ខេត្តតាកែវ ៖ លោកឡាយ វណ្ណៈ អភិបាលខេត្តតាកែវបានអញ្ជើញចូលរួមរំលែកទុក្ខគ្រួសារសព និងសួរសុខទុក្ខកម្មករ-កម្មការនីនៅរសៀលថ្ងៃទី២២ ខែវិច្ឆិកា ឆ្នាំ២០១៧ ដោយគ្រោះថ្នាក់ដោយសារក្រឡាប់រថយន្តដឹកកម្មករ បណ្តាលឲ្យកម្មករស្លាប់០១នាក់ របួសធ្ងន់០៣នាក់ និងរបួសស្រាល១២១នាក់ ។
លោកអភិបាលខេត្តបានពាំនាំនូវការចូលរួមរំលែកមរណទុក្ខយ៉ាងក្រៀមក្រំ បំផុតចំពោះក្រុមគ្រួសារសព និងកម្មករ-កម្មការនីដែលរងរបួស ។
លោកឧបនាយករដ្ឋមន្ត្រីប្រចាំការ ប៊ិន ឈិន រដ្ឋមន្ត្រីស្តីទីនៃទីស្តីការគណៈរដ្ឋមន្ត្រី និងជាប្រធានក្រុមការងារថ្នាក់ជាតិចុះមូលដ្ឋានខេត្តតាកែវ ចំពោះហេតុការណ៍ដ៏គួរឲ្យសោកស្តាយនេះ និងផ្តាំផ្ញើដល់ក្រុមគ្រូពេទ្យត្រូវយកចិត្តទុកដាក់ព្យាបាលបងប្អូនឲ្យបានល្អ និងជាសះស្បើយទើបអនុញ្ញាតិឲ្យត្រឡប់ទៅផ្ទះវិញ ។
លោកសង្កត់ធ្ងន់ថា បញ្ជាឲ្យគណៈកម្មាធិការត្រួតពិនិត្យបច្ចេកទេសយានយន្តធ្វើការត្រួតពិនិត្យឡើងវិញ និងអ្នកបើកបររថយន្តទូទាំងខេត្តថា អ្នកបើកបរមានបណ្ណបើកបរត្រឹមត្រូវឬទេ ? ប្រសិនពុំមានលក្ខណៈគ្រប់គ្រាន់ទេនោះ នឹងពុំត្រូវបានអនុញ្ញាតិឲ្យដឹកកម្មករនោះទេ ។
លោកអភិបាលខេត្តក៏បាននាំមកនូវអំណោយ និងថវិកាមួយចំនួនឧបត្ថម្ភដល់ក្រុមគ្រួសារសពនូវថវិកាចំនួន០៩លានរៀល ក្នុងនោះថវិការបស់លោកឧបនាយករដ្ឋមន្ត្រីប្រចាំការចំនួន០២លានរៀល លោកជា វណ្ណដេត អ្នកតំណាងរាស្ត្រមណ្ឌលតាកែវ និងជាប្រធានក្រុមការងារថ្នាក់ជាតិចុះមូលដ្ឋានស្រុកបាទី០១លានរៀល លោកអភិបាលខេត្ត០១លានរៀល សាខាកាកបាទក្រហមកម្ពុជាខេត្ត០១លានរៀល និងបេឡាជាតិរបបសន្តិសុខសង្គមចំនួន០៤លានរៀល ។
លោកក៏បានទទួលបង់ថ្លៃសាលាផ្គត់ផ្គង់ការសិក្សាប្រចាំខែរហូតចប់បរិញ្ញាបត្រដល់ប្អូនស្រីសពម្នាក់ ដែលកំពុងបន្តការសិក្សានៅសកលវិទ្យាល័យ និងសន្យាផ្តល់អាហារូបករណ៍ថ្នាក់បរិញ្ញាបត្រដល់ប្អូនស្រីម្នាក់ទៀតនៃសពក្រោយពេលប្រឡងជាប់សញ្ញាបត្រមធ្យមសិក្សាទុតិយភូមិ ៕
ចែករំលែកព័តមាននេះ