រាជធានីភ្នំពេញ ៖ ដោយសារបច្ចេកវិទ្យាទំនើបនាពេលបច្ចុប្បន្ននេះ អ្នកដែលប្រើប្រាស់ប្រព័ន្ធបច្ចេកវិទ្យាកំពុងតែជួបបញ្ហាច្រើន ជាពិសេសគឺប៉ះពាល់ដល់យុវវ័យ ដែលជាពេលកំពុងតែក្រេបយកចំណេះដឹង ។ ពិតណាស់ ឧបករណ៍ទាំងនោះវាផ្ដល់ប្រយោជន៍ច្រើនសម្រាប់សិស្សក្នុងការស្រាវជ្រាវស្វែងរកចំណេះដឹងថ្មីៗតាមរយៈទូរស័ព្ទ ប៉ុន្តែវាក៏ជាគុណវិបត្តិមួយយ៉ាងធំផងដែរ…
រាជធានីភ្នំពេញ ៖ ដោយសារបច្ចេកវិទ្យាទំនើបនាពេលបច្ចុប្បន្ននេះ អ្នកដែលប្រើប្រាស់ប្រព័ន្ធបច្ចេកវិទ្យាកំពុងតែជួបបញ្ហាច្រើន ជាពិសេសគឺប៉ះពាល់ដល់យុវវ័យ ដែលជាពេលកំពុងតែក្រេបយកចំណេះដឹង ។
ពិតណាស់ ឧបករណ៍ទាំងនោះវាផ្ដល់ប្រយោជន៍ច្រើនសម្រាប់សិស្សក្នុងការស្រាវជ្រាវស្វែងរកចំណេះដឹងថ្មីៗតាមរយៈទូរស័ព្ទ ប៉ុន្តែវាក៏ជាគុណវិបត្តិមួយយ៉ាងធំផងដែរ បើសិនជាអ្នកប្រើប្រាស់មិនបានគិតពីប្រយោជន៍ទាំងនោះ។ ទាក់ទងនឹងបញ្ហានេះ ក៏មានសាលាបច្ចេកទេសមួយកន្លែង ដែលផ្ដោតសំខាន់លើសិស្សក្រីក្រ គឺមិនបានអនុញ្ញាតឲ្យសិស្សប្រើទូរស័ព្ទនៅក្នុងសាលាដោយគ្មានការអនុញ្ញាតពីគ្រូឡើយ ។
លោក ពៅ តុលា នាយកសាលាបច្ចេកទេស ដុនបូស្កូខេត្តកែប បានប្រាប់តាមរយៈទូរស័ព្ទនៅព្រឹកថ្ងៃទី២២ វិច្ឆិកា ថា សាលាបច្ចេកទេសដុនបូស្កូទាំងអស់ ដែលមានវត្តមាននៅក្នុងប្រទេសកម្ពុជា គឺមិនបានអនុញ្ញាតឲ្យសិស្សណាម្នាក់ប្រើប្រាស់ទូរស័ព្ទក្នុងសាលា ឬម៉ោងសិក្សាដោយគ្មានការអនុញ្ញាតឡើយ ។
លោកនាយកសាលាបានថ្លែងថា ៖«មូលហេតុដែលសាលាដាក់វិន័យបែបនេះ ដោយសារសាលានេះផ្ដល់អាទិភាពដល់យុវជនក្រីក្រ ដែលគ្មានសមត្ថភាពបន្តការសិក្សានៅសាកលវិទ្យាល័យផ្សេងៗ ។ បើសិនជាសិស្សណាម្នាក់ប្រើទូរស័ព្ទក្នុងម៉ោងសិក្សានោះ វាអាចធ្វើឲ្យប៉ះពាល់ដល់ការសិក្សារបស់គាត់ រំខានអ្នកជុំវិញខ្លួនគាត់ ព្រោះសិស្សភាគច្រើនគាត់មិនដែលប្រើស្មាតហ្វូនសម្រាប់ស្រាវជ្រាវទេ គឺពួកគាត់ប្រើបែបកម្សាន្តអារម្មណ៍ និងធ្វើឲ្យភ្លេចផ្តោតទៅលើការសិក្សា » ។
លោកបានបន្តថា សម័យនេះជាសម័យបច្ចេកវិទ្យា ជាសម័យជឿនលឿន មិនថាវ័យណាទេ គឺគាត់ចេះប្រើទូរស័ព្ទទាំងអស់គ្នា ។ នេះជាបញ្ហាក្នុងការគ្រប់គ្រងរបស់អាណាព្យាបាលគ្រប់រូប ព្រោះគ្រួសារខ្លះគាត់គ្មានសមត្ថភាពទេ ប៉ុន្តែពេលដែលអ្នកជុំវិញមានរបស់ប្រើប្រាស់ទំនើប វាធ្វើឲ្យអ្នកគ្មានសមត្ថភាពទិញប្រើនោះចាប់ផ្ដើមមានគំនិតផ្សេងៗគ្នាក្នុងការសម្រេចបំណងរបស់ពួកគេ ។
លោក សោម ផានិត គ្រូវិន័យសាលាបច្ចេកទេសដុនបូស្កូខេត្តកែប បានលើកឡើងថា ចំពោះវិន័យមិនអនុញ្ញាតឲ្យសិស្សប្រើប្រាស់ទូរស័ព្ទក្នុងសាលា គឺពួកគាត់អនុវត្តបាន១០០% ប៉ុន្តែវិន័យនោះក៏មានករណីលើកលែងដែរ បើសិនជាពួកគាត់ប្រើក្នុងលក្ខខណ្ឌណាមួយដែលគ្រូបានអនុញ្ញាត ។
លោកបន្ដថា ៖« ចំពោះសិស្សដែលគាត់ស្នាក់ក្នុងសាលា គឺមិនអនុញ្ញាតឲ្យប្រើទូរស័ព្ទចាប់ពីថ្ងៃចន្ទ ដល់ថ្ងៃសុក្រ និងសម្រាប់សិស្សស្នាក់នៅក្រៅ គឺក្រៅពីម៉ោងសិក្សា គាត់អាចយកចូលមកបាន តែមិនឲ្យប្រើប្រាស់តាមអំពើចិត្តទេ ។ មិនត្រឹមតែទូរស័ព្ទទេដែលហាមឃាត់នោះ សូម្បីតែគ្រឿងអលង្ការ ក៏មិនអនុញ្ញាតឲ្យសិស្សពាក់ដែរ ហើយបើសិនជាក្នុងករណីណាមួយដែលសិស្សលួចប្រើ ឬយកចូលសាលាក្នុងម៉ោងសិក្សា គឺលោកគ្រូ អ្នកគ្រូមានសិទិ្ធដកសម្ភារទាំងនោះរហូតដល់ចប់ឆ្នាំ ដោយមិនធានាការខូចខាត ឬបាត់បង់អ្វីទាំងអស់ » ។
លោកគ្រូវិន័យប្រចាំសាលាបច្ចេកទេស ដុនបូស្កូរូបនេះបានបញ្ជាក់ថា សម្រាប់សាលាដុនបូស្កូផ្សេងៗ គឺគាត់មិនអាចថា ត្រូវតែគោរពវិន័យទាំងនេះទេ ព្រោះសាលាខ្លះបានអនុញ្ញាតឲ្យសិស្សប្រើប្រាស់ក្នុងសាលាបាន ប៉ុន្តែមិនលាតត្រដាងពេកទេ ។
លោក បេន វិថៃ អតីតសិស្សដុនបូស្កូភ្នំពេញ ផ្នែកកុំព្យូទ័រ បានប្រាប់ថា វិន័យសាលាចេះតែដាក់ហើយ ប៉ុន្តែការអនុវត្តរបស់សិស្សមិនប្រាកដថា បាន១០០%ទេ ។ អ្នកខ្លះ ដោយសារតែវ័យនេះ គាត់ត្រូវការសប្បាយ និងកម្សាន្តអារម្មណ៍ផ្សេងៗ អីចឹង ទោះជាមានបទបញ្ជាផ្ទៃក្នុងហាមឃាត់យ៉ាងណា ក៏នៅតែមានសិស្សខ្លះលួចប្រើប្រាស់ដែរ ។
គួររំឭកផងដែរថា បច្ចុប្បន្ននេះ ប្រទេសកម្ពុជាមានអ្នកប្រើប្រាស់ប្រព័ន្ធអ៊ីនធើរណេតជិត៧លាននាក់ កើនឡើង១,៣លាននាក់កាលពីឆ្នាំមុន និងគណនីទូរស័ព្ទចល័តចំនួន២០លានគណនី ក្នុងចំណោមប្រជាពលរដ្ឋសរុបតែ១៥,៧៦លាននាក់ប៉ុណ្ណោះ ។
ផ្អែកតាមការសិក្សាស្រាវជ្រាវនៅឆ្នាំ២០១៦ ដែលបានចេញផ្សាយដោយវិទ្យាស្ថាន The Open Institute បានឲ្យដឹងថា ជាង៣៧%នៃប្រជាពលរដ្ឋកម្ពុជា ដែលមានអាយុពី១៥ ទៅ៦៥ឆ្នាំ អះអាងថា បានប្រើប្រាស់អ៊ីនធើរណេត និង៩៦%នៃប្រជាពលរដ្ឋកម្ពុជា អះអាងថា ពួកគេមានទូរស័ព្ទផ្ទាល់ខ្លួន ហើយជាង៩៩%នៃអ្នកចូលរួមក្នុងការស្ទង់មតិនេះបាននិយាយថា ពួកគេមានទូរស័ព្ទចល័ត ៕
ចែករំលែកព័តមាននេះ