ខេត្តបាត់ដំបង ៖ អាជ្ញាធរមូលដ្ឋានបានឲ្យដឹងថា ប្រជាពលរដ្ឋដែលស្វែងរកសត្វកណ្ដុរ បានប្រទះឃើញគ្រាប់មីនតោនប្រឆាំងរថក្រោះចំនូន២គ្រាប់ កាលពីវេលាថ្ងៃត្រង់ ថ្ងៃទី២២ វិច្ឆិកា ២០១៧នេះ ខណៈគ្រាប់មីននេះហើបចេញពីក្នុងដីចម្ការមួយកន្លែង…
ខេត្តបាត់ដំបង ៖ អាជ្ញាធរមូលដ្ឋានបានឲ្យដឹងថា ប្រជាពលរដ្ឋដែលស្វែងរកសត្វកណ្ដុរ បានប្រទះឃើញគ្រាប់មីនតោនប្រឆាំងរថក្រោះចំនូន២គ្រាប់ កាលពីវេលាថ្ងៃត្រង់ ថ្ងៃទី២២ វិច្ឆិកា ២០១៧នេះ ខណៈគ្រាប់មីននេះហើបចេញពីក្នុងដីចម្ការមួយកន្លែង នៅក្នុងភូមិអូរដា ឃុំបួរ ស្រុកភ្នំព្រឹក ដែលបង្កឲ្យមានការភ្ញាក់ផ្អើលយ៉ាងខ្លាំង។ មន្ត្រីរូបនោះបានឲ្យដឹងទៀតថា វាជាប្រភេទគ្រាប់មីនប្រឆាំងរថក្រោះ ដែលត្រូវគេដាក់ត្រូតលើគ្នាកប់នៅក្នុងដីកាលពីអំឡុងសម័យសង្គ្រាមក្នុងទសវត្សរ៍៨០ ហើយប្រពលរដ្ឋដែលដើរជីករកសត្វកណ្ដុរជាអ្នកប្រទះឃើញគ្រាប់មីនដ៏គ្រោះថ្នាក់នេះ។
ប្រភពដដែលបានបញ្ជាក់ថា គ្រាប់មីននោះនៅមានគុណភាពល្អ១០០%។ គ្រាប់មីននេះបានហើបផុសចេញពីក្នុងដីចម្ការ ដែលម្ចាស់តែងអាស្រ័យផលរាល់ឆ្នាំ តែគាត់មានសំណាងចៀសផុតពីគ្រាប់សំណល់សង្គ្រាមនេះ។ មន្ត្រីមូលដ្ឋានបានបញ្ជាក់ដែរថា ក្រោយពីប្រទះឃើញគ្រាប់មីននេះភ្លាម ពលរដ្ឋក៏បានរាយការណ៍ទៅសមត្ថកិច្ច ហើយសមត្ថកិច្ចក៏បានរាយការណ៍បន្តភ្លាមៗ ទៅកាន់អង្គភាពកំចាត់មីន ស៊ីម៉ាក ដើម្បីសុំឲ្យជួយអន្តរាគមន៍រំដោះគ្រាប់មីនដ៏គ្រោះថ្នាក់នេះចេញពីដីចម្ការអ្នកភូមិ។
បើតាមមន្ត្រីស៊ីម៉ាកបានឲ្យដឹងដែរថា ពេលនេះគេបានជីកដោះយកគ្រាប់មីនតោនទាំង២គ្រាប់នោះចេញពីដីចម្ការហើយ ដើម្បីត្រៀមយកទៅកម្ទេចចោលហើយ។ នេះចាត់ទុកជាសំណាងល្អបំផុត ដែលម្ចាស់ចម្ការអាស្រ័យផលរាល់ឆ្នាំមិនប៉ះចំគ្រាប់មីននេះ។ ប្រជាពលរដ្ឋគួរតែមានការប្រុងប្រយ័ត្នចំពោះគ្រាប់យុទ្ធភណ្ឌគ្រប់ប្រភេទ ដែលសេសសល់កាលពីសង្គ្រាមដែលអាចមានសេសសល់កប់នៅក្នុងដីស្រែ ឬចម្ការ៕
ចែករំលែកព័តមាននេះ