ខេត្តប៉ៃលិន ៖ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តកែឆ្នៃ បុកជាមួយនឹងរថយន្តមួយគ្រឿងទៀត បណ្តាលឲ្យស្លាប់មនុស្សម្នាក់ និងរងរបួសស្រាលម្នាក់ ហេតុការណ៍នេះ បានកើតឡើងកាលពីវេលាម៉ោង៨ និង០០នាទីយប់ថ្ងៃទី២២ ខែវិច្ឆិកា ឆ្នាំ២០១៧នៅចំណុចភ្នំរាំង ស្ថិតក្នុងភូមិព្រៃមង្គល សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ជនរងគ្រោះ ឆាយ ឡៃ ភេទប្រុស អាយុ៥៧ឆ្នាំ រងរបួសស្រាល រស់នៅភូមិសំឡូត ឃុំសំឡូត ស្រុកសំឡូត ខេត្តបាត់ដំបង ដោយបើកបររថយន្តផ្លាកលេខ ខេមរភូមិន្ទ០២- ២-៣៥២៥រងការខូចខាតធ្ងន់ និងអ្នករួមដំណើរម្នាក់ ឈឹម ផន ភេទប្រុស អាយុ៦៤ឆ្នាំ ជានគរបាលវរព្រំដែនគោកលេខ៨២៣ ស្លាប់នៅនឹងកន្លែងកើតហេតុ ។ ចំណែកម្ចាស់រថយន្តកែឆ្នៃ មិនទាន់ស្គាល់អត្តសញ្ញាណនៅឡើយទេ ដោយក្រោយពេលកើតហេតុ បានរត់គេចខ្លួនបាត់ស្រមោល ។
ប្រភពបន្តថា ហេតុការណ៍បណ្តាលឲ្យមានករណីគ្រោះថ្នាក់ចរាចរណ៍ខាងលើនេះ បណ្តាលមកពីកត្តាមនុស្ស បើកបរមិនប្រកាន់ស្តាំ ។
បច្ចុប្បន្នវត្ថុតាង ត្រូវបានរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តប៉ៃលិន ដើម្បីរង់ចាំធ្វើការដោះស្រាយ ៕
ចែករំលែកព័តមាននេះ