មានបញ្ជាឱ្យស៊ើបអង្កេតជាបន្ទាន់ឡើងវិញ ករណីបា.ញ់ក្នុងកាស៊ីណូ«ថ្មពេជ្រ»
- កណ្តាល
ខេត្តកណ្តាល ៖ សេចក្តីរាយការណ៍បឋមឱ្យដឹងថា នារសៀលថ្ងៃទី២២ វិច្ឆិកា នេះ កម្លាំងសមត្ថកិច្ច ដឹកនាំដោយលោក ឯក ស៊ុនរស្មី…
ខេត្តកណ្តាល ៖ សេចក្តីរាយការណ៍បឋមឱ្យដឹងថា នារសៀលថ្ងៃទី២២ វិច្ឆិកា នេះ កម្លាំងសមត្ថកិច្ច ដឹកនាំដោយលោក ឯក ស៊ុនរស្មី ព្រះរាជអាជ្ញារងខេត្ត និងមានការចូលរួមពីលោកឧត្តមសេនីយ៍ត្រី រឿន ណារា ស្នងការរង សហការជាមួយនាយកដ្ឋានប្រឆាំងភេរវកម្ម ក្រសួងមហាផ្ទៃ បានចុះទៅដល់ទីតាំងកាស៊ីណូ «ថ្មពេជ្រ» ដើម្បីធ្វើការពិនិត្យទីតាំងកើតហេតុផ្ទាល់ ក្រោយពីមានបញ្ជារបស់ព្រះរាជអាជ្ញាអមសាលាដំបូងខេត្ត លោកលាវ ស្រេង បានចាត់ឱ្យលោកឯក ស៊ុនរស្មី ព្រះរាជអាជ្ញារងសាលាដំបូងខេត្ត ត្រូវដឹកនាំសមត្ថកិច្ចបើកការស្រាវជ្រាវជាបន្ទាន់ឡើងវិញ ។
បុរសដែលរងការចោទប្រកាន់នេះ ត្រូវគេស្គាល់ថា ឈ្មោះ អ៊ុំ សុភ័ក្ត្រ អាយុ៣៤ឆ្នាំ ជានាយផ្នែកស្រាវជ្រាវស៊ើបការក្រៅ និងបច្ចេកទេស មានទីលំនៅក្នុងសង្កាត់សែនសុខ ខណ្ឌពោធិ៍សែនជ័យ (បានឃាត់ខ្លួន) ។
ការបើកស្រាវជ្រាវឡើងវិញនេះ គឺបន្ទាប់ពីបានមើលតាមវីដេអូដែលបង្ហាញដោយកាមេរ៉ាសុវត្ថិភាពនោះ គឺបុរសឈ្មោះ អ៊ុំ សុភ័ក្ត្រ បានដើរចូលទៅក្នុងកាស៊ីណូ ដោយដៃកាន់កាំភ្លើងពិតប្រាកដមែន តែមិនបានធ្វើការបាញ់បោះនោះទេ ប៉ុន្ដែក្រុមសន្ដិសុខនៅក្នុងកាស៊ីណូនោះ ដែលមានកាំភ្លើងនៅក្នុងដៃដែរនោះ បានបើកការបាញ់ប្រហារមកដល់បុរសនោះមុន ប៉ុន្ដែការបាញ់ប្រហារនោះ មិនបណ្ដាលឲ្យត្រូវជនណាម្នាក់នោះទេ ពោលគឺបាញ់ទៅលើតុសង្វៀនតែប៉ុណ្ណោះ។ ក្រោយបាញ់ប្រហាររួច ក្រុមសន្ដិសុខនៅក្នុងកាស៊ីណូដែលមានកាំភ្លើងនោះ បាននាំគ្នីគ្នាចាប់ព្រួតវាយបុរស នោះតែម្ដង។
គួររំលឹកថា ករណីជម្លោះក្នុងកាស៊ីណូ «ថ្មពេជ្រ» គឺកើតឡើងកាលពីវេលាម៉ោង១២ និង១៥រំលងអធ្រាត្រ ឈានចូលថ្ងៃទី២១ វិច្ឆិកា ស្ថិតក្នុងភូមិក្អមសំណរក្រោម ឃុំក្អមសំណរ ស្រុកលើកដែក រហូតឈានដល់ការផ្ទុះអាវុធ ដោយក្រុមសន្តិសុខក្នុងកាស៊ី បានបាញ់ទៅលើបុរសដែលត្រូវបានចោទថា ចូលមកប៉ុនប៉ងប្លន់ក្នុងកាស៊ីណូ ។
ចែករំលែកព័តមាននេះ