ខេត្តកំពង់ធំ ៖ កំពូលមេចោរប្លន់និងចាប់មនុស្សជំរិតទារប្រាក់ដ៏ញាក់សាច់នៅលើទឹកដីស្រុកបារាយណ៍ និងស្រុកដទៃទៀតក្នុងខេត្ដកំពង់ធំ ឈ្មោះតុង ហួន រួមជាមួយបក្សពួកម្នាក់ទៀតឈ្មោះសូរ សឿន បានត្រូវជាប់អន្ទាក់សមត្ថកិច្ចប៉ូលិសចាប់ខ្លួនបាន កាលពីវេលាម៉ោង២និង១០នាទីរសៀលថ្ងៃទី២៩ តុលា នៅចំណុចលើផ្លូវជាតិលេខ៦ ស្ថិតក្នុងភូមិសង់ឃ្លាំង ឃុំតាំងក្រសាំង ស្រុកសន្ទុក ខេត្ដកំពង់
ខេត្តកំពង់ធំ ៖ កំពូលមេចោរប្លន់និងចាប់មនុស្សជំរិតទារប្រាក់ដ៏ញាក់សាច់នៅលើទឹកដីស្រុកបារាយណ៍ និងស្រុកដទៃទៀតក្នុងខេត្ដកំពង់ធំ ឈ្មោះតុង ហួន រួមជាមួយបក្សពួកម្នាក់ទៀតឈ្មោះសូរ សឿន បានត្រូវជាប់អន្ទាក់សមត្ថកិច្ចប៉ូលិសចាប់ខ្លួនបាន កាលពីវេលាម៉ោង២និង១០នាទីរសៀលថ្ងៃទី២៩ តុលា នៅចំណុចលើផ្លូវជាតិលេខ៦ ស្ថិតក្នុងភូមិសង់ឃ្លាំង ឃុំតាំងក្រសាំង ស្រុកសន្ទុក ខេត្ដកំពង់ធំ ។
តាមប្រភពព័ត៌មានពីលោកជា ពឿន នាយការិយាល័យព្រហ្មទណ្ឌកម្រិតធ្ងន់បានឱ្យដឹងថា មេចោរប្លន់និងចាប់ជំរិតនេះបានធ្វើសកម្មភាពអស់ជាច្រើនឆ្នាំមកហើយ និងផ្លាស់ប្ដូរស្នងការនគរបាលបីបួននាក់ហើយមិនដែលចាប់ខ្លួនជននេះបានទេ។ ពេលនេះ ដោយមានការចង្អុលបង្ហាញ និងបញ្ជាផ្ទាល់ពីលោកឧត្ដមសេនីយ៍ត្រីផាន់ សុផេង ស្នងការនគរបាលខេត្ដឱ្យធ្វើការស៊ើបអង្កេតស្រាវជ្រាវរកឱ្យឃើញមុខសញ្ញាមេចោប្លន់ដ៏សាហាវ ដើម្បីយកមកផ្ដន្ទាទោសទៅតាមច្បាប់។ មន្ត្រីប៉ូលិសរូបនេះបន្តថាឈ្មោះ តុង ហួន មានដីកាតុលាការចេញឱ្យតាមចាប់ខ្លួនចំនួន៦ករណី តែចាប់ខ្លួនមិនបានសោះ ។ ទោះបីជាបែបណាថ្ងៃអង្សារបស់មេចោរនេះក៏បានមកដល់នាពេលនេះ ។ ជុំវិញការចាប់ខ្លួនកំពូលមេចោរមានបក្សនេះមិនមែនជាការងាយស្រួលនោះទេ ដែលកម្លាំងប៉ូលិសច្រើននាក់បានរួមគ្នាចាប់ដោយកម្លាំងបាយទម្រាំចាប់បានម្នាក់ៗទ្រមខ្លួនគ្រប់គ្នា ។
គួររំលឹកថា កាលពីថ្ងៃទី២៩ កញ្ញា ឆ្នាំ២០០៦ នៅពេលសមត្ថកិច្ចធ្វើការឡោមព័ទ្ធផ្ទះមេចោរប្លន់ឈ្មោះតុង ហ៊ីម ដែលត្រូវជាប្អូនបង្កើតរបស់ឈ្មោះតុង ហួន នេះ ពួកនេះបានធ្វើការតដៃដោយបាញ់រះមកលើសមត្ថកិច្ចវិញ ពុំព្រមចូលសារភាព ឬប្រគល់ខ្លួនឱ្យចាប់ដោយស្រួលនោះទេ ទើបមានបញ្ជាឱ្យកម្ទេចនៅលើផ្ទះតែម្តងក្នុងភូមិត្រពាំងជ្រៃ ឃុំបល្ល័ង្ក ស្រុកបារាយណ៍ និងរឹបអូសបានកាំភ្លើងអាកាស្វាយបត់១ដើម និងគ្រាប់ចំនួន៧០គ្រាប់ ។ ពេលនោះឈ្មោះតុង ហួន ដែលត្រូវជាបងបង្កើតបានរត់គេចខ្លួនបាត់អស់រយៈពេលជាច្រើនឆ្នាំ ។ ទើបតែពេលថ្មីៗនេះនៅវេលាម៉ោង៩និង៤០នាទីយប់ថ្ងៃទី៣ កញ្ញា មុខសញ្ញាចាស់នេះបានចូលមកប្លន់នៅក្នុងភូមិអន្ដោក ឃុំក្រវ៉ា ស្រុកបារាយណ៍ យកបានប្រាក់ចំនួន៣.០០០ដុល្លារ និងលុយខ្មែរ២០ម៉ឺនរៀល ហើយបានបាញ់សម្លាប់បុរសម្នាក់ឈ្មោះឯក ហ៊ុយ ភេទប្រុស អាយុ៦១ឆ្នាំ និងរងរបួស២នាក់ គឺឈ្មោះចាន់ ណាក់ ភេទប្រុស អាយុ២០ឆាំ្ន ត្រូវជាកូនបង្កើតរបស់អ្នកស្លាប់ រងរបួសធ្លាយកំភួនដៃ និងឈ្មោះឈីន ឈី អាយុ២១ឆ្នាំ ត្រូវរបួសចំត្រគៀកត្រូវជាក្មួយបង្កើតរបស់អ្នកស្លាប់។ ក្រុមចោរប្លន់នោះមានគា្ន៦នាក់ និងបិទមុខ៣នាក់។
ក្រោយពីមានអំពើប្លន់បានប៉ុន្មានថ្ងៃដោយមានបទបញ្ជាពីលោកស្នងការឧត្ដមសេនីយ៍ត្រីផាន់ សុផេង ឱ្យតាមដានរកខ្សែរយៈបក្សពួកក្រុមចោរប្លន់ឱ្យទាល់តែឃើញ ព្រោះថា បើរកមិនឃើញទេនោះនិងមានអំពើប្លន់ទៀតជាក់ជាមិនខាន។ បន្ទាប់ពីបានទទួលបទបញ្ជាហើយ កម្លាំងនគរបាលបានធ្វើការតាមដានស្រាវជ្រាវចាប់បានបក្សពួកចំនួន ២នាក់ដែលពេលប្លន់បានបិទមុខខ្លាចគេស្គាល់ព្រោះជាអ្នករស់នៅក្នុងភូមិ-ឃុំជាមួយគ្នា ទី១-ឈ្មោះអេង អឿន ភេទ ប្រុស អាយុ៥២ឆ្នាំ និងទី២-ឈ្មោះជា ស៊ុង ភេទ ប្រុស អាយុ៤៩ឆ្នាំ។ ជនទាំង២បានដឹងថាជនរងគ្រោះមានលុយទើបលក់គោថ្មីៗក៏នាំគ្នាមកប្លន់យកតែម្តង ។
នៅពេលដែលសមត្ថកិច្ចចាប់ខ្លួនជនបិទមុខ២នាក់ខាងលើ បានធ្វើការសួរចម្លើយទើបដឹងថាមេចោរប្លន់ឈ្មោះតុង ហួន ដែលត្រូវជាបងបង្កើតរបស់តុង ហ៊ីម ដែលបានបាញ់សម្លាប់កាលពីឆ្នាំ២០០៦ ជាអ្នកដឹកនាំពួកខ្លួន។ ដោយមានការតាមដាននិងសើុបអង្កេតដោយយកចិត្ដទុកដាក់បំផុត ទើបនៅថ្ងៃទី២៩ តុលា កម្លាំងសមត្ថកិច្ចបានឈានទៅដល់ការចាប់ខ្លួនមេចោរប្លន់ឈ្មោះតុង ហួន និងឈ្មោះសូរ សឿន ជាបក្សពួកបាននៅចំណុចខាងលើដោយដកហូតបានម៉ូតូហុងដា១គ្រឿងស៊េរី២០០៧ ពណ៌ខ្មៅ និងកាំភ្លើងខ្លីកា៥៤មួយដើម មានគ្រាប់ចំនួន១៣គ្រាប់។
នៅចំពោះមុខសមត្ថកិច្ចមេចោរប្លន់ឈ្មោះ តុង ហួន បានសារភាពថា បន្ទាប់ពីសមត្ថកិច្ចបានបាញ់សម្លាប់ប្អូនប្រុសបង្កើតរបស់ខ្លួនកាលពីឆ្នាំ២០០៦រូបគេបានរត់ទៅរស់នៅសម្ងំលាក់ខ្លួនពួនអាត្មាក្នុងភូមិក្រោលគោ ឃុំអូរស្មាច់ ស្រុកអូរស្មាច់ ខេត្ដបន្ទាយមានជ័យ ។ មេចោររូបនេះសារភាពថា ខ្លួនទើបតែដឹកនាំប្លន់នៅភូមិ-ឃុំខាងលើដើម្បីយកលុយចែកគ្នាចាយ។ ពេលនេះចាយអស់ហើយក៏មានផែនការទៅប្លន់នៅភូមិព្រេង ឃុំស្ពឺ ស្រុកចំការលើ ខេត្ដកំពង់ចាមទៀត តែនៅពេលដែលកំពុងជិះម៉ូតូឌុបគ្នាមកដល់ចំណុចខាងលើក៏ត្រូវសមត្ថកិច្ចចាប់ខ្លួនបានតែម្ដង។ តុង ហួន បានសារភាពទៀតថា ខ្លួនមានផ្ទះនៅក្នុងភូមិ ត្រពាំងជ្រៃ ឃុំបល័្លង្ក ស្រុកបារាយណ៍។ ចំណែកបក្សពួកម្នាក់ទៀតបានសារភាពដែរថា ខ្លួនឈ្មោះសូរ សឿន ភេទប្រុស អាយុ៣៣ឆ្នាំ រស់នៅក្នុងភូមិ បឹងង៉ត ឃុំត្រយ៉ែង ស្រុកសូទ្រនិគម ខេត្ដសៀមរាប ធ្លាប់បានចូលរួមធ្វើសកម្មភាពប្លន់ និងចាប់ជំរិតជាមួយ ឈ្មោះតុង ហួន ជាច្រើនដងមកហើយ មិនដែលត្រូវសមត្ថកិច្ចចាប់ខ្លួនបាននោះទេ គឺទើបតែពេលនេះត្រូវអស់ល័ក្ខជាប់អន្ទាក់ប៉ូលិស ខ្លួនគ្មានអ្វីនិយាយទៀតនោះទេ។
លោកជា ពឿន បានថ្លែងទៀតថា បន្ទាប់ពីបានដឹងដំណឹងថា មានមុខសញ្ញាចាស់បម្រុងនឹងធ្វើសកម្មភាពប្លន់ទៀតនោះ ដោយមានបទ បញ្ជាពីលោកឧត្ដមសេនីយ៍ត្រីផាន់ សុផេង ស្នងការនគរបាលខេត្ដ កម្លាំងនគរបាលស្រុកបារាយណ៍ដឹកនាំដោយលោកអនុសេនីយ៍ឯកស្រី ច័ន្ទស៊ីណា និងលោកវរសេនីយ៍ត្រីពេជ ថាល់ អធិការស្រុកសន្ទុកដឹកនាំកម្លាំងស្ទាក់ចាប់ ធ្វើដូចត្រួតពិនិត្យចរាចរណ៍ និងទម្រាំតែចាប់បាន សមត្ថកិច្ចយើងម្នាក់ៗក៏ត្រូវទ្រមខ្លួន ដោយសារតែការរើបម្រះក្រាញននៀលពីជនទាំង២នាក់នេះ យ៉ាងប្រកាច់ប្រកិន ជាពិសេសគឺបុរសកំណាចជាមេចោរប្លន់សម្លាប់មនុស្សគ្មានញញើតដៃឈ្មោះតុង ហួន នេះតែម្ដង ដែលធ្វើការតដៃជាមួយសមត្ថកិច្ចរហូតរហែកខោអាវអស់ទម្រាំតែចាប់ខ្លួនបាន ទើបបានជាសមត្ថកិច្ចត្រូវវាយទាំងខ្នោះដៃ និងខ្នោះជើង ពីព្រោះតែមេចោរប្លន់រូបនេះមានកម្លាំងខ្លាំងដូចក្របីឡើងក តែទោះជាខ្លាំងប៉ុណ្ណាក៏ត្រូវជាប់ខ្នោះដែរ។ បន្ទាប់ពីបញ្ជូនមកដល់ស្នងការដ្ឋានភ្លាមលោកព្រះរាជអាជ្ញាក៏បញ្ជាឱ្យនាំខ្លួនមេចោរប្លន់ទាំង២នាក់ទៅកាន់តុលាការខេត្ដជាបន្ទាន់ ព្រោះនៅតុលាការមានទ្រុងដែកដ៏រឹងមាំមួយសម្រាប់ដាក់ជនកំណាចទាំង២នាក់មិនអាចរត់រួចឡើយ ៕
ចែករំលែកព័តមាននេះ