលោក DARKO MLADIC ប្រកាសថា ឪពុករបស់លោកនឹងធ្វើការតវ៉ាទៅសាលាឧទ្ធរណ៍ចំពោះការវិនិច្ឆ័យទោសនេះដែលជាលើកចុងក្រោយរបស់តុលាការ TPIY ។
ជាង២០ឆ្នាំក្រោយសង្គ្រាមដែលបណ្តាលឱ្យមនុស្សស្លាប់ជាង១០០.០០០នាក់ ហើយមនុស្ស២,២លាននាក់រត់ភៀសខ្លួនកាលពីទសវត្សឆ្នាំ១៩៩០ លោក RATKO MLADIC អាយុ៧៤ឆ្នាំ ទទួលការកាត់ទោសពីបទចោទប្រកាន់ចំនួន១០ករណី ក្នុងនោះមានបទចោទប្រកាន់ពីការប្រល័យពូជសាសន៍នៅតំបន់ SREBRENICA ជាកន្លែងដែលបុរសស្ត្រីកុមារអ៊ិស្លាមដល់ទៅ៨.០០០នាក់ ត្រូវសម្លាប់កាលពីឆ្នាំ១៩៩៥ ។ លោកទទួលបានការលុបចោលការចោទប្រកាន់ពីអំពើប្រល័យពូជសាសន៍នៅតាមទីក្រុងច្រើនទៀត ។
បង្កើតឡើងកាលពីឆ្នាំ១៩៩៣ ដើម្បីកាត់ទោសបណ្តាអ្នកទទួលខុសត្រូវលើបទឧក្រិដ្ឋសង្គ្រាមអំឡុងពេលនៃជម្លោះនានានៅតំបន់បាល់កង់តុលាការ TPIY នាថ្ងៃទី២២ វិច្ឆិកា ឈានដល់ដំណាក់កាលសំខាន់មួយនៃប្រវត្តិរបស់ខ្លួនមុនពេលបិទទ្វារជាស្ថាពរនាថ្ងៃទី៣១ ធ្នូ ៕
ចែករំលែកព័តមាននេះ