ប្រទេសនីហ្សេរីយ៉ា ៖ មនុស្សយ៉ាងតិច៥០នាក់បានត្រូវស្លាប់កាលពីថ្ងៃទី២១ វិច្ឆិកា ដោយសារការវាយប្រហារអត្តឃាតមួយអាចជាស្នាដៃក្រុមជីហាដ បូកូហារ៉ាម ប្រឆាំងព្រះវិហារអ៊ិស្លាមក្រុង MUBI ដែលនោះជាការវាយប្រហារយ៉ាងបង្ហូរឈាមបំផុតមួយនៅភាគឦសាន នីហ្សេរីយ៉ាពុំធ្លាប់មានចាប់តាំងពីច្រើនខែមកហើយ ។
ការផ្ទុះកើតមានពេលពិធីសូត្រធម៌នាពេលព្រឹកនៅព្រះវិហារ MADINA ក្រុង MUBI ស្ថិតនៅជាប់ព្រំដែនជាមួយកាមីរ៉ូនក្នុងរដ្ឋ ADAMAWA ។
លោក OTHMAN ABUBAKAR អ្នកនាំពាក្យប៉ូលិសមូលដ្ឋានថ្លែងប្រាប់ AFP ថា តុល្យការបណ្តោះអាសន្ន អ្នកស្លាប់មានយ៉ាងតិច៥០នាក់ ។ ជនអត្តឃាតជាក្មេងជំទង់អាយុប្រមាណជា១៧ឆ្នាំ បានបន្លំខ្លួនជាមួយសាសនិក អ៊ិស្លាម ដើម្បីចូលក្នុងព្រះវិហារ ហើយក៏ធ្វើឱ្យគ្រឿងផ្ទុះដាក់ជាប់ខ្លួនគេផ្ទុះពេលកំពុងសូត្រធម៌ ។
ការវាយប្រហារនេះទោះពុំមានការប្រកាសទទួលខុសត្រូវ ប៉ុន្តែគេប្រាកដថាជាស្នាដៃរបស់ក្រុមបូកូហារ៉ាម ដែលតែងធ្វើការវាយប្រហារដោយទៀងទាត់ប្រឆាំងភូមិទាំងឡាយ ព្រមទាំងធ្វើការវាយប្រហារអត្តឃាតនានា។ រយៈពេល៨ឆ្នាំនៃការកើតមានការបះបោររបស់ក្រុមបូកូហារ៉ាមនៅនីហ្សេរីយ៉ា មនុស្សយ៉ាងតិច២០.០០០នាក់ ហើយបានត្រូវស្លាប់ រួចមនុស្ស២,៦លាននាក់រត់ភៀសខ្លួននៅភាគឦសាននីហ្សេរីយ៉ា ៕
ចែករំលែកព័តមាននេះ