រាជធានីភ្នំពេញ ៖ ក្នុងចំណោមកីឡាករកីឡាការិនីនៅក្នុងប្រទេសកម្ពុជា គេចាប់អារម្មណ៍មានតែកីឡាការិនីជិះកង់២នាក់បងប្អូនប៉ុណ្ណោះ គឺហេង ស៊ីវឡាវ និងហេង ស៊ីវហ្គិច ដែលត្រូវគេឃើញបន្តប្រឡូកក្នុងអាជីពរបស់ខ្លួនទោះបីវ័យអ្នកទាំង២រាងជ្រេ និងមានទាំងកូនម្នាក់ៗ៣-៤…
រាជធានីភ្នំពេញ ៖ ក្នុងចំណោមកីឡាករកីឡាការិនីនៅក្នុងប្រទេសកម្ពុជា គេចាប់អារម្មណ៍មានតែកីឡាការិនីជិះកង់២នាក់បងប្អូនប៉ុណ្ណោះ គឺហេង ស៊ីវឡាវ និងហេង ស៊ីវហ្គិច ដែលត្រូវគេឃើញបន្តប្រឡូកក្នុងអាជីពរបស់ខ្លួនទោះបីវ័យអ្នកទាំង២រាងជ្រេ និងមានទាំងកូនម្នាក់ៗ៣-៤ ស្ទើរមួយកន្ទេល ព្រមទាំងមានស្វាមីជាកីឡាករនៅក្នុងអាជីពជាមួយខ្លួនក្ដី ។ មកទល់ពេលនេះ អ្នកស្រី និងស្វាមីនៅតែអះអាងថា មិនបោះបង់អាជីពកីឡាមួយនេះជាដាច់ខាតទោះបីប្រកួតលែងកើតក៏ទទួលធ្វើជាមន្ត្រីប្រចាំសហព័ន្ធដើម្បីជាប្រយោជន៍ដល់កីឡានេះដែរ ។
អ្នកស្រី ហេង ស៊ីឡាវ បានអះអាងថា មកទល់ពេលនេះអ្នកស្រីមានវ័យ៣៧ឆ្នាំហើយ តែអ្នកស្រីនៅតែប្រឹងប្រែងជិះកង់ ហើយបានបន្តអាជីពជាអ្នកជិះកង់ប្រចាំនៅក្នុងសហព័ន្ធដោយបានទាំងតំណាងឱ្យប្រទេសកម្ពុជាចេញទៅប្រកួតនៅក្រៅប្រទេសជាហូរហែទៀតផង ។ អ្នកស្រីហៅខ្លួនឯងថា ជាត្រកូលកីឡាតែម្ដងដោយសារតែអ្នកស្រី និងបងស្រីជាកីឡាការិនីជម្រើសជាតិផ្នែកជិះកង់ ហើយស្វាមីអ្នកស្រី និងបងស្រីដែលជាអតីតអ្នកប្រណាំងម៉ូតូហោះ ក៏ជាមន្ត្រីប្រចាំសហព័ន្ធកីឡាជិះកង់កម្ពុជា ផងដែរ ។ អ្នកស្រីថាតាំងពីធំដឹងក្ដី អ្នកស្រីមានចំណូលចិត្តចង់លេងកីឡាខ្លាំងណាស់ ហើយក៏បានហ្វឹកហាត់នៅក្នុងសហព័ន្ធវាយកូនឃ្លីលើតុ រហូតបានក្លាយជាជម្រើសជាតិផ្នែកកីឡាវាយកូនឃ្លីលើតុក្នុងឆ្នាំ១៩៩៦ ដោយបានទាំងតំណាងប្រទេសកម្ពុជា ចេញទៅប្រកួតនៅក្នុងប្រទេសជាច្រើនជាហូរហែ ។ ប៉ុន្តែដោយសារតែមិនទទួលបានផ្លែផ្កាពីកីឡាមួយនេះ ទើបអ្នកស្រីសម្រេចចិត្តដើរចេញពីសហព័ន្ធកីឡាវាយកូនឃ្លីលើតុក្នុងឆ្នាំ២០១៣ ហើយងាកមកលេងកីឡាជិះកង់ជាជំនួសវិញរហូតទទួលបានផ្លែផ្កាជាវិជ្ជមាន ។
អ្នកស្រីបន្តថា ពីដំបូងអ្នកស្រីគ្រាន់តែជាអ្នកមានទម្លាប់ជិះកង់លេងៗជាមួយមិត្តភក្តិស្រីៗជាអ្នកជិះកង់ដើម្បីសុខភាពប៉ុណ្ណោះ តែដោយថ្ងៃមួយក្រសួងអប់រំបានបើកវេទិកាប្រណាំងកង់ស្រីៗ ទើបអ្នកស្រីចុះឈ្មោះប្រណាំងលេងៗហើយក៏ទទួលបានចំណាត់លេខ១ រហូតត្រូវក្រសួងអប់រំស្នើឱ្យចូលជាជម្រើសជាតិផ្នែកជិះកង់ក្នុងឆ្នាំ២០១៤ ។ អ្នកស្រីក៏បានជ្រោមជ្រែងឱ្យបងស្រីរបស់ខ្លួន គឺអ្នកស្រីហេង ស៊ីវហ្គិច ដែលក្នុងពេលនេះមានវ័យជិត៤០ឆ្នាំឱ្យធ្វើជាជម្រើសជាតិប្រចាំសហព័ន្ធខ្មែរទោចក្រយាន ឬសហព័ន្ធជិះកង់ជាមួយខ្លួនដែរ ដោយសារតែក្នុងសហព័ន្ធនេះគឺមានតែអត្តពលិកជម្រើសជាតិ៧រូបគត់ ក្នុងនោះកីឡាការិនីគឺមានតែអ្នកស្រី និងបងស្រីប៉ុណ្ណោះដោយសារតែស្រីៗនៅក្នុងប្រទេសកម្ពុជា មិនសូវចាប់អារម្មណ៍ចង់ក្លាយជាអ្នកជិះកង់ ឬមានដែរតែមិនសូវមានសមត្ថភាពតាមអ្វីដែលខាងសហព័ន្ធចង់បាន ។
អ្នកស្រីថាខ្លួន និងបងស្រីបានស្គាល់ស្វាមីរៀងខ្លួនដែលពួកលោកសុទ្ធតែជាកីឡាករប្រណាំងម៉ូតូហោះទាំង២ ដោយអ្នកស្រី និងបងស្រីបានចាប់ដៃគ្នាជាប្ដីប្រពន្ធដោយម្នាក់ៗមានកូន៣-៤ហើយនៅក្នុងបន្ទុក ។ ជាក់ស្ដែង បើទោះជាអ្នកស្រី មានកូន៤នាក់ទៅហើយ តែអ្នកស្រីនៅតែបន្តអាជីពជិះកង់ជាប្រចាំ ដោយស្វាមីរបស់អ្នកស្រីក៏បានប្ដូរពីកីឡាករប្រណាំងម៉ូតូហោះ មកបម្រើការនៅក្នុងសហព័ន្ធជិះកង់ក្នុងនាមជាអគ្គលេខា និងក្នុងនាមជាមន្ត្រីផ្នែកជួយចាត់ចែងដោយមិនបានបោះបង់នោះទេ ។ អ្នកស្រីថា ខ្លួន និងបងស្រី ព្រមទាំងស្វាមីមិនត្រឹមតែបន្តប្រឡូកក្នុងអាជីពកីឡាប៉ុណ្ណោះទេ តែក៏បានបើកអាជីវកម្មឈ្មោះកង់ហោះ ស្ថិតនៅម្ដុំខាងក្រោយវិទ្យាល័យព្រះស៊ីសុវត្ថិ ដោយហាងកង់របស់គ្រួសារអ្នកស្រី ក៏បានឧបត្ថម្ភកម្មវិធីប្រណាំងកង់ជាហូរហែ ដើម្បីជំរុញឱ្យអាជីពមួយនេះមានការឈានឡើង ។
អ្នកស្រីបន្តថា មកទល់ពេលនេះសហព័ន្ធប្រណាំងកង់ចង់បានកីឡាករ និងកីឡាការិនីបន្ថែមទៀតយ៉ាងខ្លាំង ដោយសារតែក្នុងសហព័ន្ធទាំងមូលមានកីឡាករកីឡាការិនីតែ៧រូបគត់ ដោយស្រីៗក៏មានតែអ្នកស្រី២នាក់បងប្អូន ហើយម្នាក់ៗក៏មានវ័យជ្រេទៅទៀត ប៉ុន្តែមកពីអត់មានអ្នកមានសមត្ថភាព ឬខ្វះការចាប់អារម្មណ៍ទើបសហព័ន្ធនេះនៅតែខ្វះធនធាន។ អ្នកស្រីថា ទោះជាអ្នកស្រីមានកូន និងមានស្វាមី ហើយគ្រួសារទាំងមូលក៏មានមុខរបរប្រចាំខ្លួន តែអ្នកស្រីមិនដែលប្រហែសខ្លួននោះទេ គឺតែងចំណាយពេលហ្វឹកហាត់ជិះកង់រាល់ព្រឹក ដោយក្នុងពេលព្រឹកត្រូវហាត់ជិះកង់លើផ្លូវ២ៗម៉ោង ហើយនៅពេលល្ងាចគឺហាត់លើម៉ាស៊ីន ដើម្បីកុំឱ្យឆាប់ហត់ ។ អ្នកស្រីថា អាជីពជិះកង់មិនអាចទាល់តែជិតដល់ថ្ងៃប្រកួតទើបខំហ្វឹកហាត់បានទេ ដោយសារតែកីឡាមួយនេះត្រូវការបង្វឹកកម្លាំង និងដង្ហើមកុំឱ្យឆាប់ហត់។ ប៉ុន្តែបើអ្នកស្រីត្រូវដល់កំណត់ធ្វើការប្រកួតគឺអ្នកស្រីនឹងហាត់បន្ថែមម៉ោងដោយអាចហាត់ជិះកង់ចុះឡើង២ទៅ៣ដងឯណោះដើម្បីឱ្យកាន់តែមានល្បឿនលឿន និងកុំឱ្យហត់ដង្ហក់។
អ្នកស្រី ហេង ស៊ីវឡេង បានអះអាងថា នៅក្នុងសហព័ន្ធជិះកង់អ្នកស្រីមិនទាន់មានស្នាដៃជាដុំកំភួនទេសម្រាប់ការងារក្រៅប្រទេស ប៉ុន្តែអ្នកស្រីក៏ធ្លាប់ទទួលបានចំណាត់ថ្នាក់លេខ១ក្នុងការប្រណាំងកង់នារីនៅក្នុងប្រទេសម៉ាឡេស៊ី ក្នុងព្រឹត្តិការណ៍ប្រកួតមិត្តភាពមួយដែលធ្វើឱ្យកីឡាការិនីមកពីប្រទេសផ្សេងៗទទួលស្គាល់ស្នាដៃរបស់អ្នកស្រីផងដែរ ។ ដោយឡែកសម្រាប់ការប្រកួតនៅក្នុងប្រទេសផ្សេងដូចជាថៃ មីយ៉ាន់ម៉ា និងសិង្ហបុរីជាដើម ដ្បិតថាមិនដែលទទួលបានមេដាយ តែអ្នកស្រីក៏ធ្វើឱ្យពិភពលោកទទួលស្គាល់ពីកម្រិតរីកចម្រើនរបស់កីឡាប្រណាំងកង់នៅកម្ពុជាដែរ ។ អ្នកស្រីថា អាជីពកីឡាប្រណាំងកង់គឺមិនប្រកាន់អាយុនោះទេ សំខាន់ឱ្យតែនៅកម្លាំង និងមានការហ្វឹកហាត់ទៀងទាត់ ។ ជាក់ស្ដែងនៅលើពិភពលោកក៏នៅតែមានកីឡាករវ័យជាង៤០ឆ្នាំចូលប្រកួតកម្រិតអន្តរជាតិនៅឡើយទើបអ្នកស្រីនៅតែបន្តអាជីពមួយនេះ បើទោះជាមានស្វាមី និងមានកូនឡើងមួយកន្ទេលទៅហើយក្ដី ។
អ្នកស្រីថា សហព័ន្ធជិះកង់កម្ពុជាមិនអត់សកម្មភាពនោះទេ ប៉ុន្តែបណ្ដាលមកពីមជ្ឈដ្ឋានមួយចំនួនមិនសូវចាប់អារម្មណ៍ទើបមិនដឹងថាកីឡាករជម្រើសជាតិនៅក្នុងវិស័យនេះបានធ្វើអ្វីខ្លះ ។ ក្នុងមួយឆ្នាំអ្នកស្រីថា សហព័ន្ធជិះកង់បានរៀបចំការប្រកួតទាំងផ្នែកបុរស និងផ្នែកនារីមិនក្រោមជាង១០លើកនោះទេ ដោយក្នុងវេទិកាបុណ្យសមុទ្រម្ដងៗ
ក៏បានរៀបចំព្រឹត្តិការណ៍ជម្រើសជើងឯកពីការប្រកួតកីឡាជិះកង់មហាជនជារៀងរាល់ឆ្នាំផងដែរ ប៉ុន្តែមកពីក្នុងពេលខ្លះកីឡាករដែលបានជាប់នៅខ្វះសមត្ថភាពនៅឡើយ ហើយក្រោយការជ្រើសរើសឱ្យធ្វើជាជម្រើសជាតិ កីឡាករទាំងនោះមិនចង់ប្រឡូកទើបក្នុងសហព័ន្ធនៅតែមានកីឡាករជម្រើសជាតិតែ៧នាក់ ហើយមិនទាន់មានការកើនឡើង ។ អ្នកស្រីថា នៅខែធ្នូខាងមុខសហព័ន្ធនឹងមានការរៀបចំការប្រកួតចំនួន៣លើកទៀតដោយនៅថ្ងៃទី២ ខែធ្នូ នឹងបើកការប្រកួតជិះកង់អន្តរជាតិដែលមានបរទេសចូលរួមនៅខេត្តសៀមរាបនៅមុខអង្គរ ថ្ងៃទី៧ ខែធ្នូ នឹងមានការប្រកួតជិះកង់ដូចគ្នានៅគិរីរម្យ និងថ្ងៃទី១៧ ក្នុងខែដដែល នឹងមានការប្រកួតនៅក្នុងព្រឹត្តិការណ៍បុណ្យសមុទ្រនៅក្នុងខេត្តកែបដោយរំពឹងថា កីឡាករ-កីឡាការិនីនៅតាមបណ្ដាក្លិបនានាដែលចូលរួមប្រកួត នឹងអាចក្លាយខ្លួនជាកីឡាករជម្រើសជាតិបន្តវេនឱ្យអ្នកស្រី។ អ្នកស្រីបន្តថា បើទោះជាខ្លួន និងបងស្រីមានវ័យជ្រេយ៉ាងនេះក្ដី តែអ្នកស្រី និងគ្រួសារមិនបោះបង់ចោលកីឡាជិះកង់នោះទេ គឺបើខាងសហព័ន្ធនៅបន្តយកជាកីឡាការិនីជម្រើសជាតិ គឺនឹងបន្ត ហើយបើខាងសហព័ន្ធឈប់យក ក៏នឹងហ្វឹកហាត់ជិះកង់ជាធម្មតាតាមទម្លាប់មិនបោះបង់ទេ ដោយសារតែអ្នកស្រីយល់ថាជិះកង់រាល់ថ្ងៃក៏ធ្វើឱ្យមានសុខភាពល្អដែរ ។
មិនខុសគ្នាដែរ អ្នកស្រី ហេង ស៊ីវហ្គិច បានអះអាងថា អ្នកស្រីមានចិត្តស្រឡាញ់កីឡាជិះកង់ខ្លាំងណាស់ចាប់តាំងពីបានប្អូនស្រីជំរុញឱ្យក្លាយជាកីឡាការិនីជម្រើសជាតិ ។ ដ្បិត
ថាមានកូន មានប្ដី និងមានការងារមុខជំនួញមិនសូវទំនេរ ប៉ុន្តែអ្នកស្រីនៅតែប្រើពេលហ្វឹកហាត់ជិះកង់ជាមួយប្អូនស្រីមិនដែលខាន ដោយអ្នកស្រីបានទាំងចាត់ទុកថាវ័យរបស់ខ្លួនកាន់តែជ្រេគឺកាន់តែយកចិត្តទុកដាក់ចំពោះកីឡានោះផង ។ អ្នកស្រីថា ស្វាមីរបស់អ្នកស្រីមានតែជំរុញឱ្យអ្នកស្រីប្រឹងប្រែងជាមួយកីឡា ដោយសារតែលោកក៏ជាកីឡាករប្រណាំងម៉ូតូកាលពីមុន និងបានបម្រើនៅក្នុងសហព័ន្ធជិះកង់ផងដែរ ។ ម្យ៉ាងមកពីគ្រួសារអ្នកស្រីទាំងមូលសុទ្ធតែស្រឡាញ់ចូលចិត្តនឹងកីឡានេះផង ទើបមានតែអ្នកជំរុញទឹកចិត្តឱ្យអ្នកស្រីប្រឹងជាមួយអាជីពនេះ ៕
ចែករំលែកព័តមាននេះ