ខេត្តកំពង់ចាម ៖ បទល្មើសនេសាទចាប់ពីខែមករា រហូតមកដល់ថ្ងៃទី៣០ ខែតុលា ឆ្នាំ២០១៧ បង្ក្រាបបានចំនួន១៦០ករណី ក្នុងនោះបានបំផ្លាញចោលវត្ថុតាង១៥៩ករណី ចាក់លែងជាកូនត្រីជាង៤,០០០គីឡូក្រាម និងបានចាប់អ្នកឆក់ត្រីចំនួន៣នាក់ បញ្ជូនទៅសាលាដំបូងខេត្តផងដែរ ។
លោក អ៊ុក ណារិន នាយខណ្ឌរដ្ឋបាលជលផលខេត្ត ប្រាប់ឲ្យដឹងនៅថា ដោយមានការណែនាំពីថ្នាក់ដឹកនាំក្រសួងកសិកម្ម ក៏ដូចជាអភិបាលខេត្ត ទាំងក្នុងរដូវបិទ និងរដូវបើកនេសាទ រូបលោក និងលោកប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានដឹកនាំកម្លាំងជាច្រើននាក់ ដោយបានចុះសហការជាមួយនឹងអាជ្ញាធរមូលដ្ឋានព្រមទាំងកងកម្លាំងប្រដាប់អាវុធ ក្នុងនោះមាន ទាហាន អាវុធហត្ថ និងនគរបាលជាដើម ដោយបានចុះបង្ក្រាបបទល្មើសនេសាទ នៅតាមអតីតឡូត៍នេសាទ ។
លោក អ៊ុក ណារិន នាយខណ្ឌរដ្ឋបាលជលផលខេត្ត ប្រាប់បន្តថា ក្នុងយុទ្ធនាការចុះបង្ក្រាបនោះ មានដូចជា លូស្បៃមុង១,៨៥០មាត់, បង្គោល២៥,៦៩៥ដើម និងចាក់លែងកូនត្រីចំនួន៤,៥៦៤គីឡូក្រាម, រុះរើរបាំងជិតព្រែកបាន៣៥កន្លែង ក្នុងនោះមានអ្នកប្រព្រឹត្តបទល្មើសឆក់ត្រីចំនួន៣នាក់ ត្រូវបានបញ្ជូនទៅសាលាដំបូងខេត្តផងដែរ ។ ការបង្ក្រាបបទល្មើសនៅក្នុងឆ្នាំ២០១៧នេះ មានការថយចុះជាងឆ្នាំ២០១៦ កត្តានេះដោយសារមន្ត្រីជលផលធ្លាប់បានចុះផ្សព្វផ្សាយបញ្ជ្រាបដល់ប្រជានេសាទក្នុងនោះមានដូចជា នៅស្រុកកំពង់សៀម ស្រុកព្រៃឈរ ស្រុកកងមាស ស្រុកជើងព្រៃ ស្រុកបាធាយ ស្រុកកោះសូទិន ដែលពួកគាត់កាលពីមុនធ្លាប់តែប្រព្រឹត្តិបទល្មើសនេសាទ បានងាកមកប្រើប្រាស់ឧបករណ៍នេសាទស្របច្បាប់វិញ មានដូចជា មង, សំណាញ់, សន្ទូច, ព្រមទាំងឧបករណ៍ផ្សេងៗទៀតផងដែរ ។ ហើយអ្នកដែលធ្លាប់ចិញ្ចឹមត្រីឆ្តោតាមទ្រុងមួយចំនួនបាននាំគ្នាឈប់ ព្រោះថាត្រីទាំងនេះស៊ីកូនត្រីតូចៗជាអាហារ ។
លោក អ៊ុក ណារិន នាយខណ្ឌជលផលខេត្តបញ្ជាក់ថា សម្រាប់អ្នកដែលប្រព្រឹត្តបទល្មើសដាក់ដាយនៅពេលដែលចាប់បានក្នុងត្រូវពិន័យទៅច្បាប់អន្តរកាល តែបើនូវបន្តដាក់លើកទី២សម្ភារត្រូវដកហូត ។ ក្នុងហេតុមានអតីតឡូត៍នេសាទចំនួនពីរ ក្នុងនោះមានឡូត៍លេខ០២ នៅឃុំរកាគយ ស្រុកកងមាសនិងឡូត៍លេខ១៤, ១៥ នៅស្រុកបាធាយ ត្រូវបានអភិរក្ស ។ ដោយឡែកឡូត៍នេសាទលេខ០១ នៅឃុំគៀនជ្រៃ ស្រុកកំពង់សៀម ត្រូវបាន សម្តេចតេជោ កាត់មកឲ្យពលរដ្ឋនេសាទជាលក្ខណៈគ្រួសារវិញ ៕
ចែករំលែកព័តមាននេះ