ប្រទេសរុស្ស៊ី ៖ ទូរទស្សន៍រុស្ស៊ី ZVEZDA រាយការណ៍នាពេលថ្មីៗនេះថា យន្តហោះទម្លាក់គ្រាប់បែកយុទ្ធសាស្ត្រ ថ្មីរុស្ស៊ីធុន TU-160 M2 កំពុងតែត្រៀមផលិតជាខ្សែសង្វាក់ហើយ…
ប្រទេសរុស្ស៊ី ៖ ទូរទស្សន៍រុស្ស៊ី ZVEZDA រាយការណ៍នាពេលថ្មីៗនេះថា យន្តហោះទម្លាក់គ្រាប់បែកយុទ្ធសាស្ត្រ ថ្មីរុស្ស៊ីធុន TU-160 M2 កំពុងតែត្រៀមផលិតជាខ្សែសង្វាក់ហើយ ។
តាមទូរទស្សន៍នេះថា យន្តហោះទម្លាក់គ្រាប់បែកយុទ្ធសាស្ត្រជំនាន់ថ្មី TU-160M2 នឹងពុំដូចគ្នា ជាមួយបណ្តាយន្តហោះធុន TU-160 មុនៗឡើយ ។ អ្វីៗទាំងអស់ ក្នុងនោះរួមមានឧបករណ៍វិទ្យុអេឡិចត្រូនិក (RADIOELECTRONIQUE) ម៉ាស៊ីន បណ្តាប្រព័ន្ធការពារ ឧបករណ៍គមនាគមន៍នឹងត្រូវផលិតទៅតាមមូលដ្ឋានថ្មី ។ ការជំរុញផលិតកម្មយន្តហោះទាំងនេះក៏ជាការប្រឈមធំមួយដែរ ខាងផ្នែកបច្ចេកវិទ្យា និងកិច្ចសហប្រតិបត្តិការ ព្រោះថា សហគ្រាសដល់រាប់រយចូលរួមក្នុងការផលិតយន្តហោះនីមួយៗ ។
ក្រៅពីការផលិតយន្តហោះថ្មីៗ បណ្តាយន្តហោះទម្លាក់គ្រាប់បែកយុទ្ធសាស្ត្រ TU-160 ដែលកំពុងតែប្រើប្រាស់នឹងត្រូវកែច្នៃឱ្យកាន់តែទំនើប ។
ទូរទស្សន៍ ZVEZDA អះអាងថា អ្នកផ្គត់ផ្គង់សំខាន់ៗសុទ្ធតែបានត្រៀមខ្លួនរួចហើយ ។
នាពេលថ្មីៗនេះ យន្តហោះ TU-160M ត្រូវបានបង្ហាញដោយពួកអ្នកឯកទេសនៃរោងចក្រផលិតយន្តហោះ KAZAN ។ វាជាយន្តហោះប្រភេទនេះដំបូងគេ ផលិតចាប់តាំងពីឆ្នាំ២០០៨មក ។
យន្តហោះ TU-160 ជាយន្តហោះមួយក្នុងចំណោមយន្តហោះចម្បាំងធំៗ និងខ្លាំងៗទាំងឡាយ ហើយជាមោទនភាពរបស់កងកម្លាំងអាកាសរុស្ស៊ី ។
មានទម្ងន់ពេលហោះឡើងរហូតដល់២៧៥តោន យន្តហោះ TU-160 មានល្បឿនដល់ទៅជាង២.០០០គីឡូម៉ែត្រក្នុងមួយម៉ោង ហើយអាចផ្ទុកគ្រឿងសព្វាវុធដែលមានគ្រាប់បែកគ្មានក្បាលតម្រង់ ឬគ្រាប់បែកមានក្បាលតម្រង់ទំហំផ្សេងៗ រួមទាំងគ្រាប់បែកនុយក្លេអ៊ែរ បណ្តាមីស៊ីលបណ្តែតយុទ្ធសាស្ត្រធុន X-55 ឬមីស៊ីលបាលីស្ទិកបាញ់ពីលើអាកាសធុន X-15 ទម្ងន់សរុបដល់៤០តោន ។ យន្តហោះទម្លាក់គ្រាប់បែកយុទ្ធសាស្ត្រនេះអាចហោះហើរបានក្រោយពេលចាក់ប្រេងពេញបានចម្ងាយរវាងពី១០.០០០ទៅ១៦.០០០គីឡូម៉ែត្រ យោងទៅតាមស្ថានភាពប្រយុទ្ធ ។
ដោយមានយន្តហោះយុទ្ធសាស្ត្រធុននេះសរុប១៦គ្រឿង កងកម្លាំងអាកាសរុស្ស៊ី បានប្រើប្រាស់យន្តហោះ TU-160 ពេលធ្វើប្រតិបត្តិការតាមអាកាសប្រឆាំងពួកភេរវករក្រុមរដ្ឋអ៊ិស្លាមនៅស៊ីរី ។ យន្តហោះយុទ្ធសាស្ត្រទាំងនេះជាលើកដំបូងទម្លាក់គ្រាប់បែកប្រើឧបករណ៍តម្រង់ធុន KAB-500 ព្រមទាំងបាញ់មីស៊ីលមានឧបករណ៍តម្រង់ឡាស៊ែរធុន KH-29L ព្រមទាំងបាញ់បណ្តាមីស៊ីលបណ្តែតធុន KH-101 ៕
ចែករំលែកព័តមាននេះ